Read Samba Leko Kedké Yohana Núù bìá 21 Bible Online

Kedké Yohana Núù bìá 21 - Samba Leko bible

Kedké Yohana Núù bìá 21

¹Bít mə́ bé' lɛg puuá kə̀ yɛ́b puuá, kàandə, lɛg éèn də̀gə̀ də̀gə̀ bə̀ kə̀ yɛ́b éèn də̀gə̀ də̀gə̀ bə̀ tá, bɔ̀b bə̀ dùg yàá, bít nwuu gbà'á kɔ̀ kùm sɔ̀ŋ sé.

²Bít mə́ bé' bìl gìdń doó, Urusalima puu aa símà lɛgə́ paà, Vɛnɛ́b tùmà roó. Kùd bɛ́'à si' yàá, kìínmbə̀ kéèn wèéd kíin, kùd sɔ̀ɔ̀n si' oò yàá, bɔ̀b dáàn sáŋ̀mbə̀ kə̀ váàn oòra.

³Bít mə́ kìì pə̀gə̀lib nwɔŋ nwùùkè vúgà mə̀ə̀d ba, bàà: «Ìì ɛ̀ga, *Vɛnɛ́b dìí yaà kùm tə́ nɛ́b bəd tə́ŋú, Vɛnɛ́b dá ləə̀n kə̀ boò tá, bít boò kɔ̀ bə̀ dá kuùm nɛ́b oò bərá. Vɛnɛ́b kə̀ yíl oò bìá, dá kuùm kə̀ boò tá, bít dá kuùm Vɛnɛ́b boò ra.

⁴Bít dá bə̀ nyím wəl kíìn tədǹ núùrú kóólé, bít val kùm sɔ̀ŋ gá, val kpəə̀nmbə̀ kùm sɔ̀ŋ gá, bít nwɔŋ daàlǹmbə̀ kùm sɔ̀ŋ gá, nwuukè kùm sɔ̀ŋ gá. Kàandə, in doo bəd gə́ kóólé, bə̀ dákíìn bɔ̀bm̀ dugàá.»

⁵Bít màn aa kùm mə̀ə̀d bərə, bàà: «Ìì ɛ̀ga, mə́ mà' in bərì kóólé puuá.» Bít bàà mə́: «M̀ bád in aa yóo, kàandə, nwɔŋ mə́ bəd tə́ vɛ́nà, bít bə̀ də́ŋì tɛ́m zígǹmbə̀ ba.»

⁶Bít bàà mə́: «In aarə, ma'míìn bɛ́d yàá! Máára mə́ kùmsə̀n *Alfa, bít mə́ kùmsə̀n *Omega; sɔ̀dkeá kə̀ bɛ́dkeá. Màn aa wəl súd nwu'ù rə, máù wəl aa vúgà wəl yíl bərə piìn tɛdńní. Aarə wəl aa tə́ gɔ̀ŋsə́ piìn doó.

⁷Kóó nɛ́ɛ̀réè, nə́' kànì gə́, máù in tɛdńní bə̀ bəraa rə kíìn piinàá. Máá kuùm Vɛnɛ́b oòra, bít dá kuùm Wàà mə́ra.

⁸Zá nɛ́b yɛɛlsɛ́l bə̀ bərá, kə̀ nɛ́b aa kə̀ tɛ́mbagké naà síndoó, nɛ́b aa yi' invaksə́ rú roó, kə̀ nɛ́b yíl bə̀ lodǹ bərá, kə̀ nɛ́b labsə̀ bə̀ ma'ǹ bərá, kə̀ nɛ́b gan bə̀ ma'ǹ bərá, bít kə̀ nɛ́b vɔɔm bə̀ pɔ̀bm̀ bərá, bít nɛ́b gúsuúm bə̀ bəd gə́ kóólé, bə̀ dá bə̀ ráàn lɛ́ɛ̀l zɔ̀ŋ aa laa tə́ duùn bə kə̀ laa zəəm tə́ rə ba; aarə kùmsə̀n val iirúbá.»

⁹Bít *malaika nə́ŋ̀ ɛ̀m yaà máá sunú; oòra kùmsə̀n nɛ́ŋə̀ nə́ŋ̀ malaika bəraa nə́ŋsínà, bə̀ kò' bəd dəgə̀ bəraa búúd nwuukè bəd nyìì rú nə́ŋsínà, nɛɛ̀n tɛ́mú rə tə́ŋú. Zɔ̀ŋ aa ɛ̀m yaà wə́ə́ gə́, bàà mə́: «Ǹ yaà kúnú, máà ì' n wàà kéèn wèéd doó, Bɛ̀rə̀wà kéèn doó.»

¹⁰Bít Nwul Gìdń símà máá yílú, bít malaika rə, pà' àà mə́ kɔ̀l bùúd gbà'á yílú. Bít dáá ì' mə́ Urusalima bìl gìdń doó, símà lɛgə́ poú, Vɛnɛ́b sunú.

¹¹Bìl aarə, bììd sáá kə̀ kaŋsɛ́l laa nyɛdkè Vɛnɛ́b bìá. Nyɛd lúŋ bəŋ pɛ̀sə́ bìá, ìb sáá bììd kìínmbə̀ mádúbé kíin.

¹²Bìl lə, wə̀ə̀ bə̀ kaàl kə̀ mawol kìmkèá, bít bùúrá. Bìl lə, bə̀ zíg waàl kób zè iira, bít malaika bəd kób zè iira, bə̀ nwán sə̀n waàl bəd doó. Waàl bəraa rə, bə̀ bád Israila kun bəraa kób zè iirə rə, nə́gə́l boò bəd bə wərà.

¹³Waàl bəd toora, bìl kàd aa nyàm gɔ̀' bəroó, bít waàl toora, bìl kàd aa kál bərə ba. Waàl toora, bìl kàd aa bíd pɛ́rə̀ gúu rə ba, bít waàl toora, bìl kàd nə́ŋ̀ ɔ̀d aa nyàm pìì bərə ba.

¹⁴Mawol aa bə̀ wə' bìlə́ wərə̀ rə, bə̀ wə̀ə̀ bəŋ kób zè iirə yílú, bít bəŋ bəraa rə ba, bə̀ bád Bɛ̀rə̀wà gbantumsə̀ bəraa kób zè iirə rə, nə́gə́l boò bəd bə wərà.

¹⁵*Malaika aa tə́ mə́ nwɔŋ baàn də, kò' gbà' bəŋzɔ' bə̀ naú, in bə̀ də́'ǹná. Tə́ ɛɛ̀m bìl lə dáàn də́'ǹmbìá, kə̀ bìl waàl tá, kə̀ bìl lə mawol tá.

¹⁶Bìl lə, kàd bəraa naarə rə kóólé də́ŋ nə́ŋ̀ní' buudsɛ́l kə̀ yáádke oò tá, bə̀ də́ŋ nə́ŋ̀ní. Də́' kə̀ gbà' oò roó, buudsɛ́l oòrə, mà'ì kílomɛ́tà laa núnà zɔ̀ŋ laanə́ŋ̀ kə̀ laa núnà zɔ̀ŋ iira. Yádke oò roó, buudsɛ́l lɛgə́ paà bìá, kə̀ buudsɛ́l yɛ́b bə bə̀ tá, bə̀ də́ŋ nə́ŋ̀ní.

¹⁷Bít Malaika yaà də́' buudsɛ́l mawol bìá, bɔ̀b mɛ́tà laa toora zè núnà. In aa də́' kə̀ kùrú rə, in aa nɛ́b bəd də́' bə̀ sáá kə̀ in doó.

¹⁸Mawol aarə, bə̀ wə̀ə̀ù kə̀ bəŋ aa bə̀ dɛ̀d yaspa roó. Bít bìl gə́, bə̀ wə̀ə̀ù kə̀ bəŋzɔ' sáákeá, kìínmbə̀ mádúbé kíin.

¹⁹Mawol bèl lə, bə̀ mà'ù gàbsə́ kə̀ bəŋ pɛ̀sə́ bə̀ luùm bəd gɔ̀ŋ gɔ̀ŋ. Bəŋ éèn də̀gə̀ də̀gə̀ bə̀ aa bə̀ wə̀ə̀ mawol bərə, bə̀ dɛ̀d yaspa, bəŋ iirúb də kɔ̀ bə̀ dɛ̀d safira, toorúb də bə̀ dɛ̀d *agate, naarúb də *imirade,

²⁰núnə̀ rə bə̀ dɛ̀d onikis, nɔ̀ŋgɔ̀s də sardis, nə́ŋsínà rə kirisoliti, dàgwà oòrə, beryl wəlá, dàànə́ŋ̀ní rə topas, kób də kirisoparasu, kób zè nə́ŋ̀ də bəŋ lipilaze, bít kób zè iirə oòrə, bə̀ dɛ̀d amitistu.

²¹Bít wúl waàl bəraa kób zè iirə rə, bə̀ kùmsə̀n síbə́ bəŋ kób zè iira. Waàl déè gə́ kóólé, kò' síbə́ bəŋ nə́ŋ̀. Bít kpaŋ̀ bìlú bə̀ rə, bə̀ pùg kə̀ bəŋzɔ' sáákeá, kìínmbə̀ mádúbé kíin.

²²Zá Vɛnɛ́b láŋsə́ wúl gə́, mə́ bé' bìlú wərə̀ sé, kàandə, láŋsə́ wúl oòrə, Báátììkpɛ̀ŋ Vɛnɛ́b Gbìntaŋ kpɛŋsɛ́l bìá, bít kə̀ Bɛ̀rə̀wàá.

²³Bìl aarə, ɔ̀d nyààmá, sínkɔ̀ sòòá, bɔ̀b boò nyɛ́' bəǹ kíin sé; kàandə, kaŋsɛ́l laa nyɛdkè Vɛnɛ́b bə̀ tə́ù sə̀n nyɛ́'nàá, bít lampə̀ oòrə Bɛ̀rə̀wàá.

²⁴Nɛ́b aa zɔ̀ŋə yɛ́b bərə, bə̀ dá ɛɛ̀m laa nyɛdkè oò aarə rú, bít gààd bəraa zɔ̀ŋə yɛ́b bərə, bə̀ dáà káŋke boò aànnà bìl aarə rú.

²⁵Bə̀ ke' waàl bəraa rə bə gá, sɛŋ gə́ kóólé, kàandə, tígə́l kùm zɔ̀ŋ aarə bə sɔ̀ŋ gá.

²⁶Bə̀ dáà kaŋsɛ́l aànnà kə̀ ləəkè nɛ́b aa zɔ̀ŋə yɛ́b bərə bə̀ tá, bìl aarə rú.

²⁷Bít in diíŋdo nə́ŋ̀má pìì bìlú wərə̀ gá, kóó nɛ́d invaksə́ bə̀ ma'ǹ nə́ŋ̀má kə̀ nɛ́b gúsuúm bə̀ tá, bə̀ pìì bìlú wərə̀ gá. Zá nɛ́b aa bə̀ bád bə̀ nə́gə́l boò Bɛ̀rə̀wà núúboòd gɔ̀ŋsə́ bə̀ rú rə ní, bə̀ dá sìní piinàá.