Read Samburu Matayo 2 Bible Online

Matayo 2 - Samburu bible

Matayo 2

¹Kore apa eidipaki aatiiu Yeso te lkerenket le Beteleem le nkop e Yudea, ta ng'amata e nkitoria e Lkinkii Erode, nepuonu loibonok laa lakir ooing'uaa ng'oji neiliepunyie ndama aabaki Yerusalem,

²ejo, <<Aji etii ilo kinkii loo Lyiaudi otiiwuaki? Ikitoduaa lakira lenye eiliepu to ng'oji neiliepunyie ndama, nikiotuo aasai ninye.>>

³Kore payie ening ꞉Lkinkii Erode kuna baa, nenyamalu o Yerusalem pooki.

⁴Neiturrurru laitainok kutuaa la lasar o laiteng'enak loo nkitanapat, neipar ng'oji neikini Mesia.

⁵Newoliki ꞉ninche aajoki, <<Te Beteleem e Yudea amu inji apa eikuna ꞉Nkai payie eiger to loiboni lenye:

⁶ <Kore iyie Beteleem te nkop e Yuda, mira hoo kini taa larikok le Yuda, amu iyie eipung'unyie ꞉larikoni oaku lchekut loo ltung'ana lainien, Isirael.> >>

⁷Neipot aitoki ꞉Erode loibonok laa lakir too nkurrat payie etum ateyielo sipata e ng'amata naipung'ua ilo akira.

⁸Neipaaya ninche Beteleem nejoki, <<Enchom enterrerrekuanu aasipu mbaa e inia kerai. Naa kore ake payie itumtum, nikirewakiki sii nanu lkilikuai paa alo asai ninye.>>

⁹Kore payie ening inia natejo lkinkii, neibung nkoitiei aapuo. Nerikoo tekue ꞉ilo akira apa otoduaa te nkiliepunoto e ndama ana meitacho te keper e ng'oji netii nkerai,

¹⁰neng'ida ninche oleng, payie edol ilo akira.

¹¹Nejing nkaji, nedol nkerai o ng'otonye naji Maria, neirrigokino ꞉ninche ninye aasai. Neitoki aalak lbenia lenche ootii ntokitin naagol nkinyiang'a, neicho ninye nkichoorot, e saabu[5] o ne naing'urre e silalei o ne mir.

¹²Neitaarriyian ninche ꞉Nkai te nkidetidetata payie merrinyokino Erode, neim nkae oitiei aapuo nkop enche.

¹³Kore payie eidip lolo oibonok laa lakir aatirrinyoto, neipung'oki ꞉lmalaika la Laitoriani Yosep te nkidetidetata nejoki, <<Inyuo tarrapu nkerai o ng'otonye sigaki Misiri, niwuon te inie ana maatiliki. Amu keyieita ꞉Erode nkerai payie ear.>>

¹⁴Kaa hae, neinyuototo ninye kuarie, nerrapu nkerai o ng'otonye nelo Misiri.

¹⁵Newuon te inie ana metua Erode, payie ebaya natejo ꞉Laitoriani to loiboni lenye, payie ejo, <<Kaipotua layieni lai te Misiri.>>

¹⁶Kore payie edol Erode ajo ketasapa ꞉lolo oibonok ninye to loseg, negoro oleng. Nereu ltung'ana lkerenket le Beteleem o lubot pooki, neitanap metara layiok pooki ooitabakita larin oare nerrinyo siedi, airirikinore inia ng'amata apa natilikita ninye ꞉loibonok laa lakir.

¹⁷Kore inia kata, nebaya rerei apa otejo ꞉Nkai to Loiboni lenye Yeremia payie ejo,

¹⁸<<Etining'ie ltoilo te lkerenket le Rama, lkichirai o lkiyioi kitok, eichiraki ꞉Rael [6] nkera enyena, netanya ninye eitigiri, amu merokure eatae ninche.>>

¹⁹Kore tesiedi lkiye le Erode, neipung'oki ꞉lmalaika la Laitoriani Yosep te nkidetidetata te Misiri

²⁰nejoki, <<Inyuo, iwa nkerai o ng'otonye, chomo nkop e Isirael, amu etuata apa lolo ooiyieu near metua.>>

²¹Kaa hae, neinyuototo ꞉Yosep nerriny nkerai o ng'otonye aya nkop e Isirael.

²²Kore payie ening ajo keitorita ꞉Arkilo nkop e Yudea ta mpaach e papa lenye Erode, neuriei achomo inie. Kake kore amu ketukurrakaki apa ninye te nkidetidetata, neroyie alo mbata e Galilaya,

²³nelo amany lkerenket le Nasaret. Neaku etabayie napa natejoki too loibonok le Nkai, <<Keipoti ninye aajo le Nasaret.>>