Read Samba Leko Kedké Yohana Núù bìá 5 Bible Online

Kedké Yohana Núù bìá 5 - Samba Leko bible

Kedké Yohana Núù bìá 5

¹Bít mə́ bé' núúboòd kalké nə́ŋ̀, màn aa kùm mə̀ə̀d yílə́ rə nɛɛ̀n tɛ́mú. Kò' núúboòd kalké rə nɛɛ̀n váànú. Núúboòraa rə, bə̀ bárə̀ kàd iirə kóólé. Bə̀ ke'ù naú, bít bə̀ pè'ù kə̀ tampon zɔ̀ŋ nə́ŋsínà.

²Bítsɔ̀ŋ, mə́ bé' *malaika kpɛŋsɛ́l bə̀ nə́ŋ̀ dɛ̀d nwɔŋ lɛgú, bàà: «Nɛ́ɛ̀réè də́ŋ sə̀n tampon bəraa todǹmbìá, bít kedǹmbə̀ núúboòd kalké rə gú?»

³Kóó lɛgə́ poú, kóó yɛ́b ba, kóó yɛ́b dùú, bə̀ bɔ̀b nɛ́ŋə̀ nə́ŋ̀má núúboòraa keèdǹmbə̀, bít núù ɛgǹmbə̀ rú wərə̀ sé.

⁴Bít nɛ́ŋə̀ nə́ŋ̀má bə̀ bɔ̀b, də́ŋ núúboòd kalké rə keèdǹmbìá, bídǹ ɛgǹmbə̀ in aa bə̀ bád dú wərə̀ rə sé. Kə̀ taàbìá, mə́ kpə̀ə̀ taà kpə̀ə́ǹ gbàákù.

⁵Zá nɛ́ŋə̀ nə́ŋ̀ *dam bəd tə́ŋú, bàà mə́: «Ǹ kpə̀ə̀ sí. Ń ɛ̀g núùá, gbàál nyìg aarə, vúgà Yahudiya kunú. Oòrə, nɛ́d yíl bə̀ aa Dauda kunú roó. Oòra nə́' kànsə̀n in bəd kóólé. Dákíìn báàn tampon bəraa nə́ŋsínà rə todǹmbìá, bídǹ kedǹmbə̀ núúboòd kalké roó.»

⁶Kàanyée gə́, mə́ bé' Bɛ̀rə̀wà nə́ŋ̀ dìì lɛgú. Gààd mə̀ə̀rá, dam bərá, kə̀ ingalə̀ bəraa naarə rə tá, bə̀ pááù tə́ŋú. Mə́ bé' lúŋ kìínmbə̀ bə̀ lo'ùwì kíin. Bɛ̀rə̀wà aarə, kə̀ gà' bəd naà nə́ŋsínà yíləsú, kə̀ núù bəd naà nə́ŋsínà kɔ̀. Núù bəraa nə́ŋsínà kə̀ gà' bəraa nə́ŋsínà rə tá, ìì kùmsə̀n nwul bəraa nə́ŋsínà, Vɛnɛ́b tùm piià zɔ̀ŋə yɛ́b bə kóólé roó.

⁷Bɛ̀rə̀wà ɛ̀m gbarà màn aa kùm mə̀ə̀d bərə sunú, bít kè' núúboòd kalké aa oò nɛɛ̀n váànú roó.

⁸Zɔ̀ŋ aa kè' núúboòd kalké rə gə́, ingalə̀ bəraa naarə rə, kə̀ *dam bəraa laa nə́ŋ̀ zè naarə rə tá, pí' bə̀ kùm kə̀ dunlígə̀d Bɛ̀rə̀wà númú. Boò tə́ŋə́ rə, kóó nɛ́ɛ̀réè, kò' pààd nɛɛ̀n tɛ́mú, bít kò' dəgə̀ bəŋzɔ' bə̀ bəd naà kɔ̀. Dəgə̀ aarə, nyìì kə̀ téé kuùm sol bə̀ aa bə̀ dɛ̀d encens roó. Téé kuùm solbə̀ aarə, kùmsə̀n Vɛnɛ́b nɛ́b gìdń bəd nyɛmsɛ́l bərá.

⁹Bə̀ nàà náb puuá, bə̀ bàà rú wərə̀: «Ń də́ŋì núúboòd kalké pa'ǹmbìá, bít todǹmbə̀ tampon oò bəd doó; kàandə, bə̀ lo' n yàá, kìínmbə̀ sadaka kíin, bít kə̀ nyɛ̀lə́m ḿ aa roó, káá ń kè' taà nɛ́b kun luùm bəd gə́ kóólé, nɛ́b aa bə̀ gám nwɔŋ, nwɔŋ luùm gɔ̀ŋ gɔ̀ŋ bərú roó, nɛ́b bəd kóólé, bít kə̀ yɛ́b gə́ kóólé, bɔ̀b boò kùm Vɛnɛ́b bìá.

¹⁰Mà' ḿ bí' bə̀ boò kùm nɛ́b bəǹ gààrú bə̀ bərá, bít boò mà' Vɛnɛ́b bə́n tù' kə̀ *nɛ́b láŋsə́ bə̀ ma'ǹ bəd kíin. Bít bə̀ dá gààd ləə̀n zɔ̀ŋə yɛ́b ba.»

¹¹Mə́ ɛ̀g núù sɔ̀ŋ gə́, bít mə́ kìì *malaika bəd zùúm pə̀gə̀libá. Ká'ke boò rə, nɛ́ŋə̀ gád bɛ́' gá. Dìì láŋ bə̀ páá gààd mə̀ə̀d tə́ŋú, kə̀ ingalə̀ bəd tá, bít kə̀ *dam bəd tá.

¹²Bít bə̀ gám nwɔŋ lɛgú, bə̀ bàà: «Bɛ̀rə̀wà aa bə̀ lo' rə, də́ŋì váàndo bɔbm̀bìá, kə̀ gbaŋə̀ tá, kə̀ ingabké tá, kə̀ kpɛŋsɛ́l tá, kə̀ ləəkè tá, kə̀ kaŋsɛ́l tá, bít kə̀ káŋke tá.»

¹³Bítsɔ̀ŋ, mə́ kìì ingalə̀ bəraa lɛgə́ paà roó, aa bəraa yɛ́b bəroó, aa bəraa yɛ́b dùù roó, bít kə̀ aa bəraa wəl dùù rə tá; boò kóólé, bə̀ nàà nábá, bə̀ bàà: «Káŋkeá, ləəsɛ́lá, kaŋsɛ́l kə̀ kpɛŋsɛ́l tá, boò kùm nɛ́ŋə̀ aa kùm gààd mə̀ə̀d bərə naú, bít kə̀ Bɛ̀rə̀wà naú, zèd kə̀ zèrá.»

¹⁴Ingalə̀ bəraa naarə rə, bə̀ bàà: «Oò kùm kàani!» Bít *dam bəd də bə̀ kùm kə̀ dunlígə̀rá, gààd mə̀ə̀d númú, bít bə̀ káŋ Vɛnɛ́bá.