Read Samburu Matayo 16 Bible Online

Matayo 16 - Samburu bible

Matayo 16

¹Nepuonu Lparisayo o Sadukayo netii Yeso aatem. Neomon ꞉ninche ninye meitoduaa nkitodolunoto naing'uaa chumata.

²Newoliki ajoki,[27] <<Kore payie eaku teipa nijoijo, <Keisupat anapar seer amu kedoruta nkeper e nkai,>

³naa kore te siran nijoijo, <Kelotu anapar girrarri amu kedoruta, nenukuta.> Kore ntae, niyielolo aaibonu nejo nkeper e nkai kake nimiyielolo aaibonu nkitodolunot ee ng'amat.

⁴Ltung'ana le mpukunoto torno o le mpukunoto nemeata nkurukoto! Iyiaya nkitodolunoto e nking'asia, kake meatae naichori ntae, mara ake nkitodolunoto e Yona.>> Nelamari Yeso aing'uaa ninche.

⁵Kore payie ebaya Yeso o looiteng'eni lenyena ildo kokun le mpaso, nerikino looiteng'eni eitu enap mukateni.

⁶Nejoki ꞉Yeso ninche, <<Eng'ura, nirritata ate te nkini mukate naisiicho ee Lparisayo o Sadukayo.>>

⁷Neiro maate aajo, <<Mikiata mukateni.>>

⁸Kore tankaraki nayielo Yeso mparrunot enche, neipar ajoki, <<Ntae oaata nkurukoto kini, aanyo pii iroritata maate tankaraki nimiatata mukateni?

⁹Ewuon ake mining'ung'u? Amaa, miparrurru naapa mukateni imiet too ltung'ana nkalupuni imiet, o naapa kikapuni kumo nitumo?

¹⁰Anaa sii naapa mukateni sapa taa laapa tung'ana nkalupuni ong'uan o nkikapuni kumo nitumo?

¹¹Aaku mining'ung'u aajo mara mbaa ee mukateni airorita? Kake errita ate to mukate kini naisiicho ee Lparisayo o Sadukayo.>>

¹²Kore inia kata, neyielou ꞉ninche aajo kore rerei lenye oipirita mukate kini naisiicho, naa meipirita ntoki naitibirieki mukate kake nkiteng'ena ee Lparisayo o Sadukayo eipirita.

¹³Kore payie elotu Yeso mbata e lkerenket le Kaisaria Pilipi, neipar looiteng'eni lenyena ajoki, <<Amaa Nkerai e Ltung'ani, kejo ltung'ana ng'ae era?>>

¹⁴Newoliki aajoki, <<Ketii loojo Yoana Laipatisani, nejo lkulie Elija, netii sii lkulie oojo Yeremia anaa lobo loo loibonok le Nkai.>>

¹⁵Nejoki, <<Oo ntae, ijoijo ng'ae ara nanu?>>

¹⁶Newoliki ꞉Simon Petero ajoki, <<Ira iyie Mesia, Nkerai e Nkai naichu.>>

¹⁷Nejoki ꞉Yeso, <<Imayiana iyie Simon layieni le Yona, amu mara ltung'ani likimbalakinyie ana, kake Papa lai oti chumata likimbalakinyie.

¹⁸Naa kaajoki nchere ira iyie Petero,[28] naa te nkeper e ana dadapoi achet nkanisa ai,[29] nememir ninye ꞉ngolon e nemeneng'a.

¹⁹Kaaicho lboleta le nkitoria e chumata, paa kore ntoki nien to nkop naa keena abaki te chumata, naa kore nilaku to nkop naa kelakuno sii te chumata.>>

²⁰Neitanap looiteng'eni lenyena ajoki payie meliki ꞉ninche hoo ltung'ani aajo kera ninye Mesia.

²¹Kore ang'asu inia kata, neng'asu Yeso aliki looiteng'eni lenyena nchere meata ajo melo Yerusalem, nemeata ajo metum sina taa nkaik ee lpayiani kutuaa o lkutuaa laa laitainok la lasar o laiteng'enak loo nkitanapat, nemeata ajo meri metua, kake kore ta mparri e uni, neitipiuni.

²²Neicho ꞉Petero, neya ninye aitalam lkulie, neng'asu akusakan ajoki, <<Laitoriani, mikintopong'o ꞉Nkai! Mikipukoki aikata inia!>>

²³Nemerregela Yeso nejoki Petero, <<Chomo tesiedi nanu Chitani! Ira rruachet ai, amu mara mbaa e Nkai iparraa, kake mbaa e ltung'ani.>>

²⁴Kore te inia kata, nejoki ꞉Yeso looiteng'eni lenyena, <<Tenetii ltung'ani oyieu naairukurukore, nchoo emiki koon, nenap lmusalaba lenye naairukurukore.

²⁵Amu kore loyieu neitejeu nkichui enye, neiminie, naa kore loiminie nkichui enye tankaraki nanu, netum.

²⁶Naa amaa, kaa dupoto kenya etum ltung'ani, tenetum nkop pooki, kake neiminie nkichui enye? Anaa nyo eichooyo ltung'ani aitapaachie nkichui enye?

²⁷Naa kelotu Nkerai e Ltung'ani te nkitoo e Papa lenye tenebo o lmalaikani lenyena, nemeata ltung'ani lemelaaki te risioroto e siaai enye.

²⁸Kedede kajoki ntae, kore atua kulo tung'ana ooitachoo tene, keti ltung'ana lemedol lkiye ewuon eitu edol Nkerai e Ltung'ani elotu te nkitoria enye.>>