Read Samburu Matayo 17 Bible Online

Matayo 17 - Samburu bible

Matayo 17

¹Kore payie eich mperot ile neya ꞉Yeso Petero o Yakobo o Yoana, lalache lenye, nerik nkeper e ldonyuo oodo aa ninche aapeny.

²Neibelekenya mpukunoto enye tekue ninche. Kore nkomom enye neong'u ana ndama, neiborru nankan enyena ana wong'an.

³Kore inia kata, neipung'oki ninche ꞉Musa o Elija eirorie Yeso.

⁴Nejoki ꞉Petero Yeso, <<Laitoriani keisupat taa kitii ene, naa kore tiniyieu, naitibir nkorrimpani uni tene, nabo ino o ne Musa o ne Elija.>>

⁵Kore ewuon eirorita ninye, neimulaa ninche ꞉nkidis naibor, nening'oi ltoilo taatua nkidis ojo, <<Ana Nkerai ai, nacham naa katachamayie, entining ninye!>>

⁶Kore payie ening ꞉looiteng'eni ana, neirrabalakino nkop too nkomomi eata ngureticho sapuk.

⁷Kake nelotu Yeso netii ninche, neiseyie nejoki, <<Enyuoto! Emiguretu!>>

⁸Kore payie eapu ninche nkonyek, nemeata likae otoduaa mara Yeso ake apeny.

⁹Naa kore edouta te ilo donyuo, neitanap ꞉Yeso ninche ajoki, <<Emiliki hooyia ltung'ani obo nenia nitoduaa, ana metipiu Nkerai e Ltung'ani too lootuata.>>

¹⁰Neipar taa ꞉looiteng'eni Yeso aajoki, <<Amaa, aanyo naa payie ejo laiteng'enak loo nkitanapat nchere meata ajo melotu Elija aituruku tekue Mesia?>>

¹¹Newoliki Yeso ajoki, <<Ee, keituruku ꞉Elija, naa keitibir aitusupat ntokitin pooki ana netiu apake.

¹²Kake kajoki ntae, eidipa Elija ayeu, neitu eyielou ꞉ltung'ana aajo ninye ilo, kake eitaasita nenia pooki naayieu. Nejia sii etiu te Nkerai e Ltung'ani, ketum sina taa nkaik enche.>>

¹³Kore te inia kata, nening'u ꞉looiteng'eni nchere lomon le Yoana Laipatisani elikita.

¹⁴Kore payie epuonu ninche netii lturrur, nenyikaki ꞉ltung'ani obo Yeso, negilaki kung,

¹⁵ejo, <<Laitoriani ng'erru layieni lai, amu keata moyian e nkiterria naitamita sina kitok oleng. Kore nkatitin kumo naa kerriakino nkima tanaa sii nkare.

¹⁶Kayaka apa ninye looiteng'eni linono, kake meidim ninche aaichiunyie.>>

¹⁷Newoliki ꞉Yeso ajoki, <<Oi ntae ltung'ana lemeata nkurukoto, netopong'ori! Anu kenya aboitiere ntae, nang'iri o ntae? Eyautun layieni ene natii.>>

¹⁸Nebuaaki aing'ode lairiruai otii atua, neipung aing'uaa, neichiu ꞉layieni te inia kata.

¹⁹Nenyikaki ꞉looiteng'eni Yeso, aa ninche aapeny, neipar aajoki, <<Aanyo payie eitu kindim iyioo aaipung'ie ilo airirua?>>

²⁰Newoliki ajoki, <<Tankaraki nkurukoto kini niatata. Amu, kedede kajoki ntae, tiniatata nkurukoto nawuana lantararai kini,[30] indimdim aatiaaki ele donyuo, <Wuang'a tene chomo idie!> naa keiwuang alo, nemeata mbae nemeidimai taa ntae.[31]>>

²²Kore eiturrurro tenebo ta Galilaya, nejoki ꞉Yeso, <<Kore Nkerai e Ltung'ani naa kepiki nkaik ee ltung'ana,

²³neri metua, kore ta mparri e uni naa kepiu.>> Neiputukuny looiteng'eni oleng.

²⁴Kore payie ebaki Yeso o looiteng'eni Kapernaum, nepuonu laitalakunok le kodi e nkaji e Nkai netii Petero neipar aajoki, <<Amaa, mara kelak echi laiteng'enani linchi kodi e nkaji e Nkai?>>

²⁵Newoliki ajoki, <<Ee, kelak.>> Kore payie ejing'u Petero atua nkaji, neiro Yeso ewuon eitu eliki ꞉Petero mbaa naata. Neipar ajoki, <<Simon, nyo idolita iyie tana bae: Amaa laiguanak le nkop, ng'ae echi esotunyie ropiyiani naiturrurruni o kodi nalaki? Tee nkera enche ana too lkulie?>>

²⁶Kore payie ejo Petero, <<Too lkulie,>> nejoki ꞉Yeso, <<Kore naa, keata nkera lakunoto.

²⁷Kake kore payie mikintogor ꞉iyioo ninche, chomo tanang'aki lgiita otii ngamet naibung'ieki sinkirri atua mpaso. Kore sinkir lekue limbung, tobolo nkutuk! Kore payie ibol naa itumie ropiyia nabo. Niya aicho ninche metaa kodi ai o nino.>>