Read Samba Leko Kedké Yohana Núù bìá 6 Bible Online

Kedké Yohana Núù bìá 6 - Samba Leko bible

Kedké Yohana Núù bìá 6

¹Kàanyée gə́, mə́ bé' Bɛ̀rə̀wà tə́ tampon bəraa nə́ŋsínà rə, éèn də̀gə̀ də̀gə̀ bə̀ rə to'nàá. Bít mə́ kìì ingalə̀ bəraa naarə rə, nə́ŋ̀ tə́ baàn pə̀gə̀lib nwɔŋú, kə̀ yɛ́bsə̀ kíin: «Ǹ yaà kúnú!»

²Bít mə́ bé' yaa biírá. Nɛ́ŋə̀ aa na'ù yílə́ rə, kò' tabtéé nɛɛ̀n tɛ́mú, bít bə̀ piiù *mə̀lə̀ nə́ŋ̀ naú. Zá' ɛ̀m kìínmbə̀ nɛ́ŋə̀ aa nə́' kàn, bít nə́' dááráàn kaàn sɔ̀ŋ də kíin.

³Zɔ̀ŋ aa Bɛ̀rə̀wà tò' tampon iirúb də gə́, mə́ kìì ingalə̀ nə́ŋ̀ iirúb də kɔ̀ dɛ̀d nwɔŋá, bàà: «Ǹ yaà kúnú!»

⁴Kàanyée gə́, yaa yɛ̀ɛ́l nə́ŋ̀ vúgà sùnú. Bít nɛ́ŋə̀ aa na'ù rə, bə̀ piiùwà kpɛŋsɛ́l tɛbə̀ bə̀ nyá'ǹ ke'ǹ zɔ̀ŋə yɛ́b ba, bɔ̀b nɛ́b bəd boò lòd kə̀ ɔ̀dnə́ŋ̀ bəd boò bòdba. Bít bə̀ piiùwà yɛ́rə̀ bùúd gbà'á naú.

⁵Zɔ̀ŋ aa Bɛ̀rə̀wà tò' tampon toorúb də gə́, bít mə́ kìì ingalə̀ toorúb də dɛ̀d nwɔŋá, bàà: «Ǹ yaà kúnú!» Bít mə́ bé' yaa diíŋdoá. Nɛ́ŋə̀ aa na'ù yílə́ rə, kò' kílo in bə̀ də́'ǹ nɛɛ̀n tɛ́mú.

⁶Bít mə́ kìì in nə́ŋ̀ kə̀ pə̀gə̀lib nwɔŋ nə́ŋ̀ kíin, vúgà ingalə̀ bəraa naarə rə tə́ŋú, tə́ baàn: «Inlíìnmbə̀ aa bə̀ dɛ̀d blé rə, tasaù nə́ŋ̀, mú'sɛ̀l dùm tù' nyàm nə́ŋ̀ bìá; inlíìnmbə̀ aa bə̀ dɛ̀d orge rə, tasaù toora, mú'sɛ̀l dùm tù' nyàm nə́ŋ̀ bìá. Zá kílə́m kə̀ badn tə́ gə́, ǹ yɛ̀l sí.»

⁷Zɔ̀ŋ aa Bɛ̀rə̀wà tò' tampon naarúb də gə́, bít mə́ kìì ingalə̀ naarúb də, dɛ̀d nwɔŋá, bàà: «Ǹ yaà kúnú!»

⁸Bít mə́ bé' yaa nə́ŋ̀ ɔ̀d biíd pùgpùgá. Nɛ́ŋə̀ aa na'ù yílə́ rə, bə̀ dɛ̀rə̀ «valá.» Bít zɔ̀ŋ aa val bəd ləə bərə, bàgə̀ bòórú. Bít bə̀ pii bə̀ kpɛŋsɛ́l yɛ́b kàd bəraa naarə rə, nə́ŋ̀ yílú, bɔ̀b boò lòd nɛ́b aa wərə̀ rə kə̀ yɛ́rə̀ bùúrá, kə̀ gulùmá, kə̀ búúd nwuukèá, bít kə̀ ingalə̀ fɔ̀g dùù bə̀ bərá.

⁹Zɔ̀ŋ aa Bɛ̀rə̀wà tò' tampon núnə̀ rə gə́, mə́ bé' nɛ́b aa nyàam val kòd bə̀ rə, nyì' boò zɔ̀ŋ aa mà' bə̀ sáá sadaka bəd bəroó. Bə̀ lòd nɛ́b aarə, Vɛnɛ́b nwɔŋ aa bə̀ kè' rə bòórú, bít sedako aa bə̀ tə́ diìn ma'ǹmbə̀ nɛ́b bəd tə́ŋə́ rə bòórú.

¹⁰Bə̀ kpàm nwɔŋ kə̀ kpɛŋsɛ́lá, bə̀ bàà: «Báátììkpɛ̀ŋ Gbìntaŋá, Báátììkpɛ̀ŋ *Gìdńná, Báátììkpɛ̀ŋ vɛ́nà bìá, ń dá nwáàn dá wə́ə̀n nɛ́mbínì, ń dá taà nɛ́b zɔ̀ŋə yɛ́b bə bə̀ bəraa bə̀ lòd bə́ rə fágǹ, bít ń dá bə̀ taà búúd í'ǹ gú?»

¹¹Bít boò kóólé, bə̀ pii bə̀ gɔ̀' biíd bərá. Bə̀ bàà bə̀ kùm boò nwán sɛŋ zɔ̀gɔ̀ sɔ̀ŋ. Nɛ́b aa wál bə̀ tə́ tù' ma'ǹ ɔ̀d bəroó, kə̀ ɔ̀dkudvɛɛ̀l Krístù rú bə̀ bəd tá, bə̀ dá bə̀ lodǹ nɛɛ̀n aarə rú. Bə̀ bàà bə̀ boò nwán kúnú, lòd boò bɛ́' nɛ́b bəraa bə̀ dá bə̀ lodǹ də sína.

¹²Zɔ̀ŋ aa Bɛ̀rə̀wà tò' tampon nɔ̀ŋgɔ̀s oòrə gə́, yɛ́b wáá gbàákù; nyàm yaà kùm zé diíŋ gbílíg, kìínmbə̀ gɔ̀' val bə̀ gídǹ kíin, bít sòò kɔ̀ yaà kùm zé yɛ̀ɛ́l sɔ̀í, kìínmbə̀ nyɛ̀lə́m kíin.

¹³Dùdù yɛb aa lɛgə́ paà rə, pílà yɛ́b ba, kìínmbə̀ gààm yɛb visə̀ bəraa nwul kpɛŋsɛ́l bə̀ pɛ̀b tə́ lɛ́ɛ̀l lə kíin.

¹⁴Bít lɛg bɔ̀b kìínmbə̀ bə̀ tə́ núúboòd kalké kadǹ də kíin; bít kɔ̀l déè gə́ kóólé, kə̀ yɛ́b aa wəl tə́ŋə́ rə tá, gbad bə̀ dàà zɔ̀ŋ aa bə̀ kùm bəroó.

¹⁵Bít gààd gbàád bəraa zɔ̀ŋə yɛ́b bəroó, kə̀ nɛ́b gbàád yíl bə̀ bərá, kə̀ sóózè gààd bərá, kə̀ nɛ́b gbaŋə̀ bə̀ bərá, kə̀ nɛ́b kpɛŋsɛ́l bə̀ bərá, kɔ̀' bərá, nɛ́b kam bəraa nyɛ́d doó, sínkɔ̀ nɛ́b aa kɔ̀' síndoó, nùù dáá ìì mə́ə́d vɔ̀g libú, bít kə̀ bəŋ gbàád kɔ̀l yílə́ bə̀ bəd tə́ŋú.

¹⁶Bít ìì bàà kɔ̀l bəd kə̀ bəŋ gbàád bəd tá: «Ìì láá obə́ yílú, bít ìì kág bə́ kúnú, bɔ̀b nɛ́ŋə̀ aa kùmà mə̀ə̀d yílə́ yée, oò bé' bə́ sí, bít báà kùm zɔ̀ŋ bùúd kə̀ Bɛ̀rə̀wà nɔ̀má.

¹⁷Nyàm gbà'á aa Vɛnɛ́b kə̀ Bɛ̀rə̀wà tá, bə̀ dá nɔ̀m boò i'ǹ bə nɛ́b bəd yílə́ rə, yaà wə́ə́ yàá. Nɛ́ɛ̀réè dá sə̀n báàn Vɛnɛ́b nɔ̀m aarə sidǹmbə̀ nyàm aarə bə gú?»