Read Samba Leko Kedké Yohana Núù bìá 4 Bible Online

Kedké Yohana Núù bìá 4 - Samba Leko bible

Kedké Yohana Núù bìá 4

¹In bəraa taà gə́, mə́ bé' waàl nə́ŋ̀ ked lɛgə́ poú, bít mə́ kìì pə̀gə̀lib nwɔŋ luùm nə́ŋ̀ní kə̀ aa éèn sɔ̀d mə́ kìì rə kíin. Pə̀gə̀lib nwɔŋ aarə, wùù sə̀n kə̀ yaa gà' kíin. Pə̀gə̀lib nwɔŋ aarə bàà: «Ǹ na'à zɔ̀ŋə, bít máan in aa dáà yaànà númú rə i'nàá.»

²Kə̀ nwɔŋ aa nuù yée kíinní, Nwul Gìdń kò' mə́ yàá. Bít ìì ɛ̀gà, mə́ bé' gààd mə̀ə̀d nə́ŋ̀ lɛgə́ poú, bít nɛ́ŋə̀ nə́ŋ̀ kùm mə̀ə̀d aarə bə̀ wərà.

³Nɛ́ŋə̀ aarə, gbə̀sə́ə̀n oò sáá nyɛd kìínmbə̀ bəŋ pɛ̀sə́ bə̀ aa bə̀ dɛ̀d *yaspa rə kíin, bít kə̀ bəŋ pɛ̀sə́ bə̀ aa bə̀ dɛ̀d sardis də kíin. Mə̀ə̀d də, kɔ̀mtágsaad láŋ páù tə́ŋú, nyɛd kìínmbə̀ bəŋ pɛ̀sə́ bə̀ aa bə̀ dɛ̀d *imirade rə kíin.

⁴Mə̀ə̀d kambəd laa nə́ŋ̀ zè naara, láŋ bə̀ páá mə̀ə̀d aarə tə́ŋú. *Dam bəd laa nə́ŋ̀ zè naara, bə̀ kùm mə̀ə̀d bəraa rə yílú. Bə̀ pál gɔ̀' biíd bəd sisú, bít bə̀ pál bəd *mə̀lə̀ yílú. *Mə̀lə̀ bəraa rə, bə̀ kùd bə̀ kə̀ bəŋzɔsá.

⁵Yɛ́bsə̀ bəd ib vúgə́là mə̀ə̀d bə wərà; nwan dùm kúnú, yɛ́bsə̀ bəd pél wərə̀ kɔ̀. Lampə̀ bəd númú wərə̀ nə́ŋsínà, bə̀ nyɛd taà wərə̀ kɔ̀. Lampə̀ bəraa nə́ŋsínə̀ rə, bə̀ kùmsə̀n Vɛnɛ́b nwul bəraa nə́ŋsínà roó.

⁶Bít in nə́ŋ̀ mə̀ə̀d númə́ wərà, kìínmbə̀ wəl nyìgə̀l gbà'á nyɛdkè kíin, nyɛd kìínmbə̀ mádúbé kíin. Ingalə̀ bəd naara, láŋ bə̀ páá gààd mə̀ə̀d də tə́ŋú. Ingalə̀ bəraa rə, bə̀ kə̀ núù naà bòórə́ kə̀ númú tá.

⁷Ingalə̀ aa éèn sɔ̀d númə́ rə, lúŋ gbàál nyìgá, bít ingalə̀ aa zəg də kɔ̀, lúŋ nààváàn wàá, toorúb də, gbə̀' oò lúŋ nɛ́ŋə̀ bìá, bít naarúb də, oò gə́ lúŋ laalaàn aa tə́ zá'ǹ lɛgə́ paà roó.

⁸Bít ingalə̀ bəraa boò naarə kóólé, déè gə́ kóólé, kə̀ bɛgə̀l naà nɔ̀ngɔ̀s. Si' boò bəd gə́, pug kə̀ núù bərá, pɛŋú, kə̀ bàgə̀l dùú. Bə̀ dìì náb bəd ní naànmbìá, tígə́lú kə̀ nyàámbərə̀ tá, nàà bə̀ bàà: «Báátììkpɛ̀ŋ Vɛnɛ́b gbìntaŋ kpɛŋsɛ́l bə̀ tə́ *Gìdńná, tə́ *Gìdńná, tə́ *Gìdńná. Oòra kùmà sə̀n nyàamdoorú, kùmsə̀n bə́ŋyóo, bít dáà sə̀n yaanàá.»

⁹Ingalə̀ bəraa naarə rə, bə̀ pii nɛ́ŋə̀ aa kùm mə̀ə̀d bərə káŋkeá, ləəkèá, kə̀ mɔ̀'keá. Oòrə, nɛ́ŋə̀ aa kə̀ gɔ̀ŋsə́ zèd kə̀ zèd doó.

¹⁰Bít màìgə́, ingalə̀ bəraa rə bə̀ mà' ii kàangə́, *dam bəraa laa nə́ŋ̀ zè naarə rə, pí' bə̀ kùm kə̀ dunlígə̀d bərá, nɛ́ŋə̀ aa kùm mə̀ə̀d ba, bít tə́ kə̀ gɔ̀ŋsə́ zèd kə̀ zèd də númú. Bə̀ káŋ̀ kúnú. Bə̀ nyààd gààd *mə̀lə̀ boò bəd də kúnú, bə̀ zúm mə̀ə̀d númú, bə̀ bàà:

¹¹«Báátììkpɛ̀ŋ bə́ ra, bít Vɛnɛ́b bə́ ra, ń də́ŋì káŋ̀mbìá, ləə̀nmbìá; bít kpɛŋsɛ́l tə́ ám naú. Kàandə, ń séé in gə́ kóólé, bít ámda ń í' sùnú, in bəd kùm taá, bít ḿ pii bə̀ taà gɔ̀ŋsá.»