Read Samba Leko Kedké Yohana Núù bìá 2 Bible Online

Kedké Yohana Núù bìá 2 - Samba Leko bible

Kedké Yohana Núù bìá 2

¹«Bád m̀ pii núúboòraa yée, *Eklisiya aa Efesus bìlə́ rə *malaika: «Nɛ́ŋə̀ aa kò' dùdù yɛb nə́ŋsínà nɛɛ̀n váànú, bít ɛ̀m in bəraa nə́ŋsínà, zíg bə̀ sáá lampə̀ bəd ba, bə̀ kùd kə̀ bəŋzɔ' rə tə́ŋə́ rə, gám nwɔŋ kə̀ aakíin'

²Mə́ gàb in aa ḿ mà' rə yàá, mə́ gàb tù' gbò'kè ń yàá, kə̀ tɛ́m sidké ń tá. Mə́ gàb yàá, ḿ bán nɛ́b vaksə́ bə̀ bəd sidǹmbə̀ gá. Mə́ gàb yàá, də́' ń ɛ̀g nɛ́b bəraa bə̀ tə́ baàn bənə́ *Yéésù gbantumsə̀ bərá, zá ìì Yéésù gbantumsə̀ bəd gá rə yàá. Bít ḿ bé' gə́, bə̀ nɛ́b gúsuúm bə̀ bərá.

³Bít ń tə́ kə̀ tɛ́m sidké naú, ḿ bé' búúd nə́gə́l mə́ bòórú, bít ḿ bɔ̀' váàndo ń sé.

⁴Zá aa yée in aa sɔ̀ɔ̀n mə́ ám naà síndoó' ń í' mə́ kə̀ nɛɛ̀n aa éèn sɔ̀d ń í' mə́ rú rə kíin sé.

⁵Sèl ǹ zá' nɛɛ̀n aa nyàam ń kùm dú, bɔ̀b bə́ŋ̀ ń yi' síndoó' ǹ sɔ̀g kúnú, bít m̀ mà' kə̀ nɛɛ̀n aa sɔ̀d ḿ mà' rə kíin. Ń sɔ̀g síngə́, máà yaànà ám sunú, bít pà' má in aa zíg ń sáá lampə̀ ń bərə kíìn zá'ǹ zɔ̀ŋ oò ba.

⁶Zá aa insɔ̀ɔ̀n aa ḿ mà' ámbə̀ roó' ń zèè in aa *Nikolaika bəd bə̀ tə́ ma'ǹ də, kìínmbə̀ máá kɔ̀ mə́ zèè bə̀ rə kíin.

⁷Nɛ́ŋə̀ aa tə́ kə̀ túŋ naà rə, oò kìì kíìn sɔ̀ɔ̀nkè, nwɔŋ aa Nwul Gìdń tə́ *Eklisiya bəd baàn doó: ‹Nɛ́ŋə̀ aa nə́' kànì rə, máù kpaŋ̀ piìn oò líí téé wàà gɔ̀ŋsə́ bìá. Téé nyìì aarə, dìì tə́ Vɛnɛ́b lɛsú.› »

⁸«Bád m̀ pii núúboòraa yée, *Eklisiya aa Samirna bìlə́ rə *malaika: «Màn aa éèn sɔ̀d, bít dùg kə̀ bòòrá, màn aa val kò'ù bít díímà valə́ rə, gám nwɔŋ kə̀ aakíin'

⁹Mə́ gàb nɛɛ̀n aa ń tə́ búúd í'ǹ dú gbàákù rə yàá. Mə́ gàb yàá, ń nɛ́d búúd bìá; zá vɛ́nà bə̀ gə́, ń nɛ́b yàám bə̀ bərá. Mə́ gàb nwɔŋ vaksə́ bəraa nɛ́b kambəd tə́ gáàm ám yílə́ rə yàá. Bə̀ bàà gə́, bənə́ *Yahudu bərá, vɛ́nà bə̀ gə́, bə̀ Yahudu bəd gá. Zá bə̀ nɛ́b *Satan wúl wálke rú bə̀ bərá.

¹⁰Ǹ nùù də́dǹ kə̀ búúraa ń dá bé'ǹ bə́ŋyée rə sí. Mə́ tə́ən kíìn baanàá, Sámbàŋyɛ́rə̀ də́' dá ii kíìn ɛgàá, kə̀ páànmbə̀ nɛ́b zùúm kambəd aí tə́ŋú, wúltígə́l bə̀ rú, bít íí dá búúd bé'ǹ sɛŋ kób. Zá ǹ kùm kə̀ tɛ́mbagkéá, val oò kò' n zé; bít máá n mə̀ə̀lə̀ gɔ̀ŋsə́ bə̀ piinàá.

¹¹«Nɛ́ŋə̀ aa tə́ kə̀ túŋ naà rə, oò kìì kíìn sɔ̀ɔ̀nkè, nwɔŋ aa Nwul Gìdń tə́ *Eklisiya bəd baàn doó. «Nɛ́ŋə̀ aa nə́' kànì rə, bé' búúd val iirúb bə̀ gá.»

¹²«Bád m̀ pii núúboòraa yée, *Eklisiya aa Pɛrgamus bìlə́ rə *malaika. «Màn aa kò' yɛ́rə̀ bùúd ùùkè gú' iirúb bə̀ naà rə, gám nwɔŋ kə̀ aakíin'

¹³Mə́ gàb zɔ̀ŋ aa ń ləə bərə yàá, *Satan ləə gààd tə́ wərà. Zá ń zíg tɛ́m ḿ tə́ máá bəní, bít məə ń dàà tɛ́mbagké mə́ sé; kóó sɛŋ aa bə̀ lò' sedako vɛ́nà bə̀ mə́ Antipas aí tə́ŋú, zɔ̀ŋ aa *Satan ləə bəroó.

¹⁴Zá mə́ tə́ kə̀ nwɔŋ kambəd naà, bɔbm̀ ámbə̀ álǹmbìá' íí tə́ kə̀ nɛ́b kambəd naà wərà, bə̀ tə́ *Balam insánke bagàá. *Balam sán *Balak gə́, oò mà', bɔ̀b záá oò lɛ́l nɛ́b Israila bə̀ bəd invaksə́ rú, kə̀ fu'ǹmbə̀ gɔ̀g bəraa wéé bə̀ tə́ vɔɔm piìn doó, bít boò mà' labsàá.

¹⁵Kə̀ nɛɛ̀n aarə rú kíinní sɔ̀ŋ, ám kɔ̀ ń tə́ kə̀ nɛ́b kam naú, bə̀ tə́ *Nikolaika bəd insánke bagàá.

¹⁶Ogə́ ǹ sɔ̀g kúnú. Síngə́, máà yaànà ám sə̀n bə́ŋyée ní, má nə́gə̀d nə́'ǹ kə̀ boò ra, kə̀ yɛ́rə̀ bùúd má gú' bə bìá.

¹⁷«Nɛ́ŋə̀ aa tə́ kə̀ túŋ naà rə, oò kìì kíìn sɔ̀ɔ̀nkè, nwɔŋ aa Nwul Gìdń tə́ *Eklisiya bəd baàn doó: «Nɛ́ŋə̀ aa nə́' kànì rə, máù *mana mə́'ke piinàá, bít máù bəŋ biíd aa bə̀ bád nə́gə́l puu bərə piìn kɔ̀. Nɛ́ŋə̀ nə́ŋ̀má gàb nə́gə́l puu aarə sé; nɛ́ŋə̀ aa dá bəŋ aarə bɔbm̀ də, dá sə̀ní nə́gə́l aarə gabàá.»

¹⁸«Bád m̀ pii núúboòraa yée, *Eklisiya aa Tiyatira bìlə́ rə *malaika: «Vɛnɛ́b Wàà gám nwɔŋ kə̀ aakíin' Oòrə, màn aa núù oò bəd kìínmbə̀ laa yɛ̀ɛ́l bíŋ bíŋ kíin doó, bít dun oò bəd kɔ̀ tə́ kìínmbə̀ ba' nyáàm aa bə̀ páá laa rú, bít bíl nyɛdkè rə kíin.

¹⁹Mə́ gàb tù' bəraa ń tə́ ma'ǹ də yàá. Mə́ gàb í'sɛ̀l ń yàá, mə́ gàb tɛ́mbagké ń yàá, mə́ gàb nɛɛ̀n aa ń tə́ tù' ma'ǹ də rə yàá, kə̀ tɛ́m sidké ń tá. Bít mə́ gàb yàá, tù' bəraa ń tə́ ma'ǹ bə́ŋyée rə, kànsə̀n aa bəraa éèn sɔ̀d ḿ mà' roó.

²⁰Zá aa yée in aa sɔ̀ɔ̀n mə́ ám naà síndoó' ń dàà nɛ́ŋ kéèndo aa bə̀ dɛ̀rə̀ Zezabɛl lə, tə́ in aa í' rə ma'nàá. Bàà gə́, bəǹ *Vɛnɛ́b gbantumsàá. Zá záá tə́ nɛ́b mə́ bəd lɛ́ɛ̀l kə̀ insánke oòra. Zezabɛl záá bə̀ boò mà' labsàá, bít boò líí inlíìnmbə̀ aa bə̀ pii vɔɔm bəd doó.

²¹Bít mə́ piiù sɛŋ, bɔ̀b oò sɔ̀g kúnú, zá í' sɔ̀gǹmbə̀ kə̀ labsə̀ oòrə sé.

²²Ǹ ɛ̀ga, làà máù lɛ́'ǹ kilə̀ búúd bə̀ ba. Bít nɛ́b bəraa bə̀ tə́ labsə̀ ma'ǹ kə̀ oò tə́ rə kɔ̀, má bə̀ búúd í'ǹ gbàákù, lɛ́' bə̀ dàà tù' vaksə́ aa Zezabɛl tə́ ma'ǹ də síngə́ roó.

²³Máá nɛ́b bəraa bə̀ tə́ù bagǹ də lodǹ kɔ̀. Bít kə̀ aakíin, *Eklisiya bəd kóólé, bə̀ dákíìn gabàá, máára mə́ kùmsə̀n màn aa gàb nɛ́b bəd inselké, kə̀ in aa bə̀ tə́ í'ǹ də tə́ roó. Bít kóó nɛ́ɛ̀réè, máù káàn kə̀ nɛɛ̀n aa mà' tù' oò rú rə kíin.

²⁴«Zá nɛ́b kambəd aí tə́ŋú, Tiyatira bìlú, íí bàg Zezabɛl insánke rə sé. Íí sán in aa nɛ́b kambəd bə̀ dɛ̀d *Satan *inmə́'ke gbàád bəd də sé. Aa yée nwɔŋ aa má ii baàn doó' mə́ zíg ii indaŋ̀mbə̀ pi'kè ɔ̀d nə́ŋ̀ máá yílə́ gá.

²⁵Ogə́, kò' ìì kùd in aa íí kə̀ naà rə kíìn sɔ̀ɔ̀nkè, yaà máà wə́ə́ zé.

²⁶Nɛ́ŋə̀ aa nə́' kàn yàá, bít tə́ diìn in aa mə́ í' rə ma'ǹmbìá, yaà bɛ́d tə́ zé rə, máù kpɛŋsɛ́l piinàá. Máù kpɛŋsɛ́l piìn nɛ́b aa bàg Vɛnɛ́b síndə yílú.

²⁷Dá bə̀ ma'ǹ boò ləəù kúnú, kə̀ boò bə̀ búúd í'ǹmbə̀ kə̀ gbà' ba'wà bìá. Zìb dá bə̀ wɔbə̀l kìínmbə̀ bun kɛ̀l kíin.

²⁸Aarə kpɛŋsɛ́l luùm nə́ŋ̀ní, mə́ bɔ̀bà taà báá mə́ naú. Máá kɔ̀, máù dùdùwà nwúunbə bə̀ piinàá.

²⁹«Nɛ́ŋə̀ aa tə́ kə̀ túŋ naà rə, oò kìì kíìn sɔ̀ɔ̀nkè, nwɔŋ aa Nwul Gìdń tə́ *Eklisiya bəd baàn doó.»