Read Samburu Matayo 10 Bible Online

Matayo 10 - Samburu bible

Matayo 10

¹Neipot ꞉Yeso looiteng'eni lenyena pukura tomon o oare meotu netii, neicho nkitoria meitoria lairiruani, payie earaa ninche, neichiunyie pooki keeya o moyian.

²Naa kuna nkarn ee lkipaareta tomon o oare: kore lekue naa, Simon oji Petero o Andirea lalache lenye, o Yakobo layieni le Sebedayo o Yoana lalache lenye,

³o Pilipo o Batolomayo, o Tomas o Matayo laitalakunoni le kodi, o Yakobo, layieni le Alpayo, o Todayo,

⁴o Simon ilo oji Kananayo[17] o Yudas Isikariot otilikoyie Yeso meibung'i.

⁵Kulo tomon o oare eipaayie Yeso neitanap ajoki, <<Emiim ake nkoitiei nalo netii loreren, nimijingjing lkerenket hoo obo loo Samaria,

⁶kake enchom ake netii nkerra naaiminaitie e locho le Isirael.

⁷Kore ipuoitoto, entilikoi ijoijo inji, <Etinyikua nkitoria e chumata.>

⁸Enchiunyie ltamoyia, entipiu lootuata, enchiunyie metusupata lolo oaata nkeeya ee lbolot, niaraa lairiruani. Itang'amaitie ntae pecheu, naa enchooi sii ntae pecheu.

⁹Eminap ropiyiani e saabu anaa ne nkocholai anaa sii ne surutiai tee mbenia ee nkimeenteni inchi.

¹⁰Eminap lbenia anaa nankan are e atua anaa namuka anaa sobua tinipuopuo, amu keichiaakino laasani le siaai ndaa nanya.

¹¹Kore lkerenket o nkang nijing'jing, enteyiai ltung'ani oichiaakino, niwuenienie nkaji enye ana metabau ng'amata nipuopuo.

¹²Naa tinijing'ijing inia aji, eroroki lootii.

¹³Kore tanaa keichiaakino inia ang seriani inchi, meeu naa seriani inchi inia ang, naa tenemeichiaakino, nechukokino ntae seriani inchi.

¹⁴Naa teneatae ltung'ani lemeitoomon ntae, nemening lomon linchi, kore tinimpung'pung te inia ang anaa te ilo kerenket, empiripiroi nterit ee nkejek inchi.[18]

¹⁵Kajoki ntae sipata nadede, kore kenya te inia parri e nkiguana, keikachieki nkop e Sodom o Gomora[19] aaitalang ilo kerenket.

¹⁶<<Entaparru aajo, kaipaaya ntae tana nkerra taatua suyiani. Naaku enteng'enioto ana lasuria, niakuku lemeata ntioto ana nkutukurruki.

¹⁷Entirrip ate too ltung'ana, amu keya ntae nkiguanaitin enche, neidong ntae tee Sinagogini enche.

¹⁸Kore tankaraki nanu, keyae ntae tekue laitoriak o lkinkii payie itumtum aaitai limunoto ee nenia naaipirita nanu tekue ninche, o tekue Loreren.

¹⁹Kake teneibung'i ntae aaichooyo, eming'aing'ai ninkoko tiniwolwol anaa inia nijoijo, amu keichori ntae te inia kata nijoijo.

²⁰Amu mara ntae ooiro, kake Ltau le Papa linchi oiro taatua ntae.

²¹Keichooyo ꞉lalache likae alache metari metua, neichooyo ꞉menye nkerai, neiwuatuwuatakino ꞉nkera ntoiwuo to ngoro, neichooyo ninche metari metuata.

²²Naa keibai ntae ltung'ana tankaraki nkarna ai. Kake kore long'iri metabaki nkiting'oto, neitejeuni.

²³Naa teneitam ntae sina te le kerenket tankaraki nkurukoto inchi, eisigaki likae. Amu, nadede ajoki ntae, mindipdip aaimai lkerenketi pooki le Isirael ewuon eitu elotu Nkerai e Ltung'ani.

²⁴Melang ꞉loiteng'eni laiteng'enani lenye, nemelang sii ꞉laisiaayiani lkitok lenye.

²⁵Keitiemu loiteng'eni tenetuwuanai laiteng'enani lenye, neitiemu sii laisiaayiani tenetuwuanai lkitok lenye. Amaa tanaa keipoto lopeny nkaji aajo Beelsebul, aa taa lkitok loo lairiruani, kebaa sa ejo lolo le nkaji enye?

²⁶<<Emiuriei naa ninche, amu meatae ntoki naisiaparo nemeibalieki, anaa naisudoro nemeyielouni.

²⁷Kore pooki najoki ntae ta naimin entilikoi to wong'an, naa kore nining'ining too nkurrat, entilikoi aaitadaraa.

²⁸Emiurie lolo oaar sesen nemeidim aatar nkichui, kake enturia ilo oidim aidakie nkichui o sesen to lmoti le nkima.

²⁹Amaa, mara keitami ntiitiini[20] are sintii obo? Naa meata hooyia nabo nasulakino nkop meyielo Papa linchi.

³⁰Kake kore lpapit loo nkuechi inchi naa keikena pooki.

³¹Naaku, emiurieicho amu irara ntae le tipat aalang ntiitiini kumo.

³²Naa kore pooki ng'ae laaibalie nanu tekue ltung'ana, naibalie sii ꞉nanu ninye tekue Papa lai oti chumata.

³³Kake kore pooki ng'ae laamiki nanu tekue ltung'ana, namiki sii nanu ninye tekue Papa lai oti chumata.

³⁴<<Emijo kayewuo ayau sotua nkop. Eitu alotu ayau sotua kake mpere[21] ayewua.

³⁵Amu kayewuo airriki layieni metarare menye, nerare ꞉ntito ng'otonye, nerare ꞉ntomononi nkautani enye.

³⁶Naa kore lmang'ati lo ltung'ani naa lolo le nkaji enye.

³⁷Kore loacham menye anaa ng'otonye aitalang nanu, naa maaichiaakino ꞉ninye. Naa kore loacham nkerai enye, aa layieni anaa ntito aitalang nanu, naa maaichiaakino.

³⁸Naa kore pooki lemenap lmusalaba[22] lenye naairukurukore, namaaichiaakino nanu.

³⁹Kore ilo otum nkichon enye naa keiminie, kake kore ilo oiminie nkichon enye tankaraki nanu naa ninye otum.

⁴⁰<<Kore long'amaa ntae, naa nanu etang'amayie, naa kore laang'amaa nanu, naa ilo laairriwua etang'amayie.

⁴¹Kore pooki ng'ae ong'amaa loiboni le Nkai ajo kera loiboni naa ketum laata e loiboni le Nkai, naa kore long'amaa ltung'ani loosipat ajo kera ltung'ani loosipat, naa ketum laata e ltung'ani loosipat.

⁴²Naa kore pooki ng'ae oicho lobo loo kulo oodoli etuwuana meitoki nkare nairobi tankaraki nara ake loiteng'eni lai, kedede kajoki ntae, meimin hoo laata enye.>>