Read Samba Leko Kedké Yohana Núù bìá 20 Bible Online

Kedké Yohana Núù bìá 20 - Samba Leko bible

Kedké Yohana Núù bìá 20

¹Bít mə́ bé' *malaika nə́ŋ̀ tóò síìmmà lɛgú, kò'à in waàl bə̀ kedǹ *lɔ̀ŋ pí'ke gbà'á bə̀ naú, kə̀ sɛ̀gsɛ́g gbà'á nə́ŋ̀ tá.

²Bít kɔ̀ŋ kò' inzaaná, bisaa nyàamdoorú roó. Oòrə Sámbàŋyɛ́ràá, bít *Satan. Bít kò' yaà tabə̀ kə̀ sɛ̀gsɛ́gá, bɔ̀b oò kùm zèd laa núnà zɔ̀ŋ kób.

³Bít malaika pà' làà lɛ́'ù *lɔ̀ŋ pí'ke gbà'á rú, bít ke' waàl kə̀ kɔ̀msə̀wàá, bɔ̀b inzaan záá oò lɛ́l nɛ́b aa zɔ̀ŋə yɛ́b bərə sɔ̀ŋ sí. Zèd laa núnà zɔ̀ŋ kób taà bɛ́rì gə́, bìn bə̀ dáù taà lɛ́'nàá, zá sɛŋ zɔ̀gɔ̀ní bìá.

⁴Bít mə́ bé' mə̀ə̀d bərá. Nɛ́b aa bə̀ kùm yílú wərə̀ rə, bə̀ pii bə̀ kpɛŋsɛ́l nɛ́b bəd bə̀ fágǹná. Bít mə́ bé' nɛ́b aa dùb bə̀ və̀l bà yílə, sedako aa ìì mà' Yéésù Krístù yílə́ rə bòórú, bít kə̀ Vɛnɛ́b nwɔŋ bòórú rə nyì' boò bərá. Bə̀ káŋ gɔ̀g fɔ̀gú bə̀ aarə sé, sínkɔ̀ nyìsə̀ oò sé, bít bə̀ sèd bə̀ gɔ̀g fɔ̀gúbə̀ aarə bírə́ gbə̀sú sé, sínkɔ̀ nɛɛ̀n tɛ́mú sé. Bít bə̀ díímì valú, yaà bə̀ ləə gààd tə́ kə̀ Krístù tá, zèd laa núnà zɔ̀ŋ kób.

⁵(Val kam bəraa nyɛ́d də, bə̀ díím bəd valú bə́ŋ̀ sé, zèd bəraa laa núnà zɔ̀ŋ kób də, dá taàn zé.) Aarə díímke val bəd bə̀ éèn də̀gə̀ də̀gə̀ bìá.

⁶Nɛ́b aa éèn bə̀ dá díìm valə́ rə, Vɛnɛ́b dá bə̀ nɛɛ̀n zígǹ yílú, bít bə̀ dá kuùm *gìdńná. Val iirúb aa dáà yaànà rə, ləə gààd boò yílú sɔ̀ŋ gá, bít bə̀ dá kuùm nɛ́b Vɛnɛ́b láŋsə́ bə̀ ma'ǹná, kə̀ Krístù bìá, bít bə̀ dá gààd ləə̀n kə̀ Krístù tá, zèd laa núnà zɔ̀ŋ kób.

⁷Zèd bəraa laa núnà zɔ̀ŋ kób də, taàì gə́, bìn bə̀ dá *Satan kíìn lɛ́'ǹ wúltígə́l bə̀ rú.

⁸Bít vúgì wərə̀ gə́, dáráàn nɛ́b bəd záàn lɛ́'ǹ yɛ́b gə́ kóólé ba; yɛ́b aarə, bə̀ dɛ̀d Gog kə̀ Magog. Dá bə̀ wáàl ɔ̀dba, bɔ̀b dá boò nə́' bùmá, bít bə̀ dá kuùm zùúm, kìínmbə̀ nyìŋsə́ bəraa nwuu gbà'á kàd bərə kíin.

⁹Ɛ̀m bə̀ sa' yɛ́b gə́ kóólé, bít láŋ bə̀ páá Vɛnɛ́b nɛ́b gìdń bəd saŋə̀ tə́ŋú, kə̀ bìl aa Vɛnɛ́b í' rə tá. Zá laa vúgà lɛgú, bít lòd yaà bɛ́' bə̀ kíin kóólé.

¹⁰Bít Sámbàŋyɛ́rə̀, nɛ́ŋə̀ aa záá lɛ́l bà rə, bə̀ kò'ù, bít pà' dá bə̀ lɛ́'ù zɔ̀ŋ aa laa tə́ duùn bə kə̀ laa zəəm tə́ rə ba, zɔ̀ŋ aa éèn pà' bə̀ lɛ́'à gɔ̀g fɔ̀gúbə̀ kə̀ Vɛnɛ́b gbantumsə̀ gúsuúm bə̀ bəroó. Bə̀ dá bə̀ búúd í'ǹ wərà, tígə́l kə̀ nyàámbərə̀ tá, zèd kə̀ zèrá.

¹¹Bít mə́ bé' mə̀ə̀d gbà'á biídoá, bít nɛ́ŋə̀ nə́ŋ̀ kùm bə wərà. Yɛ́b kə̀ lɛg tá, nùù bə̀ bɔ̀b kúnú, bə̀ dàà kpə̀ŋsə̀ bə sé.

¹²Bít mə́ bé' val bərá, nɛ́b gbàád kə̀ yɛb bɛ̀ŋ́sə̀ bəd tá, bə̀ dìì mə̀ə̀d númú, bít núúboòd bəd wərà, bə̀ ləə wə̀ə́lá. Núúboòd ɔ̀d wərà, ləə wə̀ə́lá. Núúboòd aarə, kùmsə̀n núúboòd gɔ̀ŋsə́ bìá, bít bə̀ fág val bəd kə̀ nɛɛ̀n aa bə̀ mà' tù' boò bəd dú rə kíin, kə̀ nɛɛ̀n aa bə̀ bád núúboòd bərú rə kíin.

¹³Bít nwuu gbà'á bí'à val bəraa oò rú rə yàá. Val kə̀ zɔ̀ŋ bəraa val bəd ləə bərə tá, bə̀ bí'à val bəraa boò rú rəì kɔ̀. Bít kóó nɛ́ɛ̀réè, bə̀ fágə̀ kə̀ nɛɛ̀n aa mà' tù' oò rú rə kíin.

¹⁴Kàanyée gə́, val kə̀ zɔ̀ŋ bəraa val bəd ləə bərə tá, làà bə̀ lɛ́l bə̀ zɔ̀ŋ aa laa tə́ duùn bərə ba (zɔ̀ŋ aa laa tə́ duùn bərə, kùmsə̀n val iirúbá).

¹⁵Bít nɛ́ŋə̀ aa bə̀ bád nə́gə́l oò núúboòd gɔ̀ŋsə́ bə̀ aa rú síndə, làà bə̀ lɛ́'ù zɔ̀ŋ aa laa tə́ duùn bə kə̀ laa zəəm tə́ rə ba.