Read Samburu Matayo 15 Bible Online

Matayo 15 - Samburu bible

Matayo 15

¹Nepuonu aitoki lbata loo Lparisayo o laiteng'enak loo nkitanapat netii Yeso eing'uaa Yerusalem, neipar ninye aajoki,

²<<Aanyo payie egil looiteng'eni linono lkerreti loo lmakui? Amu meituk ꞉ninche nkaik ana nayieuni ewuon eitu enya ndaa!>>

³Newoliki ꞉Yeso ajoki, <<Naa aanyo pii igilgil ntae Nkitanapata e Nkai tankaraki lkerreti linchi?

⁴Amu ketejo apa Nkai, <Iyanyita papa lino o ng'utunyi> naa <Kore pooki ng'ae odek papa lenye anaa ng'otonye naa meata ajo meri metua.>

⁵Kake ijoijo ntae nchere, <Kore tenejoki ltung'ani menye anaa ng'otonye, <<Kore reteto nikiret, nindim ning'amaa ta nanu, naa kaichoo Nkai>>

⁶naaku naa, meyiere hooyia neyanyit ltung'ani menye te inia bae.> Kore tankaraki inia, ninturraa rerei le Nkai, imbung'utata lkerreti linchi.

⁷Ntae looitaakino! Keibonua apa loiboni le Nkai Isaya aitibiraki naipirita ntae ajo,

⁸<Kaayanyit ꞉kulo tung'ana too nkutukie enche, kake kaalakuaniki ꞉ltauja lenche.

⁹Kaasai nanu pecheu, kake kore nkiteng'ena enche, naa noo nkitanapat naing'uaa ltung'ana.> >>

¹⁰Neipot ꞉Yeso lturrur meu netii ninye nejoki, <<Enining'o, ninining'ung'u!

¹¹Mara ntoki najing nkutuk naitarruo ltung'ani, kake inia naipung'u to nkutuk enye naitarruo.>>

¹²Nepuonu looiteng'eni netii, neipar ninye aajoki, <<Iyielo ajo ketogorete Lparisayo payie ening ana bae?>>

¹³Newoliki ajoki, <<Kore lcheni pooki leitu eun Papa lai oti chumata naa kedotuni taa ntana.

¹⁴Entapal ninche, amu keimodook, nera larikok loo lmodook.[25] Kore tenerik ltung'ani modooni likae modooni, naa keumakino pukura oare udoto.>>

¹⁵Nejoki ꞉Petero, <<Mbalakinyie iyioo ana kitanyanyukoto!>>

¹⁶Neipar ꞉Yeso ninche ajoki, <<Ewuon miatata ng'eno?

¹⁷Miyielolo aajo, kore ntoki pooki najing atua nkutuk naa kelo nkocheke neitoki aipung aing'uaa sesen?

¹⁸Kake kore mbaa naaipung'u to nkutuk naa ltau eing'uaa, naa ninche naitarruo ltung'ani.

¹⁹Amu atua ltau eing'uaa mparrunot torrok o arichoi e lkiye o loloito ee ltung'ana ooyema o loloito ee ltung'ana leitu eyama o mpurrore o nkiteenakinoto e sapare o ldeket odeki Nkai.

²⁰Kuna naitarruo ltung'ani, kake kore nyata e ndaa meituko nkaik, naa meitarruoo.>>

²¹Kore payie eing'uaa ꞉Yeso inie, nelo o looiteng'eni lenyena mbat ee lkerenketi le Tiro o le Sidon.

²²Netii apa ntomononi namara noo Lyiaudi[26] nayewuo eing'uaa inie aichiraki ninye ejo, <<Laitoriani, Layieni le Daudi ng'erruaaki, amu keitoria oleng ntito ai ꞉lairiruani.>>

²³Kake eitu hoo eng'amaa ꞉Yeso ninye. Kore looiteng'eni lenyena, nepuonu netii, nejoki, <<Timirai ninye, amu kewuon airukurukore iyioo eichirita.>>

²⁴Newoliki ajoki, <<Eitu hoo aaipaakini nkulie kerra, mara ake nkerra naaimina e locho le Isirael.>>

²⁵Nelotu inia tomononi, negilaki kung nejo, <<Laitoriani teretuaaki!>>

²⁶Newoliki ajoki, <<Mara supat tenerrapuni ndaa ee nkera, neyai aanang'aki ldein.>>

²⁷Nejo ninye, <<Kesipa taa inia, Laitoriani, kake kenya abaki ꞉ldein rrarrat naadoyio te misa ee lkutuaa lenche.>>

²⁸Newoliki ꞉Yeso te inia kata ajoki, <<Natomononi, iata nkurukoto kitok! Mikintaasi ana niyieu!>> Neichiu ntito enye te inia kata.

²⁹Kore payie eing'uaa Yeso inie ng'oji, nelo achep mpaso e Galilaya. Neitoki alo adir lowua, newuon teinie.

³⁰Nepuonu lturrurri kutuaa netii ninye, eyaki lng'ojinia o lmodook o lootigiligilete o lemeiro o lkulie kumo, neiteper ninche tankalo nkejek enyena. Neichiunyie ꞉Yeso ninche,

³¹metaa kore payie edol ꞉laaduo tung'ana lolo lemeiro eirorita o lng'ojinia eitusupataki o lootigiligilete epuo o lmodook sii edolicho, neing'asia. Neisis ꞉ninche Nkai e Isirael.

³²Neipotu ꞉Yeso looiteng'eni lenyena netii ninye nejoki, <<Kaata lng'er too kulo tung'ana, amu ketowuana tenebo o nanu too mperot uni nemeitoki eata nanya. Mayieu nareu ninche eata sumach payie meiterriaa to nkoitiei.>>

³³Newoliki ꞉looiteng'eni lenyena aajoki, <<Taaji sa kitum mukateni te ele kees nikintiemunyie lturrur owuenyi?>>

³⁴Neipar ꞉Yeso ajoki, <<Aja mukateni niatata?>> Nejo, <<Mukateni sapa o lkuni sinkirri kunini.>>

³⁵Neitanap ꞉Yeso lturrur metowuana to nkop.

³⁶Nerrapu nenia mukateni sapa o sinkirri, kore payie eidip aichoo Nkai nache, negil, neicho looiteng'eni lenyena. Neitoki ꞉ninche aaicho ltung'ana.

³⁷Nenya pooki, neimu. Kore tesiedi, nebosuni nkikapuni sapa naabore mbelesat ee mukateni naatelekuaki.

³⁸Kore siana loo lolo oaatama ndaa, naa nkalupuni ong'uan, metii nkera o ntomonok.

³⁹Nereu ꞉Yeso lturrur mechomo, nejing meli, nelo mbata e Magadani tenebo o looiteng'eni lenyena.