Read Samba Leko Kedké Yohana Núù bìá 9 Bible Online

Kedké Yohana Núù bìá 9 - Samba Leko bible

Kedké Yohana Núù bìá 9

¹Bít *malaika núnə̀ oòrə, yaà íl yaà gà' oò bìá. Bít mə́ bé'à dùdùwà nə́ŋ̀ lɔbà lɛgə́ poú, yaà pí' yɛ́b ba. Bə̀ piiùwà kɔ̀msə̀wà nə́ŋ̀, yaà oò kèd kə̀ wauro aa *lɔ̀ŋ pí'ke gbà'á gú' bərə waàlá.

²Bít dùdùwà kèd wauro aa lɔ̀ŋ pí'ke gbà'á gú' bərə waàlá; bít laayi nə́ŋ̀ vúgà sùnú, lúŋ laa gbà'á aa bə̀ kɔ̀ŋ dɛ́l gbà'á rú roó. Bít laayisaa vúgà dɛ́ɛ́lú yérə bòórú, nyàm kə̀ nwul tá, bə̀ làà taà tígə́lá.

³Bít sii bəd vúgə́là laayisú wərà, yaà bə̀ sa' yɛ́b ba. Bə̀ pii bə̀ kpɛŋsɛ́l kìínmbə̀ mii bəd bə̀ kíin.

⁴Bít bə̀ bàà bə̀ boò mà' fɔ̀g bəə nə́ŋ̀má invaksə́ sí, téé nə́ŋ̀má invaksə́ sí, bít inluùm bəraa lad də kóólé invaksə́ sí. Zá invaksə́ rə, boò mà' nɛ́b aa bə̀ bɔ̀b Vɛnɛ́b tampon gbə̀sú síndə ní.

⁵Bə̀ pii sii bəd kpaŋ̀, nɛ́b bəd bə̀ lodǹ bɛ́'ǹmbə̀ sé. Zá bə̀ bàà bə̀ boò í' bə̀ búúd kàaní, sòò núnà. Nwuukè aa bə̀ tə́ bɔbm̀ kə̀ búúraa sii bəd bə̀ tə́ bə̀ í'ǹ də, kìínmbə̀ nɛɛ̀n aa mii tùd nɛ́ŋə̀ì gə́, nwuu rə kíin.

⁶Sòò bəraa núnə̀ yée rú, nɛ́b bəd bə̀ dá val saanàá, zá bə̀ bɔ̀b gá; bít bə̀ dá í'ǹ vaàlǹmbìá, zá val kò' bə̀ gá.

⁷Bít sii bəraa rə, lúŋ yaa bəraa bə̀ kùd si' ɛɛ̀mbə̀ bùmú roó, bít boò yíləsə́ rə, bə̀ páá in nə́ŋ̀ kìínmbə̀ *mə̀lə̀ bəŋzɔ' bə̀ bəd kíin, bít núù boò bəd də, lúŋ nɛ́ŋə̀ núùá.

⁸Bít yíl gí' boò bəd də, kìínmbə̀ nɛ́b kɛ́ɛ̀m bəd bə̀ kíin, bít nə́gə́l boò bəd kɔ̀, kìínmbə̀ gbàál nyìg bəd nə́gə́l kíin.

⁹Bít bə̀ pál in nə́ŋ̀ boò gíìlú, kìínmbə̀ dàál bùm bə̀ aa bə̀ kùd kə̀ ba' rə kíin. Bít bɛgə̀l boò rə, kpə̀ə̀ kìínmbə̀ mótà zùúm bəraa yaa bəd tə́ diŋ̀, nuùn ɛɛ̀mbə̀ kə̀ bùmú rə kíin.

¹⁰Bít bə̀ kə̀ díìm bəd naú, bə̀ kə̀ tɔ̀' bəd naú, kìínmbə̀ mii tɔ̀' kíin; bít díìm boò bəraa rə, pii bə̀ sə̀n kpɛŋsɛ́lá, bɔ̀b boò í' kə̀ nɛ́b bəd búúd sòò núnà.

¹¹Bə̀ tə́ kə̀ gààd gbà'á naú. Gààraa rə, *malaika *lɔ̀ŋ pí'ke gbà'á bə̀ nwáànná, bə̀ dɛ̀rə̀ «Abadon» kə̀ Ibraniŋko nwɔŋú, bít kə̀ Grɛg nwɔŋú kɔ̀ bə̀ dɛ̀rə̀ *«Apoliyon» (Taà kùmsə̀n baànmbə̀: «Nɛ́ŋə̀ aa yɛ̀l sáá in bəd doó.»)

¹²Bə́ŋyée gə́, búúd éèn də̀gə̀ də̀gə̀ bə̀ rə, yaà taà yàá. Búúd ɔ̀d bəd tóò yaànà iirə sɔ̀ŋ.

¹³Bít *malaika nɔ̀ŋgɔ̀s oòrə, yaà íl gà' oò bìá. Bít mə́ kìì pə̀gə̀lib nwɔŋ nə́ŋ̀ wùù vúgà *gannyàgə̀lú, bəŋzɔ' bə rú, kàd bəraa naarə rə ba. *Gannyàgə̀l aarə, tə́ Vɛnɛ́b númú.

¹⁴Pə̀gə̀lib nwɔŋ bàà malaika nɔ̀ŋgɔ̀s aa kə̀ yaa gà' nɛɛ̀n tɛ́mú rə: «Bìn ǹ lɛ́' malaika bəraa naarə, bə̀ tab bə̀ kə̀ sɛ̀gsɛ́g bəd, wəl nwuu aa bə̀ dɛ̀d Efrata rə kàd bərə kúnú.»

¹⁵Bít bìn bə̀ lɛ́l malaika bəraa naarə rə kúnú. Malaika bəraa naarə rə, kùd bə̀ zíg bà sɛŋ aarə bìá, nyàm aarə bìá, sòò aarə bìá, bít zèraa rə bìá, bɔ̀b ɛ̀m dá boò lòd nɛ́b aa pɛɛ̀l gə̀b toorə zɔ̀ŋə yɛ́b bərə, gə̀b nə́ŋ̀ gə́ kúnú.

¹⁶Sóózè zùúm bəd na'à bəd yaa yílú. Bə̀ bàà mə́ ká'sɛ́l boò rə yàá. Nɛ́ŋə̀ boò zùúm, million laa núnà zɔ̀ŋ iira.

¹⁷Bít ìì ɛ̀g nɛɛ̀n aa mə́ bé' yaa bəd kə̀ nɛ́b aa bə̀ tə́ bə̀ naàn yílə́ rə tá, sɛŋ aa núù mə́ ked dú roó' bə̀ tab bùm gɔ̀' yɛ̀ɛ́lo bəd gíìlú. Bùm gɔ̀' bəd də, kìínmbə̀ laa kíin, wəl lísá, kə̀ safira kíin, bít kə̀ towà laàn kíin. Yaa bəd yílə kìínmbə̀ gbàál nyìg bəd yílə kíin. Laá, laa yisá, kə̀ laa zəəmá, vúgə́l sə̀n boò gú' ba.

¹⁸Nɛ́b aa pɛɛ̀l gə̀b toorə zɔ̀ŋə yɛ́b bərə, gə̀b nə́ŋ̀ gə́, laá, laa yisá, bít kə̀ laa zəəm bəraa vúgə́là yaa bəd gú' bərə, lòd bə̀ sùnú.

¹⁹Kàandə, yaa bəd kpɛŋsɛ́l gə́, tə́ boò gú' ba, kə̀ díìm boò bəd ba. Díìm boò bəd də, lúŋ bi' bərá. Díìm bəraa rə, yílə bəd bə wərà; bə̀ mà' nɛ́b bəd invaksə́ kə̀ kùrú.

²⁰Nɛ́b kam bəraa val kòd bə̀ kə̀ búúd nwuukè bəraa yée síndə, lɛ́' bə̀ dàà tù' vaksə́ bəraa bə̀ mà' kə̀ nɛɛ̀n boò bəd də sé; bə̀ dàà nwul vaksə́ bəd pɔ̀bm̀bə̀ sé, vɔɔm bəraa bə̀ kùd kə̀ bəŋzɔsá, basá, ba' yáàmá, bəŋ bərá, bít kə̀ téé roó. In bəraa rə, bə̀ bé' núù gá, bə̀ kìì túŋ gá, bít bə̀ ɛ̀m dun gá.

²¹Nɛ́b aarə, bə̀ dàà nɛ́b bəd lodǹmbə̀ sé, bə̀ dàà gan vaksə́ boò bəd sé, bə̀ dàà labsə̀ boò sé, bə̀ dàà lííro pa'ǹmbə̀ sín kɔ̀.