Read Samba Leko Kedké Yohana Núù bìá 7 Bible Online

Kedké Yohana Núù bìá 7 - Samba Leko bible

Kedké Yohana Núù bìá 7

¹In bəraa taà gə́, mə́ bé' *malaika bəd naara, bə̀ dìì bəd yɛ́b kàd bəraa naara rə ba, bə̀ kò' nwul bəd nàà naara, bɔ̀b nwul nə́ŋ̀má oò pɛ̀b zɔ̀ŋə yɛ́b bə sí, nwuu gbà'á rú sí, bít téé nə́ŋ̀ bə sí kɔ̀.

²Bít mə́ bé' *malaika nə́ŋ̀ ɔ̀ɔ̀rá, vúgà nyàm go' ba; *malaika aarə, kò'à Vɛnɛ́b galə̀ tampon naú. Bít kpàm nwɔŋ dɛ̀d *malaika bəraa naarə roó. Aarə, *malaika bəraa Vɛnɛ́b pii bà kpɛŋsɛ́l, yaà boò yɛ̀l yɛ́b kə̀ nwuu gbà'á tə́ roó.

³Bàà bə̀: «Ìì yɛ̀l yɛ́b sí, nwuu gbà'á sí, ìì yɛ̀l téé bəd sí kɔ̀; yaà oò wə́ə́ sɛŋ aa báan tampon pe'ǹ nɛ́b aa tə́ bə́n Vɛnɛ́b tù' ma'ǹ də gbə̀sú rə bə zé.»

⁴Bít bə̀ bàà mə́ nɛ́b aa bə̀ bɔ̀b tampon gbə̀sú rə, nɛɛ̀n aa ká'sɛ́l boò kùm dú roó. Boò laa núnà zɔ̀ŋ kób zɔ̀ŋ laa núnà kə̀ laa núnà zɔ̀ŋ kób zɔ̀ŋ laa iira zè naara. Nɛ́b aa bə̀ bɔ̀b tampon yérə, bə̀ vúgə́là kun gɔ̀ŋ gɔ̀ŋ bəraa Israila rə rú.

⁵Yuda kunú gə́, nɛ́b bəd laa núnà zɔ̀ŋ kób zɔ̀ŋ kób zè iira, bə̀ bɔ̀b sə̀n tampon; nɛ́b bəd laa núnà zɔ̀ŋ kób zɔ̀ŋ kób zè iira, bə̀ vúgə́là Ruben kunú; nɛ́b bəd laa núnà zɔ̀ŋ kób zɔ̀ŋ kób zè iira, bə̀ vúgə́là Gad kunú;

⁶nɛ́b bəd laa núnà zɔ̀ŋ kób zɔ̀ŋ kób zè iira, bə̀ vúgə́là Aser kunú; nɛ́b bəd laa núnà zɔ̀ŋ kób zɔ̀ŋ kób zè iira, bə̀ vúgə́là Neftali kunú; nɛ́b bəd laa núnà zɔ̀ŋ kób zɔ̀ŋ kób zè iira, bə̀ vúgə́là Manasa kunú;

⁷nɛ́b bəd laa núnà zɔ̀ŋ kób zɔ̀ŋ kób zè iira, bə̀ vúgə́là Simeon kunú, nɛ́b bəd laa núnà zɔ̀ŋ kób zɔ̀ŋ kób zè iira, bə̀ vúgə́là Levi kunú; nɛ́b bəd laa núnà zɔ̀ŋ kób zɔ̀ŋ kób zè iira, bə̀ vúgə́là Isakar kunú;

⁸nɛ́b bəd laa núnà zɔ̀ŋ kób zɔ̀ŋ kób zè iira, bə̀ vúgə́là Zabulon kunú; nɛ́b bəd laa núnà zɔ̀ŋ kób zɔ̀ŋ kób zè iira, bə̀ vúgə́là Yusufu kunú; Benzamin kunú gə́, nɛ́b bəd laa núnà zɔ̀ŋ kób zɔ̀ŋ kób zè iira, bə̀ bɔ̀b sə̀n tampon.

⁹In bəraa taà gə́, mə́ ɛ̀g núù sɔ̀ŋ gə́, mə́ bé' nɛ́b zùúm bərá; nɛ́ŋə̀ nə́ŋ̀má bán nɛ́b aa bə̀ kùm wərə̀ rə gádǹ bɛ́'ǹmbə̀ gá. Nɛ́b aarə, bə̀ vúgə́là yɛ́b gə́ kóólé, nɛ́b kun luùm gɔ̀ŋ gɔ̀ŋ bərú, nɛ́b luùm gɔ̀ŋ gɔ̀ŋ bərá, bít bə̀ vúgə́là mɛ́ɛ́l nwɔŋ luùm gɔ̀ŋ gɔ̀ŋ bərú. Bə̀ kùm wərà, boò kóólé, mə̀ə̀d númú, bít kə̀ Bɛ̀rə̀wà númú. Boò kóólé, bə̀ pál dàál biíd bərá, bít boò kóólé, bə̀ kò' bəd gbùŋ yɛsə̀ bəd nɛɛ̀n tɛ́mú.

¹⁰Bə̀ pál kpə̀ə́ǹ kə̀ kpɛŋsɛ́lá, bə̀ bàà: «Súúke bə́n vúgà Vɛnɛ́b bə́n aa kùm mə̀ə̀d bə yée naú, bít kə̀ Bɛ̀rə̀wà naú.»

¹¹*Malaika bəd kóólé, láŋ bə̀ páá mə̀ə̀rá, *dam bərá, kə̀ ingalə̀ bəraa naarə rə tə́ŋú. Bít zá' pí' bə̀ wúb núù yɛ́b ba, mə̀ə̀d númú, bít bə̀ káŋ Vɛnɛ́bá.

¹²Bə̀ bàà: «Oò kùm kàani! Káŋkeá, kaŋsɛ́lá, ingabkéá, mɔ̀'keá, ləəkèá, kpɛŋsɛ́l gbà'á, bít kə̀ kpɛŋsɛ́l tù' bə̀ ma'ǹ tá, boò kùm Vɛnɛ́b bə́n naú, zèd kə̀ zèrá! Oò kùm kàani!»

¹³Bít nɛ́ŋə̀ nə́ŋ̀, dam bəd tə́ŋú, dɛ̀d mə́: «Nɛ́b aa bə̀ pálà dàál biíd bəd sisə́ rə, bə̀ nɛ́b déè gú? Bə̀ vúgə́là bínì gú?»

¹⁴Kè' mə́ í'ù: «Ámda ń gàb sùnú, Báátììkpə̀ŋá!» Bít bàà mə́: «Aarə, nɛ́b aa bə̀ vúgə́là búúd gbà'á rú roó. Bə̀ sùgà dàál boò bəd kə̀ Bɛ̀rə̀wà nyɛ̀lə́má, bə́ŋyée bə̀ nyɛd yàá, bə̀ bílì biírá.

¹⁵Kə̀ taàbìá, bə̀ tə́ taà diìn Vɛnɛ́b mə̀ə̀d númú, bít bə̀ tə́ù taà káŋ̀ tígə́l kə̀ nyàámbərə̀ tá, oò láŋsə́ wúuú. Nɛ́ŋə̀ aa kùm mə̀ə̀d bə yérə, dá bə̀ kágǹ oò dìí dùú.

¹⁶Gulùm nwuu bə̀ sɔ̀ŋ gá, wəlsúud kɔ̀ nwuu bə̀ sɔ̀ŋ gá. Nyàm laa dùù bə̀ sɔ̀ŋ gá, bít zɔ̀ŋ pìb bə̀ sɔ̀ŋ gá.

¹⁷Kàandə, Bɛ̀rə̀wà aa dìì mə̀ə̀d tə́ŋə́ yérə, dá kuùm yibə̀ boò ra. Dá bə̀ aàn wəl yíl gɔ̀ŋsə́ bə̀ ba. Bít Vɛnɛ́b dá bə̀ nyímwəl kíìn tədǹ núùrú kóólé.»