Read Samba Leko Kedké Yohana Núù bìá 3 Bible Online

Kedké Yohana Núù bìá 3 - Samba Leko bible

Kedké Yohana Núù bìá 3

¹«Bád m̀ pii núúboòraa yée, *Eklisiya aa Sardes bìlə́ rə *malaika. «Nɛ́ŋə̀ aa kə̀ Vɛnɛ́b nwul naà nə́ŋsínà, bít kə̀ dùdù yɛb naà nə́ŋsínà rə, gám nwɔŋ kə̀ aakíin' Mə́ gàb tù' bəraa ń tə́ ma'ǹ də yàá. Nɛ́b bəd kóólé bàà gə́, ń tə́ kə̀ gɔ̀ŋsá, zá vɛ́nà gə́, val kò' n yàá!

²Ǹ lɛ́m kúnú! Ǹ kpɛ́ŋ in kam bəraa nyɛ́d, bít bə̀ tə́ kpaŋ́ vaàl bə̀ roó. Kàandə, mə́ bé' ń ləə Vɛnɛ́b sɔ̀ɔ̀nkè sé.

³Sèl ǹ zá' in aa ḿ bɔ̀bà, bít ń kììà roó. Ǹ ləə nwɔŋ aarə kúnú, bít ǹ sɔ̀g kúnú! Ń lɛ́m síngə́, máà yaànà ám sə̀n kə̀ lííro kíin. Bít ń gàb sɛŋ aa máà yaànà bərə gá.

⁴Zá nɛ́b kam aí tə́ŋú, Sardes bìlú, bə̀ díŋ gɔ̀' boò bəd sé. Boò gə́, bə̀ dá ɛɛ̀m kə̀ máá tá, bə̀ dá gɔ̀' biíd páánàá. Kàandə, bə̀ də́ŋì gɔ̀saa rə páànmbìá.

⁵Nɛ́ŋə̀ aa nə́' kàn də, dá gɔ̀' biíd páàn kə̀ boò kíin, bít mə́ yɛ̀l nə́gə́l oò núúboòd gɔ̀ŋsə́ bə̀ rú gá sə́g sə́g. Bàà máá nyɛ́'ǹ Báá mə́ númú, bít kə̀ Báá mə́ *malaika bəd númú, oòrə nɛ́ŋə̀ mə́ra.

⁶«Nɛ́ŋə̀ aa tə́ kə̀ túŋ naà rə, oò kìì kíìn sɔ̀ɔ̀nkè, nwɔŋ aa Nwul Gìdń tə́ *Eklisiya bəd baàn doó.»

⁷«Bád m̀ pii núúboòraa yée, *Eklisiya aa Filadelfiya bìlə́ rə *malaika. Nɛ́ŋə̀ aa tə́ *Gìdńná, ‹Nɛ́ŋə̀ aa Nɛ́ŋə̀ Vɛ́nà bìá, Nɛ́ŋə̀ aa kə̀ kɔ̀msə̀wà waàl bə̀ kedǹ Dauda bə̀ naú, Nɛ́ŋə̀ aa kèd waàl ləì gə́, nɛ́ŋə̀ nə́ŋ̀má bán ke'ǹmbə̀ gá, bít ke'ì gə́, nɛ́ŋə̀ nə́ŋ̀má bán kedǹmbə̀ gá rə, gám nwɔŋ kə̀ aakíin'›

⁸Mə́ gàb tù' bəraa ń tə́ ma'ǹ də yàá. Ǹ ɛ̀ga, mə́ kèd waàl nə́ŋ̀ tə́ ám númú. Waàl aarə, nɛ́ŋə̀ nə́ŋ̀má bán ke'ǹmbə̀ gá. Mə́ gàb yàá, kpɛŋsɛ́l ń ká' sé, zá kàandə má, ń ləə nwɔŋ mə́ bəd yàá, bít məə ń dàà mə́ sé.

⁹Ǹ ɛ̀ga, *Yahudu bəd wúlwáàlbə̀ nə́ŋ̀ tə́ zɔ̀ŋə, *Satan bìá. Nɛ́b aa yaà *Yahudu bəd wúlwáàlbə̀ aarə rú rə, bə̀ bàà gə́, bənə́ *Yahudu bərá, zá bə̀ nɛ́b gúsuúm bə̀ bərá. Vɛ́nà gə́, bə̀ Yahudu bəd gá. Ǹ ɛ̀ga, má bə̀ ma'ǹ, yaà bə̀ dá kuùm kə̀ dunlígə̀d ám dun dùú. Bə̀ dá taà gabàá, mə́ í' n yàá.

¹⁰Zá ń kò' insánke mə́, bɔ̀b tɛ́m sidké ń kàŋ oò dáá kə̀ númú yée gə́, máá kɔ̀ máan kíin nwánàá, sɛŋ aa gbò'kè dáà yaànà zɔ̀ŋə yɛ́b bəroó. Sɛŋ aarə bərə, də́' bə̀ dá nɛ́b bəraa zɔ̀ŋə yɛ́b bərə ɛgàá.

¹¹Máà kíìn yaànnà záàn zɔ̀gɔ̀. Kò' ǹ kùd nwɔŋ aa ń kììà rə kíìn sɔ̀ɔ̀nkè, bɔ̀b nɛ́ŋə̀ nə́ŋ̀má nyá' oò kè' mə̀ə̀lə̀ ń sí.

¹²Nɛ́ŋə̀ aa nə́' kàn də, mááù ma'ǹ, dá kuùm Vɛnɛ́b mə́ láŋsə́ wúl téé váàná, bít zá' dàà zɔ̀ŋ aarə bə gá sə́g sə́g. Bít má Vɛnɛ́b mə́ nə́gə́l bádǹ oò sisú, kə̀ Vɛnɛ́b bìl gbà'á nə́gə́l tá. Bìl gbà'á aarə kùmsə̀n Urusalima puu aa Vɛnɛ́b tùm dáà piinnà, dáà vúgǹnà lɛgə́ paà roó. Bít máá nə́gə́l puu mə́ bádǹ oò sisə́ kɔ̀.

¹³«Nɛ́ŋə̀ aa tə́ kə̀ túŋ naà rə, oò kìì kíìn sɔ̀ɔ̀nkè, nwɔŋ aa Nwul Gìdń tə́ *Eklisiya bəd baàn doó.»

¹⁴«Bád m̀ pii núúboòraa yée, *Eklisiya aa Laodikiya bìlə́ rə *malaika. «Nɛ́ŋə̀ aa bə̀ dɛ̀rə̀ Amen doó, nɛ́ŋə̀ aa sedako sɔ̀ɔ̀ná bít sedako vɛ́nà bə̀ roó, nɛ́ŋə̀ aa in bəraa Vɛnɛ́b séé rə kóólé, vúgà oò naà rə, gám nwɔŋ kə̀ aakíin'

¹⁵Mə́ gàb tù' ń bəd yàá. Ń tɛb sé, ń pìb sé. Mə́ í' ǹ kùm tɛbkèá, sínkɔ̀ pìbkèá.

¹⁶Zá ń tə́ tə́ŋtəŋú, ń pìb sé, ń tɛb sín yée gə́, óó máan kíìn lɛ́'nàá.

¹⁷Ḿ bàà gə́, bəǹ nɛ́d yàám bìá. Ń sèl gə́, ḿ bəǹ bíl nɛ́d gbaŋə̀ bə̀ yàá, bít bəǹ í' in nə́ŋ̀má sé. Zá gabmbə̀ vɛ́nà gə́, ń kə̀ in nə́ŋ̀má naà síndə, ń gàb sé. Ń mà' nɛ́ŋə̀ búúd tə́ kúnú, ń nɛ́d búúd bìá, ń nyəərá, bít ń tə́ záání.

¹⁸Kə̀ taàbìá, mə́ tə́ən taà baanàá, ǹ lɛ́b bəŋzɔ' aa bə̀ dɔ̀' laarú rə máá naú, bɔ̀b ń dá kuùm nɛ́d gbaŋə̀ bìá. Ǹ lɛ́b gɔ̀' biíd bəd máá naú, bɔbm̀ kágǹmbə̀ si' záá ń aa tə́ən sə́ə́mnúù daàn yéroó. Bít ǹ lɛ́b núùwà ganté máá naú, bɔbm̀ núù ń bé'ǹmbə̀ sɔ̀ɔ̀nkè.

¹⁹Máá gə́, nɛ́b aa mə́ í' rə gə́ kóólé, mə́ ál bə̀ kúnú, bít mə́ í' bə̀ búúrá. Ogə́, m̀ pɛ́n inselké ḿ bərá, bít lɛ́' ǹ dàà invaksə́ ḿ bərá.

²⁰Ǹ ɛ̀ga, mə́ dìì tə́ wúlwaàl ba, mə́ tə́ waàl tɔmàá. Dáà nɛ́ŋə̀ nə́ŋ̀ kìì pə̀gə̀lib nwɔŋ mə́ yàá, bít kèd mə́ waàlì gə́, máá piìn oò kàrú, máá in líìn kə̀ oò tá, bít oò kɔ̀ dá in líìn kə̀ máá tá.

²¹Màn aa nə́' kànì rə, yaà dá kuùm kə̀ máá tá, gààd mə̀ə̀d mə́ ba, kìínmbə̀ máá kɔ̀, nə́' mə́ kàn, bít dá mə́ kùm kə̀ Báá mə́ tə́ oò gààd mə̀ə̀d bərə kíin.

²²«Nɛ́ŋə̀ aa tə́ kə̀ túŋ naà rə, oò kìì kíìn sɔ̀ɔ̀nkè, nwɔŋ aa Nwul Gìdń tə́ *Eklisiya bəd baàn doó.»