Read Samburu Matayo 1 Bible Online

Matayo 1 - Samburu bible

Matayo 1

¹Kore kuna arn naasira eirukuruko tene, naa noo lmakui le Yeso Kristo, layieni le Daudi, layieni le Abraam.

²Etiiwua ꞉Abraam Isaka, neiu ꞉Isaka Yakobo, neiu ꞉Yakobo Yuda o lalachera lenyena,

³neiunyie ꞉Yuda Tamar layiok oare, aa Peres o Sera, neiu ꞉Peres Esiron, neiu Esiron Aram,[1]

⁴neiu ꞉Aram Aminadab, neiu ꞉Aminadab Naachon, neiu ꞉Naachon Salmon,

⁵neiu ꞉Salmon Boas te nkitok enye Raab, neiu ꞉Boas Obed te nkitok enye Rrut, neiu ꞉Obed Yese,

⁶neiu ꞉Yese Lkinkii Daudi. Neiu ꞉Daudi Solomon te nkitok e Uria.[2]

⁷neiu ꞉Solomon Reoboam, neiu ꞉Reoboam Abiya, neiu ꞉Abiya Asa,

⁸neiu ꞉Asa Yosapat, neiu ꞉Yosapat Yoram, neiu ꞉Yoram Usia,

⁹neiu ꞉Usia Yotam, neiu ꞉Yotam Aas, neiu ꞉Aas Esekia,

¹⁰neiu ꞉Esekia Manase, neiu ꞉Manase Amon, neiu ꞉Amon Yosia,

¹¹neiu ꞉Yosia Yekonia o lalachera lenyena ta ng'amata apa natarayieki ninche aaya nkop e Babilon.

¹²Kore tesiedi ng'amata natarayieki ltung'ana le Isirael aaya Babilon, neiu ꞉Yekonia Chealtiel, neiu ꞉Chealtiel Serubabel,

¹³neiu ꞉Serubabel Abiud, neiu ꞉Abiud Eliakim, neiu ꞉Eliakim Asor,

¹⁴neiu ꞉Asor Sadok, neiu ꞉Sadok Akim, neiu ꞉Akim Eliud,

¹⁵neiu ꞉Eliud Eleasa, neiu ꞉Eleasa Matan, neiu ꞉Matan Yakobo,

¹⁶neiu ꞉Yakobo Yosep, lpayian le Maria, inia natiiwua Yeso oji Mesia.

¹⁷Neaku naa kore ntowuoitin pooki, ang'asu Abraam metabaki Daudi naa tomon o ong'uan. Naa kore ang'asu Daudi metabaki inia ng'amata natarayieki ltung'ana le Isirael aaya Babilon, naa tomon o ong'uan, naa kore ang'asu inia raroto e Babilon metabaki Mesia [3] naa tomon o ong'uan.

¹⁸Kore apa inoto e Yeso Kristo, naa inji eikununo: Kore eidipa Yosep atasayia Maria, ng'otonye Yeso, nelioi ajo ketunute to ngolon e Ltau Sinyati, abaki eitu eboita ninche.

¹⁹Kore tankaraki kera apa Yosep, lpayian lenye, ltung'ani loosipat, nemeyieu neitam ninye anyit, neyieuu ta ltau neleliari aing'uaa ninye.

²⁰Kore ewuon erare ninye ana bae, neipung'oki ꞉lmalaika la Laitoriani te nkidetidetata nejoki ninye, <<Yosep, layieni lo ltim le Daudi, miurie aawa Maria aitaa nkitok ino, amu kore nutai enye naa ne Ltau Sinyati.

²¹<<Naa keiu ꞉ninye layieni, ning'amaki nkarna ajo Yeso[4] amu keitejeu ꞉ninye ltung'ana lenyena too ng'ok enche.>>

²²Naa ketaasate kuna pooki payie ebaya lkilikuai la Laitoriani to loiboni lenye ejo,

²³<<Ng'ura kore inia oliontoi neitu eboitiere lee, naa keiu layieni neji nkarna enye Emanuel.>> Kore inia arna naa <<Nkai tenebo o iyioo.>>

²⁴Kore payie einyuototo Yosep too njuo, neas ana natiaka ꞉lmalaika la Laitoriani, nerik Maria aitaa nkitok enye.

²⁵Kake eitu eboitiere ninye ana metiiu inia kerai enye, neng'amaki nkarna naji Yeso.