Read Samburu Matayo 11 Bible Online

Matayo 11 - Samburu bible

Matayo 11

¹Kore payie eidip Yeso aitaarriyiana loochi ooiteng'eni lenyena pukura tomon o oare, nelo teinie alo aiteng'enicho, nelikoo too lkerenketi le inia kop.

²Kore payie ening ꞉Yoana Laipatisani etii jila mbaa naasita ꞉Kristo, neipaaki looiteng'eni lenyena

³meipara aajoki, <<Iyie dei apa ilo Mesia olotu tana ikianyu likae?>>

⁴Newoliki ꞉Yeso ajoki, <<Enchom entiliki Yoana nenia nining'itoto o nidolitata:

⁵Etodolichete lmodook, epuo lootigiligilete tee nkejek, eichiunyieki loata moyian ee lbolot, etining'ichete lming'anak, naa keitipiutae lootuata, nelikini laisinak Lomon Supati.

⁶Emayiana pooki ng'ae lamaajur nanu.>>

⁷Kore epuoito looiteng'eni le Yoana, neng'asu Yeso aliki lturrur mbaa naaipirita ninye, <<Nyo apa impung'o aapuo aadol to lkees? Loperriai oyukuto ꞉siwuo?

⁸Oo taa, nyo impung'o aapuo aaing'or? Ltung'ani oichopito nkilani naapuyiapui? Mara, kore lolo ooichop nkilani naapuyiapui, naa nkajijik ee lkinkii ewuenie.

⁹Kake nyo impung'o aapuo aaing'or? Loiboni le Nkai? Ee, kajoki ntae, kelang ꞉Yoana Loiboni le Nkai.

¹⁰<<Aa kore ninye, naa keimakita ꞉Lkigerot aajo, <Teyielo ajo kareu lkipaaret lai tekue iyie, likintibiraki nkoitiei ino tekue iyie.>

¹¹<<Kajoki ntae sipata nadede, kore too pooki otiiwua ꞉ng'oriei, meatae hoo lkitok alang Yoana Laipatisani, kake kore lara kini te nkitoria e chumata, keikitok alang ninye.

¹²<<Kore apake ang'asu ng'amata e Yoana Laipatisani ana metabaki taata, ketumuto nkitoria e chumata larrabal, neisimaa lolo torrok la larrabal aaibooyo, payie mebulaa.

¹³Amu keibonutua apa ꞉loibonok le Nkai o nkitanapat metabaki ng'amata e Yoana.

¹⁴Oi siake tanaa ing'amaa, amu ninye Elija apa olotu.

¹⁵Kore loata nkiyiaa, nchoo ening!

¹⁶<<Nyo sa aitunyunyukie ltung'ana le ana pukunoto? Inji etuwuana ana nkera naawueni to ng'oji nemirichiereki, neipot ꞉mboitieii enche aajoki,

¹⁷<Ikitukutakita ntae ndulen, neitu iranyrany, nikitaranyakita ntae sinkoliotin lo lkichiret neitu inchirchir.>

¹⁸<<Amu keyewuo Yoana menya ndaa, nemematicho, kake nejo ltung'ana <Lairirua eata.>

¹⁹Nelotu Nkerai e Ltung'ani, nerruticho, nematicho, kake nejo ltung'ana, <Eng'ura ele ogut naa lamerani, nera lchore laa laitalakunok le kodi o loo ng'ok.> Kore ng'eno e Nkai, naa keyielouni taa asat enyena, neikeni aajo kedede.>>

²⁰Neng'asu ꞉Yeso akusakan lolo kerenketi oataasie mbaa kumo e nking'asia, amu eitu eirriidu ninche.

²¹Nejo, <<Oi sii ake iyie Korasin! Oi sii ake iyie Betesaida! Amu kore tanaa ketaasaki apa te Tiro o Sidon mbaa e nking'asia naataasaki taatua ntae, anata apa eibelekenyete ninche, neichop nkilani ee lkuniyiani, newueni too nkuron.

²²Kake kajoki ntae, kore kenya ta mparri e nkiguana, naa keiteleleki nkiguana e Tiro o ne Sidon aaitalang ntae.

²³Amaa! Iyie Kapernaum, mara mikiliepieki aaitabaki chumata? Ikintodouni aaitodoki nemeneng'a, amu tanaa ketaasate apa mbaa e nking'asia naataasate te iyie te Sodom, anata duo ewuon eatae ilo kerenket.

²⁴Kake kajoki ntae, keikachieki kenya Sodom ta mparri e nkiguana alang iyie.>>

²⁵Kore te inia kata nejo Yeso, <<Kaarrep iyie Papa, Laitoriani le chumata o nkop. Amu isudorie kuna baa lkursaii o laing'eni, nimbalakinyie lolo lemeitoki eyielo.

²⁶Ee, Papa, amu inia naa apa yieunoto ino!

²⁷Kaaitarasaka Papa lai ntoki pooki, apik nkaina. Meatae hoo ꞉loyielo Nkerai mara Papa ake, nemeata sii ꞉loyielo Papa mara lolo oaatachama ꞉Nkerai aibalakinyie.

²⁸<<Ootun natii, ntae pooki ooinaurete, neitelekaki lkurupani ooirochi naa kayeng'iyeng'ie ntae.

²⁹Entipik ate lororoi lai, nikinteng'enarere nanu, amu kabor nanu ta ltau, naanana ocheke, naa itumtum ntae nkiyeng'iyeng'ata ee nkurruki inchi.

³⁰Amu kore lororoi lai, naa kelelek, neneneng sii lkurupa lai.>>