Read Samburu Matayo 18 Bible Online

Matayo 18 - Samburu bible

Matayo 18

¹Kore te inia kata nepuonu looiteng'eni netii Yeso neipar aajoki, <<Amaa dei, ng'ae sa lkitok te nkitoria e chumata?>>

²Neipot nkerai kini, neitacheyie te nkiji enche,

³nejo, <<Kedede kajoki ntae, kore tinimimbelekenyanya, nitiuu ana nkera kunini, nimijingjing aikata nkitoria e chumata.

⁴Naa kore pooki ng'ae oitodou koon tana ana kerai, naa ninye lkitok to pooki ng'ae te nkitoria e chumata.

⁵Naa kore pooki ng'ae ong'amaa nkerai kini natuwuana ana ta nkarna ai, naa nanu etang'amayie.

⁶<<Kake kore loitopong'oo nabo ee kuna kunini naairuko nanu meimina to nkurukoto, naa keikach teneenikini soit sapuk dapach oidong'ieki nkano murt, neimisieki te negut e mpaso.

⁷Oi siake nkop tankaraki mbaa naitopong'oo ltung'ana metaasa ng'ok! Meata ajo mepuonu kuna baa, kake oi siake ilo tung'ani oipung'unyie ꞉mbae naitopong'oricho!

⁸<<Kore tanaa nkaina ino anaa nkeju nikintopong'oo taasa ng'ok, tudung'u, nturrai! Amu naikach tinijing atua nkichon miata nkaina anaa nkeju alang tinikinang'akini nkima ee ntarasi iata nkaik o nkejek pukura.

⁹Naa tinikintopong'oo nkong'u ino taasa ng'ok, tukurtu, nturrai. Amu naikach tinijing atua nkichon, iata nkong'u nabo alang tiniata nkonyek pukura, nikinang'akini lmoti le nkima.

¹⁰Entodol emimen nabo ee kuna kunini. Amu kajoki ntae nchere, kore lmalaikani lenche naa kedol nkata pooki nkomom e Papa lai oti chumata.

¹¹Kore Nkerai e Ltung'ani, naa keyewuo aitejeu looimina.[32]

¹²<<Kaa idoldol ntae tana bae? Amaa teneata ltung'ani nkerra ip nabo, nepong'ori nabo aiminaa, aa meing'uaa ninye nenia kerra ntomoni saal o saal to lowua, nelo aing'oru inia nabo naimina?

¹³Naa kedede kajoki ntae, kore tenetum, neng'ida ninye naleng tankaraki inia ker nabo, alang nenia ntomoni saal o saal neitu eimin.

¹⁴Nejia naa etiu ta Papa linchi oti chumata, meyieu neimin hoo nabo ee kuna kunini.

¹⁵<<Tinikintarruoki lalache lino,[33] chomo ntoduaa ntorroni enye, aa iyie ake o ninye. Kore tinikining ninye, naaku itirrinyua lalache lino.

¹⁶Kake kore tenemening, chomo netii iata likae tung'ani obo oiruko anaa oare, paa <kore mbae pooki, nesipuni te limunoto ee ltung'ana oare anaa okuni.>

¹⁷Teneany ening ninche, tiliki nkanisa, naa tenemening abaki nkanisa, nchoo eaku te iyie ana ltung'ani loo loreren lemeyielo Nkai anaa laitalakunoni le kodi.

¹⁸<<Kedede kajoki ntae, kore ntoki pooki nienien to nkop naa keena te chumata, naa kore pooki nilakuku to nkop naa kelakuno te chumata.

¹⁹<<Kajoki sii aitoki ntae, tenening'okino ltung'ana oare taa ntae mbae naje naomonoki to nkop, naa keitaas ntae Papa lai oti chumata.

²⁰Amu kore netumore oare anaa okuni ta nkarna ai, naa katii atua ninche te inie.>>

²¹Nelotu Petero netii Yeso, neipar ajoki, <<Laitoriani, nkatitin aja aaitarroki ꞉lalache lai, apaliki? Nkatitin sapa?>>

²²Newoliki ajoki, <<Kore naajoki, mara nkatitin sapa, kake nkatitin ntomoni sapa o sapa.[34]

²³<<Naaku kore nkitoria e chumata, naa inji etuwuana ana ltung'ani oitoreicho oyieu neing'uraa silen enyena, naata laisiaayiak lenyena.

²⁴Kore payie eng'asu ninye nkikena, neyakini ninye ltung'ani oata sile ee ropiyiani kumo oleng, nemeatae hoo ltung'ani obo oidim atalaa.[35]

²⁵Kore tankaraki natala ninye ntoki nalakie inia sile, neitanapicho lkitok lenye metimiri ninye o ntomononi enye o nkera enyena o ntokitin pooki naata payie elakieki sile naata.

²⁶Nenang nkop ꞉ilo aisiaayiani, nelej ajoki, <Lokitok ting'iria, nikianyu, payie aalaaki ntoki pooki.>

²⁷Neduaaki ilo kitok lng'ur, nepalaa mechomo. Kore inia sile naata, nepaliki.

²⁸<<Kake kore payie eipung ilo aisiaayiani, netum lobo loo lboitieii lenyena, oata sile enye ee nkuti ropiyiani,[36] neibung lgos, nejoki, <Talaa taata sile ai!>

²⁹Nerriakino ꞉lboitiei lenye nkejek enyena, nelej ajoki, <Ting'iria, nikianyu naa kaalaaki.>

³⁰Kake neany. Nelo aing'uaa, neichooyo metanang'akini ninye jila ana metalaaki inia sile.

³¹Kore payie edol lboitieii lenyena naataasate, neisinanio oleng, nepuo aaliki lkitok lenche nenia baa pooki.

³²Kore inia kata, neipot ꞉lkitok ninye nejoki, <Iyie laisiaayiani torno! Kaatapalika apa sile pooki niata tankaraki nikiteleja.

³³Amaa, meyiere apa ning'urrie lboitiei lino ana naikuna nanu paaing'urrie iyie?>

³⁴Kore to ngoro, nepik nkaik ee larripok le jila, lemeata lng'ur, meitama sina ana metalaa sile enye pooki.

³⁵<<Nejia naa abaki eiko Papa lai oti chumata ntae peechu naa ipalikiki lalachera linchi taatua ltauja linchi.>>