Read Samburu Matayo 14 Bible Online

Matayo 14 - Samburu bible

Matayo 14

¹Kore te inia kata, nening larikoni le Galilaya oji Erode mbaa naaipirita Yeso,

²nejoki laisiaayiak lenyena, <<Ele dei Yoana Laipatisani, otipiwua taatua lootuata! Naa tankaraki inia, payie easicho ngolon e nking'asia taatua ninye.>>

³Amu kore apa ꞉Erode, naa keibung'a Yoana neen nkaik o nkejek enyena, nepik atua jila tankaraki Erodias, nkitok e Pilipo lalache lenye.

⁴Amu kejokita apake ꞉Yoana ninye, <<Meichiaakino tiniya nkitok e lalache lino ewuon eichu.>>

⁵Kore ake eyieuta Erode near Yoana metua, neurie ltung'ana, amu kore apa ꞉ninche, kedol Yoana ana loiboni le Nkai.

⁶Kore payie ebaki mparri naparruni inoto e Erode, nerany ntito e Erodias te nkiji ee ltung'ana, neiting'id Erode.

⁷Nenya ꞉ninye lmumai tekue Nkai ajo keicho ntoki pooki naomon tankaraki inia.

⁸Kore eidipa ꞉ng'otonye aitaarriyiana, nejo ꞉inia tito, <<Nchooki tene nkue e Yoana Laipatisani, te ncharaa.>>

⁹Neisinanio Lkinkii Erode, kake kore tankaraki nayieu neyanyit lmuma oaatama duo o tankaraki ltung'ana ooboitiere te misa, neitanapicho meichori inia natoomonua,

¹⁰Neirruaaya lkilikuai metudung'uni nkue e Yoana te jila.

¹¹Nedung'uni, neyauni te ncharaa, neichori ꞉inia tito, neyaki ꞉ntito ng'otonye.

¹²Nepuonu loiteng'eni le Yoana, neya sesen lenye, nenukaa. Naa kore payie epuonu netii Yeso, neliki mbaa naataasate.

¹³Kore payie ening Yeso nenia baa, nelo aing'uaa inie te meli o loochi ooiteng'eni lenyena, aawueni to ng'oji neliyio aa ninche aapeny. Kake kore tankaraki natining'o ꞉lturrurri inie nechomo, nechep mpaso aairukurukore ninye tee nkejek eing'uaa lkerenketi lenche.

¹⁴Kore payie edou ꞉Yeso te meli, nedol lturrur kitok, neing'erru, neichiunyie ltamoyia lenche.

¹⁵Kore payie eaku teipa nepuonu looiteng'eni lenyena netii aajoki, <<Lkees ene ng'oji, nemuto. Terewa ltung'ana mechomo nkang'ite payie epuo aainyiang'aki ate ndaa.>>

¹⁶Newoliki ninche ajoki, <<Meyiere payie epuo. Enchoo ntae ninche ndaa!>>

¹⁷Newoliki aajoki, <<Meitoki hoo ikiata tene, mara ake mukateni imiet o sinkirri oare.>>

¹⁸Nejoki, <<Eyakaaki tene!>>

¹⁹Neitanap ltung'ana metowuana too nkujit. Neitoki arrapu nenia mukateni imiet o sinkirri pukura oare, neimariri chumata, nemayian. Naa kore payie egil nenia mukateni, neicho looiteng'eni lenyena, neitabaki ꞉ninche ltung'ana.

²⁰Nenya ꞉ltung'ana pooki ndaa neimu, nerrapu ꞉looiteng'eni nkikapuni tomon o oare naabore ng'urrot e naatelekunye aaya.

²¹Kore ꞉lolo oaatama ndaa naa lewa nkalupuni imiet, metii ntomonok o nkera.

²²Neitanap ꞉Yeso ta nkata nabo looiteng'eni lenyena metijing'a meli aaituruk aalang'aki likae kokun, esacharita ꞉ninye lturrurri.

²³Kore payie eidip atasachai ninche, nelo adir lowua aomon apeny, kake kore payie eaku teipa, ewuon ake etii ninye inie apeny.

²⁴Nchoo naduo meli, eidipa ninye achomo ng'oji neodo taatua nkare, alam nchepata e mpaso, neirran ꞉laing'ok le nkare tankaraki lkutati onang'are.

²⁵Kore etinyikua siran, nelotu Yeso netii ninche epororita nkeper e mpaso tee nkejek.

²⁶Kore payie edol ꞉looiteng'eni lenyena aajo nkeper e mpaso epororita, neguretu nejo, <<Milika ana,>> nebuak to ngureticho.

²⁷Kake nejoki ꞉Yeso ninche nabokata, <<Entogolo ltauja linchi! Nanu dei ele! Emiurieicho!>>

²⁸Newoliki ꞉Petero ajoki, <<Laitoriani tanaa iyie ele, tiakaaki maeu nitii aporu nkare.>>

²⁹Nejoki, <<Wou!>> Nedoyio taa ꞉Petero te meli, neporoo nkare alo netii Yeso.

³⁰Kake kore payie edol lkutati, neguretu, neng'asu aimil, nebuak aichir ejo, <<Laitoriani ntejeuaaki!>>

³¹Neitorioo Yeso nkaina enye ta nkata nabo, neibung ninye. Nejoki, <<Oi iyie oata nkurukoto kini, aanyo pii ing'ach?>>

³²Naa kore payie eidip ninche aatidir meli, neichunye lkutati.

³³Kore lolo pooki otii atua meli nesai ninye ejo, <<Kedede taa, ira iyie Nkerai e Nkai.>>

³⁴Kore payie elang ninche, nelang'aki nkop e Genesaret, ta mbata e ndoyioroto e ndama e mpaso.

³⁵Kore payie eyielou ꞉ltung'ana le inie aajo Yeso ilo, neirruaaya lomon lubot pooki e inia kop. Neyau ꞉ltung'ana ltamoyia netii ninye,

³⁶neomon meichoo ltamoyia meiseyie ake sarkudai lo lkila lenye, naa kore pooki oiseyie neichiu.