Read Samburu Matayo 13 Bible Online

Matayo 13 - Samburu bible

Matayo 13

¹Kore ake te inia parri nabo, neipung Yeso ta nkang, nelo awuon tabata mpaso.

²Neiturrurrokino ninye ꞉lturrur kitok ana metidira meli, newuon taatua aiteng'en, eitache ilo turrur tabata mpaso.

³Neliki ninche mbaa kumo tee nkitanyanyukot, ajoki, <<Kore apa, nelo launoni lo lchampa aisuaaya lantarara.

⁴Naa kore eisuaaya aun, nedoki lkulie nkoitiei, nepuonu nkueeny, nenya aamut.

⁵Nedoki lkulie ng'ojitin e lkarkar, nemetii nkulupo kumo, nebulu aasieku amu megut nkulupo teinie.

⁶Kake kore payie eiliepu ndama, nepejori. Netoii aitoki, amu keidorropi ntana enche.

⁷Nedoki lkulie atua lkuku, nebulu ꞉lkeek loo lkuku, neiding'aki, negor.

⁸Nedoki lkulie nkuluponi supat, kore lobo, neiu ip, neiu likae ntomoni ile, neiu likae osom.

⁹Kore loata nkiyiaa, nchoo ening.>>

¹⁰Nepuonu looiteng'eni lenyena, neipar Yeso aajoki, <<Aanyo payie irorie ltung'ana tee nkitanyanyukot?>>

¹¹Newoliki ꞉Yeso ninche ajoki, <<Eichooki ntae enteyielo nkisudorot e nkitoria e chumata, kake eitu eichori ninche.

¹²Amu kore pooki ng'ae oata ntoki, naa keponikini aaitodooyo. Kake kore pooki ng'ae lemeata, neoruni abaki naata.

¹³Tankaraki inia naa, payie airorie ninche tee nkitanyanyukot, paa <Kore abaki eing'or nemedol, Nening tee nkiyiaa, kake mening anaa mening'u.>

¹⁴<<Tee ninche ebaya naibon e Isaya, <Ining'ning, kake mining'ung'u hooyia, ning'orng'or, kake nimumusoso katukul.

¹⁵Amu kore ltauja loo kulo tung'ana naa ketogolito, nemening oleng tee nkiyiaa, neikeno nkonyek enche, metaa kore too nkonyek enche, nemedol, nemening too nkiyiaa enche, nemening'u taa ltauja lenche, payie etum aaibelekenyata, naichiunyie nanu ninche.>

¹⁶<<Kake emayiana nkonyek inchi amu kedolicho, o nkiyiaa inchi amu kening'icho.

¹⁷Kedede kajoki ntae, kore loibonok o ltung'ana loosipat kumo, naa keyieu apa oleng payie edol nening mbaa nidolitata o nining'itoto, kake neitu edol anaa ening.

¹⁸<<Entining naa ntoki naipirita nkitanyanyukoto e launoni:

¹⁹Kore pooki ng'ae oning lkilikuai le nkitoria, nemening'u, naa kelotu ilo torno aisimarie inia apa natuunoki taatua ltau lenye. Naaku kore ilo lemening'u, ninye inia oitiei duo natodoka lantarara.

²⁰Kore ilo karkar otodokita ꞉lantarara naa ltung'ani oning rerei, neng'amaa asioki te ng'ida.

²¹Kake kore amu meata ntana, newuon ake te nkini kata. Kore payie etum nyamali o sina oitami tankaraki ilo rerei, nesioki arriaa.

²²Kore lkuku ootodokita lantarara atua, naa ltung'ani oning ilo rerei, kake kore payie etum irran e ana kop o mpong'ori e parakuoicho, neiding'aki, negor ilo rerei, metaa meiu lng'anayio.

²³Kake kore nkuluponi supat natodokita ꞉lantarara, naa ltung'ani oning ilo rerei, neibung. Neiu lng'anayio ip, anaa sii ntomoni ile, tanaa sii osom.>>

²⁴Neitoki aicho ninche nkae kitanyanyukoto ejo, <<Keitinyinyukoreki nkitoria e chumata ltung'ani oisuaaya aun lantarara supati ta lchampa lenye,

²⁵kake kore eilura ltung'ana, nelotu lmang'antita lenye, neun ndeti taatua nkano, neing'uaa.

²⁶Kore payie ebulu lperes le nkano, nerrek lperesi, nelioi te inia kata ndeti.

²⁷Nepuonu laisiaayiak lo lopeny nkaji aajoki ninye, <Laitoriani, aa mara lantarara supati apa ituuno ta lchampa lino? Aji naa eing'uaa ndeti?>

²⁸Nejoki ninche, <Lmang'antita otaasa ana.> Nejoki, <Iyieu nikipuo aadotu aaiturrur?>

²⁹Kake newoliki ajoki, <Emias inia, amu kore inturrurrutoto ndeti, indimdim nidotutu nkano supat tenebo o ndeti.

³⁰Enchoo ebulu tenebo, metaa tenebau nkata e ndung'ore, najoki ladung'ok, <<Enturrurro ang'as ndeti, nienien too rridat, payie ipejoo, kake kore nkano supat, enturrurroki atua lkompe lai.>> > >>

³¹Neitaki ꞉Yeso nkae kitanyanyukoto ejo, <<Kore nkitoria e chumata naa inji etuwuana lantararai kini oji karadali owa ltung'ani aun to lchampa lenye.

³²Kore ilo antararai naa keikini ninye alang lantarara pooki, kake kore payie ebulu neaku kitok arepaa lkeek pooki lo lchampa ana metaa lcheni sapuk, nepuonu nkueeny e ai aapik nkajijik enche.>>

³³Neitoki aliki ninche nkae kitanyanyukoto ejo, <<Kore nkitoria e chumata naa inji etuwuana mukate kini naisiicho, naituchulaka ꞉nkitok ncharaan uni e nkuruma e nkano, nepal ana meisiichoi pooki.>>

³⁴Ketiaka ꞉Yeso lturrurri kuna pooki too nkitanyanyukot, nemeata hooyia ntoki natiaka mara ake too nkitanyanyukot.

³⁵Paa kore nairoro apa Nkai aimu loiboni lenye ajo, <<Kabol nkutuk ai tee nkitanyanyukot, nalimu inia naisudoyieki apake ang'asu te nkitibirata e nkop,>> netum atabai.

³⁶Kore te inia kata neing'uaa ꞉Yeso lturrur, nechuko alo nadei aji enye.[23] Nepuonu looiteng'eni lenyena netii, nejoki, <<Tiliki iyioo aibalakinyie kipirte e nkitanyanyukoto e ndeti e lchampa.>>

³⁷Newoliki ajoki, <<Kore ilo oisuaaya aun lantararai supat naa Nkerai e Ltung'ani.

³⁸Kore lchampa naa ana kop, kore lantarara supati naa nkera e nkitoria, kore ndeti naa nkera e ilo aitarruoni.

³⁹Kore lmang'antita otuuno ndeti naa Chitani, kore ndung'ore naa nkiting'oto e ana ng'amata, kore ladung'ok la champa naa lmalaikani.

⁴⁰Kore ana netiiu ndeti teneiturrurri, nepeji te nkima, nejia kenya etiu te nkiting'oto e nkop.

⁴¹Kereu kenya ꞉Nkerai e Ltung'ani lmalaikani lenyena meiturrurru taatua nkitoria enye mbaa pooki naaitopong'oo ltung'ana, neitoki aaiturrurru lagilak loo nkitanapat,

⁴²nenang'aki atua lmoti le nkima, inie neichirie ltung'ana, neonyie lala.

⁴³Kore inia kata, neong'u loopeny sipat ana ndama taatua nkitoria e Papa lenche. Kore ilo oata nkiyiaa nchoo ening.

⁴⁴<<Keinyinyukore nkitoria e chumata ntoki e tipat oleng naisudoro ta lchampa. Kore pootum ꞉ltung'ani, neisudoo, nelo te ng'ida amir nenia pooki naata, neinyiang'u ilo champa.

⁴⁵<<Kore aitoki, inji etuwuana nkitoria e chumata ana ltung'ani omiricho oyiaya soito le tipat[24]

⁴⁶naa kore payie etum ninye lobo loo lolo soito le tipat, lemetumoi, nelo amir pooki naata, neinyiang'u.

⁴⁷<<Keinyinyukore aitoki nkitoria e chumata ana lgiitani ooibung'ieki sinkirri oaatanang'akaki atua mpaso, neibung mpukunot pooki ee sinkirri.

⁴⁸Kore payie eboreii, neyietu ꞉laibung'ak loo sinkirri meeu nchepata e mpaso, neitoki aawueni, neor supati o ltorrok. Kore supati, nepik atua loket, kore ltorrok, nenang'aa.

⁴⁹Naa nejia kenya etiu te nkiting'oto e ana ng'amata. Kepuonu lmalaikani aagelu ltung'ana torrok taatua loopeny sipat,

⁵⁰nenang'aki ninche atua lmoti le nkima, inie neichirie ltung'ana, neonyie lala.

⁵¹Itining'utua nenia pooki?>> Newoliki ꞉looiteng'eni lenyena aajoki, <<Ee, ikitining'utua.>>

⁵²Nejoki, <<Tankaraki inia, paa kore laiteng'enani pooki loo nkitanapat oiteng'enaki mbaa e nkitoria e chumata naa keinyinyukore lopeny nkaji oitai ntokitin ng'ejuko o musan to lchumati le parakuoicho enye.>>

⁵³Kore payie eidip Yeso kuna kitanyanyukot, nelo aing'uaa inie.

⁵⁴Naa kore payie ebaki ilo kerenket oamanya apa le Nasaret, neiteng'en ltung'ana te Sinagogi enche, meing'asiata, nejo, <<Taaji etumo ꞉ele ana ng'eno o ana kidimata naasie mbaa e nking'asia?

⁵⁵Amaa ele, mara layieni le laitibirani loo ntokitin ee nkeek, mara ng'otonye eji Maria? Naa mara lalachera lenyena Yakobo o Yosep o Simon o Yuda?

⁵⁶Metii nkanachera enyena tenebo o iyioo? Taaji naa etumo ele tung'ani kuna pooki?>>

⁵⁷Nejur ꞉ninche ninye, kake newoliki ꞉Yeso ajoki, <<Meatae nkae ng'oji nelaunyie loiboni le Nkai nkanyit, mara ake nkop enye o nkaji enye.>>

⁵⁸Naa eitu eas ninye mbaa kumo e nking'asia teinie, tankaraki nemeata ninche nkurukoto.