Read Samburu Matayo 12 Bible Online

Matayo 12 - Samburu bible

Matayo 12

¹Kore te inia kata, neimaa ꞉Yeso lchampai mparri e Sabato. Kore tankaraki natara looiteng'eni lenyena ꞉sumach, neng'asu aagilu nkuechi ee lperes le nkano payie enya.

²Kore payie edol ꞉Lparisayo, nejoki Yeso, <<Ng'ura! Egilita looiteng'eni linono nkitanapat, amu egilita lperes le nkano aanya mparri e Sabato.>>

³Newoliki ajoki, <<Amaa, eitu apake isomsom inia nataasa apa Daudi payie etum o lboitieii lenyena sumach,

⁴neikuna ꞉ninye payie ejing nkaji e Nkai, nenya ninche mukateni naaitakaki Nkai? Kore nenia mukateni, naa meiririkino too nkitanapat payie enya ꞉ninche, mara ake laitainok la lasar.

⁵Amaa, eitu isomsom too nkitanapat nchere, ketigila apa laitainok la lasar etii nkaji e Nkai aasicho nkitanapat e Sabato, nemeata kusaka?

⁶Kake, kajoki ntae, ketii ene loata tipat alang nkaji e Nkai.

⁷Naa tanaa iyielolo naipirita kulo rereii oojo, <Kayieu lng'er alang lasar,> anata duo eitu idung'okiki nkiguana lolo lemeata kusaka.

⁸Naaku, Nkerai e Ltung'ani Laitoriani le Sabato.>>

⁹Kore payie eing'uaa ꞉Yeso inie ng'oji, nelo ana metabaki Sinagogi enche.

¹⁰Netii inie ltung'ani oikaolo nkaina. Neipar ꞉Lparisayo Yeso aajoki, <<Keichiaakino taatua nkitanapat tininchiunyie ta mparri e Sabato?>> Naa keiparutua ana payie etum ntoki naibung'ie Yeso nelikoo meiguanareki.

¹¹Nejoki, <<Amaa teneata lobo linchi nker natodoka udoto nagut ta mparri e Sabato, mara keyietu ailiepunyie?

¹²Amaa! Mara keata ltung'ani tipat alang nker? Kore tankaraki inia, naa keichiaakino teneasi mbaa supati mparri e Sabato.>>

¹³Nejoki ilo tung'ani, <<Intorioi nkaina ino.>> Neitorioo nkaina, neichiu asupatu aitoki ana anda nkae.

¹⁴Neipung Lparisayo, neiparakino loseg oarie ninye.

¹⁵Kore tankaraki nayielo Yeso loseg lenche, neing'uaa inie, neirukurukore ꞉ltung'ana kumo, neichiunyie pooki.

¹⁶Neitaarriyian ninche payie meibalie ninye.

¹⁷Ketaasate kuna payie ebaya apa natejo loiboni le Nkai Isaya.

¹⁸<<Nele laisiaayiani lai lategelua, ilo lacham, netachamayie ꞉ltau lai. Kapik ninye Ltau lai, neitore lochon pooki te sipata.

¹⁹Meichankarra, nemebuak, nemeata ltung'ani oning ltoilo lenye too nkoito.

²⁰Nemegil lperesi oilienye, nemear sii nkitampi e ltaa napuru, ana meisula sipat.

²¹Neisilig nkarna enye ꞉lochon.>>

²²Neyakini Yeso ltung'ani oata lairirua, naa modooni, nemeiro. Neichiunyie ꞉Yeso ninye, meiroro, nedolicho.

²³Neing'asia ltung'ana pooki, nejo, <<Mara mebaki naa ninye Layieni le Daudi, ilo Aitejeunoni oaanyutae?>>

²⁴Kake kore payie ening ꞉Lparisayo ana nejo, <<Mearaa ninye lairiruani mara ake to ngolon e Beelsebul, lkitok laa lairiruani.>>

²⁵Kore ana nateyielo Yeso mparrunot enche, nejoki ninche, <<Meatae nkitoria naoro arere koon nemeidaaya, nemeatae lkerenket anaa nkaji naoro arere koon naitache.

²⁶Kore tanaa kemiraa ꞉Chitani Chitani, naa koon naa erare. Kaji aitoki eiko nkitoria enye teneitache?

²⁷Naa amaa, tanaa kaaraa nanu lairirua to ngolon e Beelsebul, to ngolon e ng'ae earaa looiteng'eni linchi? Naaku naa, keaku ninche looiguanare ntae.

²⁸Kake tanaa kaaraa nanu lairiruani ta Ltau le Nkai, naaku eidipa nkitoria e Nkai ayeu nitii ntae.

²⁹Anaa, aji eiko ltung'ani tenejing nkaji e ltung'ani ogol aisimarie ntokitin enyena, mara ketang'asa aen ilo openy nkaji? Kore inia kata, netum inia aji enye.

³⁰Kore lamaatii tenebo naa lmang'antita lai, naa kore lemeiturrur o nanu naa kesachaa.

³¹Naa kore tankaraki inia, kajoki ntae, kepalikini ltung'ana ng'oki o ldeket pooki, kake kore ilo otediaa Ltau Sinyati, naa mepalikini.

³²Kore pooki ng'ae oiro rerei torno te Nkerai e Ltung'ani naa kepalikini, kake kore pooki ng'ae oiro rerei torno ta Ltau Sinyati, naa mepalikini tana ng'amata anaa ta ng'amata nalotu kenya.

³³<<Tanaa keisupat lcheni naa keisupati lng'anayio lenyena, naa tanaa keitorno lcheni, naa keitorrok sii lng'anayio lenyena. Naaku, taa lng'anayio lenyena eyielouni lcheni.

³⁴Ntae ichioi ee lasuria, aji inkoko tiniroro lomon supati, nirara maate torrok? Amu kore nenia naabore ltau lo ltung'ani, naa ninche eiro nkutuk enye.

³⁵Kore ltung'ani supat neiu supati taatua nchumat enyena, neiu sii ltung'ani torno ntorrok taatua nchumat enyena.

³⁶Kajoki naa ntae, kore rerei pooki lemeata tipat ooiro ꞉ltung'ana, naa keipari kenya ta mparri e nkiguana.

³⁷Amu te rerei lino ikinkenakini sipat, naa te rerei lino sii kidung'okini nkiguana.>>

³⁸Neitoki Lparisayo o laiteng'enak loo nkitanapat aajoki ninye, <<Laiteng'enani, ikiyieu nikidol nkitodolunoto te iyie.>>

³⁹Newoliki ninche ajoki, <<Ltung'ana le mpukunoto torno o le mpukunoto nemeata nkurukoto ooyiaya nkitodolunoto e nking'asia, kake meata nkitodolunoto naichori, mara ake nkitodolunoto e loiboni le Nkai Yona.

⁴⁰Naa kore ana natepero apa Yona mperot uni, kuarie o parkiji, to nkocheke e sinkir sapuk, naa keper sii Nkerai e Ltung'ani mperot uni, kuarie o parkiji, taatua lodo le nkop.

⁴¹Keitachoo kenya lewa le Ninawi o kulo tung'ana le mpukunoto torno o le mpukunoto nemeata nkurukoto ta mparri e nkiguana. Kore lolo lewa le Ninawi, nedung'oki nkiguana torno kulo tung'ana, tankaraki keibelekenyete apa ninche, te likoroto e Yona, naa eng'ura ketii ene lara kitok alang Yona!>>

⁴²Keipung'unyieki kenya nkinkii naing'uaa kopikop ta mparri e nkiguana, tenebo o kulo tung'ana, neiguanare ninche. Amu keyewuo eing'uaa neiting'ie nkop ainining'u ng'eno e Solomon, naa eng'ura, ketii ene lara kitok alang Solomon!

⁴³<<Kore payie eipung'u lairiruai taatua ltung'ani, neimaa ng'ojitin nemetii nkare, eyiaya neyeng'iyeng'are. Kake tenelau, nejo, <Karrinyokino nkaji ai naipung'unyie apa.> Kore payie ebau, nedol ajo nkaji narok ake inia, netooroki, neitibiraki,

⁴⁴

⁴⁵nelo ariku lkulie airiruani sapa torrok oaalang ninye, nejing nemany inie. Nerroyo nkichon e siedi e ilo tung'ani alang napa ekue. Nejia naa kenya etiiu kulo tung'ana le ana pukunoto torno.>>

⁴⁶Kore ewuon eirorie Yeso lturrurri, neitache ng'otonye o lalachera lenyena to boo eyieu neirorie ninye.

⁴⁷Nejoki ꞉ltung'ani obo ninye, <<Keitache ng'utunyi o lalachera linono to boo naa ikiyieu ꞉ninche nikirorie iyie.>>

⁴⁸Neng'amaa ajoki, <<Ng'ae dei yieyio, naa oo ng'ae lalachera lainien?>>

⁴⁹Neutaki looiteng'eni lenyena ta nkaina ajoki, <<Kore yieyio o lalachera lainien, naa kulo.

⁵⁰Amu kore pooki ng'ae oaas nenia naayieu ꞉Papa lai oti chumata, naa ninye lalache lai o nkanache ai o yieyio lai.>>