Read Samburu Matayo 19 Bible Online

Matayo 19 - Samburu bible

Matayo 19

¹Kore payie eidip Yeso atejo kuna baa, neing'uaa Galilaya, nebaki nkop ee Lyiaudi natii teidialo sere e Yordan.

²Neirukurukore ninye ꞉lturrurri kumo, neichiunyie ninche teinie.

³Netii apa lkuti Parisayo ootuo neti aatem. Neipar ninye aajoki, <<Amaa! Keichiaakino tenear ꞉lpayian nkauti e mparratut enye ta mbae naje?>>

⁴Newoliki ajoki, <<Eitu isomsom too Lkigerot aajo, <Kore ta ng'asunoto naa keitibira ꞉Laitibirani ninche, lee o lipong?> >>

⁵Neitoki ajo, << <Kore tankaraki inia, naa keing'uaa lee ng'otonye o menye, neibung'are mparratut enye, neaku pukura sesen obo.>

⁶Metaa merekure era seseni oare, kake sesen obo. Neaku, kore inia naitutumo Nkai, mincho ltung'ani eor.>>

⁷Neitoki aaipar aajoki, <<Aanyo naa payie eitanapichie apa Musa ajo keidim lee aichoo ntomononi enye mpalai naitodolu ajo ketara nkauti, nemiraa mechomo?>>

⁸Newoliki Yeso ajoki, <<Kore tankaraki nagol ltauja linchi, neichoo apa Musa ntae entar nkauti ee ntomonok inchi. Kake metiu nejia apake ta ng'asunoto.

⁹Kajoki ntae nchere, kore pooki ng'ae oar nkauti e mparratut enye mara ake tankaraki loloito, neigil ayemicho, naa etaasa loloito.>>

¹⁰Nejoki ꞉looiteng'eni, <<Tanaa inji etiu mbaa terichet lpayian o mparratut naa naikach payie meyemichoe.>>

¹¹Newoliki ꞉Yeso ajoki, <<Mara ltung'ana pooki ooning'u ele rerei, kake lolo ake ooidimieki metining'u apake.

¹²Amu keatae ltung'ana ootiiwuaki era lmong'i, netii looidong'oki metaa lmong'i, o lkulie ooitaa ate lmong'i tankaraki nkitoria e chumata. Kore ilo oidim atining'u ana, nchoo ening'u!>>

¹³Kore tesiedi inia, neyauni nkera kunini netii Yeso meiteleki nkaik, netum atoomono. Neicho looiteng'eni, nebuaaki aaing'ode lolo oyeutua nkera.

¹⁴Kake nejo Yeso, <<Enchoo nkera kunini epuonu nati nanu, emimbooyo, amu kore nkitoria e chumata, naa noo lolo ootuwuana ninche.>>

¹⁵Neiteleki ninche nkaik, nelo aing'uaa inie.

¹⁶Netii apa inia kata ltung'ani obo oyewuo netii Yeso, nejoki, <<Laiteng'enani kaa bae supat eyiere naas, paatum nkichon nemeiting?>>

¹⁷Newoliki Yeso ajoki, <<Aanyo payie ikimparita mbae naipirita ntoki supat? Lobo ake supat! Kore tiniyieu nijing atua nkichon, mbung'a nkitanapat.>>

¹⁸Neipar ꞉ilo tung'ani ajoki, <<Akua?>> Newoliki ꞉Yeso ajoki, << <Miar metua, miloloito, mipurrucho, minteeniki likae sapare,

¹⁹iyanyita papa lino o ng'utunyi> naa <Tachama le latia ino ana koon.> >>

²⁰Nejo ilo barnoti, <<Kaibung'a kuna pooki. Nyo nkae newuon aang'oriki?>>

²¹Newoliki Yeso ajoki, <<Tiniyieu niaku loitabayie pooki, chomo timira ntokitin niata, nincho laisinak, naa itum iyie parakuoicho te chumata, nikilotu taa airukurukore nanu.>>

²²Kore payie ening ilo barnoti ele rerei, neipung alo etanyamala, amu keiparakuoni apa ninye oleng.

²³Nejoki ꞉Yeso looiteng'eni lenyena, <<Kedede kajoki ntae, kegol payie ejing ltung'ani parakuoni nkitoria e chumata.

²⁴Kajoki aitoki ntae, kelelek payie eim ntames udoto e ltudu alang ltung'ani parakuoni tenejing nkitoria e Nkai.>>

²⁵Kore payie ening looiteng'eni ele rerei, neing'asia ninche oleng, nejo, <<Ng'ae naa eidimi aaitejeu?>>

²⁶Neing'or ꞉Yeso ninche nejo, <<Kore too ltung'ana, nemeidimai ana, kake kore ta Nkai, naa keidimai ntokitin pooki.>>

²⁷Neng'amaa ꞉Petero ajoki, <<Ng'ura, ikitung'aitie ntokitin pooki, nikirukurukore iyie! Nyo naa kitum iyioo?>>

²⁸Nejoki ꞉Yeso ninche, <<Kedede kajoki ntae, kore kenya teneiteng'ejuki ntokitin pooki, inia kata ewuon Nkerai e Ltung'ani to lorika lenye le nkitoo oipilpil te nkitoo enye, naa iwuenini sii ntae /likirukurukore nanu too lorikan tomon o oare, ninguanarere loochi mareita tomon o oare le Isirael.

²⁹Naa kore pooki ng'ae otung'ayie nkajijik anaa lalachera anaa nkanachera anaa papa lenye anaa ng'otonye anaa nkera anaa lchampai, tankaraki nanu naa keng'amaa nkatitin ip alang naatung'ayie apa, nejung nkichon nemeiting.

³⁰Kake kore lkumo oara lekue tana kop, naa keaku kenya le siedi, naa kore le siedi tana kop, neaku kenya lekue.>>