Read Samba Leko Kedké Yohana Núù bìá 8 Bible Online

Kedké Yohana Núù bìá 8 - Samba Leko bible

Kedké Yohana Núù bìá 8

¹Zɔ̀ŋ aa Bɛ̀rə̀wà tò' tampon nə́ŋsínà oòrə gə́, zɔ̀ŋ dìì lɛgə́ paà zé sə́ə́m, mà' kíìn minti laa nə́ŋ̀ zè kób.

²Bítsɔ̀ŋ, mə́ bé' *malaika bəraa nə́ŋsínà rə, bə̀ dìì Vɛnɛ́b númú. Bít bə̀ pii bə̀ yaa gà' nə́ŋsínà.

³Bít *malaika ɔ̀d nə́ŋ̀ yaà dìì *gannyàgə̀l kàd ba. Malaika aarə, kò' dəgə̀ aa bə̀ kùd kə̀ bəŋzɔ', dú' bə̀ sáá urdi rú rə naú. Malaika aarə, bə̀ piiù téé kuùm solbə̀ aa bə̀ dɛ̀d encens rə naà gbàákù, bɔ̀b oò pii kə̀ Vɛnɛ́b nɛ́b gìdń bəd nyɛmsɛ́l tá, *gannyàgə̀l aa bə̀ kùd kə̀ bəŋzɔ' rə rú, mə̀ə̀d númú.

⁴Bít téé kuùm solbə̀ aa bə̀ dɛ̀d encens tə́ duùn də, laayi oòrə, kə̀ Vɛnɛ́b nɛ́b gìdń bəd nyɛmsɛ́l tá, bə̀ vúgə́l *malaika nɛɛ̀n tɛ́mú, bə̀ ɛ̀m Vɛnɛ́b númú.

⁵Bít kàanyée gə́, *malaika pà' dəgə̀ aa dú' bə̀ sáá urdi rú roó, nyí'ù kə̀ laa gan nyàgə̀lə́ bìá, bít làà lɛ́' yɛ́b ba. Bít zɔ̀ŋ aarə ba, yɛ́bsə̀ pél kúnú, nwan dùm kúnú, yɛ́bsə̀ bəd ib kúnú, bít yɛ́b kɔ̀ wáá kúnú.

⁶Bít *malaika bəraa nə́ŋsínà, bə̀ kò' yaa gà' bəd naà rə, bə̀ kùrà si', bɔ̀b boò bə̀ yaàn ílǹmbìá.

⁷Bít malaika éèn də̀gə̀ də̀gə̀ bə̀ rə, íl yaa gà' gə́, gágə́rá, laá, bə̀ nyágə́l kə̀ nyɛ̀lə́m tá, bə̀ zarà yɛ́b ba. Bít yɛ́b aa pɛd zɔ̀ŋ toorə rə, nə́ŋ̀ duù yàá, bít téé bəraa pɛɛ̀l zɔ̀ŋ toorə rə, zɔ̀ŋ nə́ŋ̀ duù yàá, bít fɔ̀g bəə gə́ kóólé, duù yàá.

⁸Bít malaika iirúb də, íl yaa gà' oò bìá. In nə́ŋ̀ gbà'á kàani, kìínmbə̀ kɔ̀l kíin, laa tə́ duùn bə wərà, pà' bə̀ lɛ́'ù nwuu gbà'á rú. Nwuu gbà'á pɛɛ̀l kàd toora, bít kàd nə́ŋ̀ yaà bíl nyɛ̀lə́má.

⁹Bít ingalə̀ bəraa pɛɛ̀l gə̀b toorə, bə̀ ləə wələ́ rə, gə̀b nə́ŋ̀ vàd yàá, bít kə̀ə̀d bəraa pɛɛ̀l gə̀b toorə rə, gə̀b nə́ŋ̀ yɛɛ̀l dùg yàá.

¹⁰Bít *malaika toorúb də, íl yaa gà' oò bə̀ gə́, dùdùwà gbà'á nə́ŋ̀ lɔb píà lɛgə́ poú. Dùù kìínmbə̀ laa dùù tə́ núúd fɔ̀g bə kíin, yaà pí' wəl nwuu aa pɛd kàd toorə rə, kàd nə́ŋ ba, bít kə̀ wəl yíl bəd ba.

¹¹(Bít dùdùwà aarə, nə́gə́l oò nyáákeá). Wəl aa pɛd zɔ̀ŋ toorə rə, zɔ̀ŋ nə́ŋ̀ ba, bíl nyáákeá, bít nɛ́b zùúm bəd val kòd bə̀ wəl aa nyáá gbàákù yérə bòórú.

¹²Bít *malaika naarúb, íl yaa gà' oò bìá. Bít zɔ̀ŋ aa íl yaa gà' gə́, nyàm aa pɛd kàd toorə rə, kàd nə́ŋ̀ nyɛd sé; sòò aa pɛd kàd toorə rə, kàd nə́ŋ̀ bìd sé, kùm diíŋdoá, bít dùdù yɛb kàd nə́ŋ̀ kɔ̀ nyɛd sé, bə̀ bɔ̀' zɔ̀ŋ nyɛdkè boò yàá. Nyàámbərə̀ aa pɛ̀d kàd toorə rə, kàd nə́ŋ̀ nyɛd sé, bít nɛɛ̀n aarə rú ní sɔ̀ŋ, tígə́l aa pɛd kàd toorə rə, kàd nə́ŋ̀ nyɛd sé.

¹³Zɔ̀ŋ aa mə́ ɛ̀g núù sɔ̀ŋ gə́, bít mə́ bé' laalaàn nə́ŋ̀ zá' tə́ sə̀n taàn lɛgə́ poú, nwuulú, zɔ̀ŋ bùúd ba, tə́ baàn kə̀ pə̀gə̀lib nwɔŋ kpɛŋsɛ́l bìá: «Búúrá! Búúrá! Búúd dáà yaànà nɛ́b aa zɔ̀ŋə yɛ́b bərə yílú, sɛŋ aa *malaika kam bəraa nyɛ́d toorə rə, bə̀ dá yaa gà' boò íìl bəroó!»