Read Samba Leko Kedké Yohana Núù bìá 22 Bible Online

Kedké Yohana Núù bìá 22 - Samba Leko bible

Kedké Yohana Núù bìá 22

¹Bít *malaika aarə yaà ì' mə́ nwuu gbà'á gɔ̀ŋsə́ bə̀ roó. Sáá kìínmbə̀ mádúbé kíin, gɛɛ̀n vúgà Vɛnɛ́b mə̀ə̀d ba, kə̀ Bɛ̀rə̀wà mə̀ə̀d ba.

²Gɛɛ̀n sím bàg kpaŋ̀ aa bìl tə́ŋə́ roó. Nwuu gbà'á kàd bəraa iirə rə kóólé, téé nyìì gɔ̀ŋsə́ bə̀ dìì wərà. Zèd gə́ kóólé, lɛ̀b yɛb gə̀b kób zè iira, sòò gə́ kóólé, lɛ̀b yɛb gə̀b nə́ŋ̀, bít yɛsə̀ oò bəd də kɔ̀ gantéá; gáŋ sáá nɛ́b aa zɔ̀ŋə yɛ́b bərə marú.

³Bít in nə́ŋ̀má Vɛnɛ́b nwɔŋyɛɛ̀l dá kò'ǹ bìlú wərə̀ sé. Vɛnɛ́b mə̀ə̀d, kə̀ Bɛ̀rə̀wà mə̀ə̀d tá, bə̀ dá kuùm bìlú wərà, bít nɛ́b tù' bə̀ ma'ǹ oò bəd bə̀ dáù kíìn káŋàá.

⁴Bə̀ dá núù oò kíìn bé'nàá, bít bə̀ dá nə́gə́l oò bádǹ boò gbə̀sú.

⁵Bít tígə́l kùm sɔ̀ŋ gá. Kàandə, Báátììkpɛ̀ŋ Vɛnɛ́b dá sə̀ní kuùm laa boò ra. Kàanyée gə́, nɛ́ŋə̀ nə́ŋ̀má mà' tù' kə̀ lampə̀, bít kə̀ nyàm laa sɔ̀ŋ gá.

⁶Bít *malaika bàà mə́: «Nwɔŋ bəraa yée tə́ vɛ́nà, bít bə̀ də́ŋì tɛ́m zígǹmbə̀ ba. Báátììkpɛ̀ŋ Vɛnɛ́b, nɛ́ŋə̀ aa piià *gbantumsə̀ oò bəd nwul lə, tùmà malaika oò, bɔ̀b oò bàà nɛ́b tù' bə̀ ma'ǹ oò bəd in aa dáà yaànà záàn yéroó.»

⁷Bít Yéésù bàà: «Ǹ zɛ̀ŋ túŋá, máà kíìn bídǹnà záàn yóo! Vɛnɛ́b oò zíg nɛ́b aa bə̀ tə́ nwɔŋ bəraa vúgə́là oò naà, bə̀ bád núúboòraa rú rə ko'ǹ də nɛɛ̀n yílú.»

⁸Máára, mə́ Yohana ra, mə́ kììà sə̀n nwɔŋ bəraa kə̀ túŋ mə́ra, bít mə́ bé'à sə̀n in bəraa kə̀ núù mə́ra. Bít zɔ̀ŋ aa mə́ kììà nwɔŋ bəraa kóólé, bít mə́ bé' in bəraa gə́, mə́ pí' kə̀ dunlígə̀rá, malaika aa ì' mə́ in bəraa rə númú, bɔbm̀ oò bə̀ káŋ̀mbìá.

⁹Zá bàà mə́: «Ǹ gú' yíl ń da, m̀ mà' in aarə sí! Máá kɔ̀ mə́ ɔ̀dnə́ŋ̀ ń tùsú bìá, ɔ̀dkudvɛɛ̀l ń, *Vɛnɛ́b gbantumsə̀ bəd ɔ̀dnə́ŋ̀ boò tùsú bìá, bít kə̀ nɛ́b ɔ̀d kam bəraa tə́ nwɔŋ bəraa núúboòraa rú rə ko'ǹ də tá. Ǹ káŋ máá sí, ǹ káŋ Vɛnɛ́bá!»

¹⁰Bít bàà mə́ sɔ̀ŋ: «Mə́' ǹ zíg nwɔŋ bəraa vúgà Vɛnɛ́b naà, bə̀ bád núúboòraa rú yée ámbə̀ ní sí. Kàandə, sɛŋ aa in bəraa dá ma'míìn bərə, wə́ə́ì kə́d ba.

¹¹Nɛ́ŋə̀ aa tə́ invaksə́ ma'ǹ də, oò dìì invaksə́ ní ma'ǹmbìá, bít nɛ́ŋə̀ aa tə́ in diíŋdo ma'ǹ də, oò dìì in diíŋdo ní ma'ǹmbìá; nɛ́ŋə̀ aa tə́ insɔ̀ɔ̀n ma'ǹ də, oò gə́, oò dìì insɔ̀ɔ̀n oòrə ní ma'ǹmbìá, bít nɛ́ŋə̀ aa tə́ gìdń də, oò dìì kuùmbə̀ *gìdńná.»

¹²Bít Yéésù bàà: «Ìì zɛ̀ŋ túŋá, máà kíìn yaanàá záàn yóo! Máà ɛɛ̀mmà kə̀ in aa máá bə̀ kə̀ mú'sɛ̀l dùm boò káàn də naú. Kóó nɛ́ɛ̀réè, máù káàn kə̀ nɛɛ̀n aa mà' tù' rú rə kíin.

¹³Máára mə́ kùmsə̀n *Alfa, bít mə́ kùmsə̀n *Omega, nɛ́ŋə̀ aa ké' kpaŋ̀ doó, bít nɛ́ŋə̀ aa lè' tɔ̀l loó; sɔ̀dkeá kə̀ bɛ́dkeá.»

¹⁴Vɛnɛ́b dá nɛ́b aa bə̀ sùg dàál boò bəd, bɔbm̀ líìnmbə̀ téé gɔ̀ŋsə́ bə̀ wàá, bít piìnmbə̀ waàl bìlú bə̀ aarə rú rə nɛɛ̀n zígǹ yílú.

¹⁵Zá aa bəraa bìl bòórú rə gə́, yagəd bərá, dəə̀d bərá, nɛ́b invaksə́ bə̀ ma'ǹ bərá, nɛ́b yíl bə̀ lodǹ bərá, nɛ́b vɔɔm bə̀ pɔ̀bm̀ bərá, bít kə̀ nɛ́b bəraa bə̀ tə́ gúsuúm gáàm nwɔŋ gámke boò rú, kə̀ in aa bə̀ tə́ ma'ǹ də rú rə gə́ kóólé roó!

¹⁶Yéésù bàà: «Máára mə́ Yéésù ra, mə́ tùmà *malaika mə́ aí sunú, kə̀ nwɔŋ aa yée naú, bɔ̀b ìì pii *Eklisiya bərá. Máára mə́ sə̀n nɛ́d yíl bə̀ Dauda kunú, bít mə́ kùmsə̀n wàà kàá oòra; bít máára mə́ kùmsə̀n dùdùwà nyɛdkè nwúun bə bìá.»

¹⁷Nwul Gìdń kə̀ kéèn wèéd tá, bə̀ bàà: «Ǹ yaà kúnú!» Màn aa kìì nwɔŋ aarə, oò kɔ̀ oò bàà: «Ǹ yaà kúnú!» Màn aa wəlsúud nwu'ù rə, oò yaà kúnú; màn aa í' wəl gɔ̀ŋsə́ bə̀ rə, yaà oò kè' kíìn tɛdńní.

¹⁸Máára mə́ Yohana ra, mə́ tə́ ii kíìn tɔ̀gàá, íí kóólé; nɛ́b aa íí tə́ nwɔŋ bəraa vúgà Vɛnɛ́b naà, núúboòrú yée kiìn doó. Nɛ́ŋə̀ nə́ŋ̀ zəg in nə́ŋ̀ì rú wərə̀ gə́, Vɛnɛ́b kɔ̀ dáù búúd nwuukè luùm bəraa bád núúboòraa rú rə zəgàá.

¹⁹Bít nɛ́ŋə̀ nə́ŋ̀ vəd nyɛ́d nwɔŋ bəraa zɔ̀ŋə núúboòrú, vúgà Vɛnɛ́b naà rəì gə́, Vɛnɛ́b və̀d dáù téé nyìì gɔ̀ŋsə́ bə̀ aarə gú' oò bə̀ nyɛ́dǹ kɔ̀, bít kə̀ bìl gìdń tá, kə̀ nɛɛ̀n aa bə̀ bád dú, núúboòrú wərə̀ rə kíin.

²⁰Bít bə́ŋyée, màn aa tə́ nwɔŋ bəraa gáàm kóólé rə, bàà: «Èè, mə́ tóò yaanà záàn yóo!» Bít kè' mə́ ííù: «Èè, oò kùm kàani! Ǹ yaà kúnú, Báátììkpɛ̀ŋ Yéésù!»

²¹Mə́ nyɛ̀m pə̀dkè Báátììkpɛ̀ŋ Yéésù bə̀ oò kùm kə̀ aí tá, íí kóólé. Oò kùm kàani.