Read Samburu Matayo 20 Bible Online

Matayo 20 - Samburu bible

Matayo 20

¹<<Amu kore nkitoria e chumata naa inji etuwuana ana lkitok apa openy nkang, oterriaa ta siran alo aiger laisiaayiak metaasa siaai ta lchampa lenye loo lmusabibu.

²Kore payie ening'okino o laisiaayiak lenyena ajo dinari nabo elak ninche ta mparri, nereu ninche mechomo aasicho te ilo champa lenye.

³Kore peaku, matejo saai uni, neitoki aipung alo aiger laisiaayiak, nedol lkulie tung'ana to ng'oji nemirichiereki, meitoki easita.

⁴Nejoki ninche, <Enchom sii ntae entaas siaai ta lchampa lai, naa kaicho ntae ntoki nairirikino.>

⁵Nepuo ninche inie. <<Neitoki ake aipung, matejo, saai ile o saai saal, neas naduo nataasa tekue.

⁶Kore payie ebaki, matejo, saai tomon o obo, neipung, netum aitoki lkulie eitachoo. Neipar ninche ajoki, <Aanyo payie intachoo ta mparri pooki, meitoki iasitata?>

⁷Newoliki aajoki, <Tankaraki meatae naa ltung'ani oigero iyioo mataas siaai.> Nejoki ninche, <Enchom abaki ntae, entaas siaai ta lchampa lai.>

⁸<<Kore payie ebaki teipa, nejoki ꞉lopeny lchampa laitachekinoni, <Mpoto laisiaayiak, nilak ninche ang'asunyie lootisiraki tesiedi ana metabaki looigeroki tekue.>

⁹<<Kore payie epuonu lolo aisiaayiak ootisiraki saai tomon o obo, meata leitu elaaki dinari nabo.

¹⁰Naa kore payie epuonu lolo ootisiraki tekue, nejo kebaki nelaki ninche nkumo, kake meata sii leitu eichori dinari nabo.

¹¹Kore payie eng'amaa inia dinari, neng'asu aaing'unyung'unyaki lopeny lchampa,

¹²ejo, <Kore kulo tung'ana ootisiraki tesiedi, naa saa nabo ake etaasa siaai, kake intirisioka iyioo ooting'iria nkirochi e siaai e mparri pooki o nkirewuaj e ndama.>

¹³<<Newoliki ꞉ninye lobo loo lolo aisiaayiak ajoki, <Lchore, maaitarruokita! Mara ikitining'ore duo payie ias siaai te dinari nabo?

¹⁴Iwa ntoki nara nino, chomo! Nanu ake oyieu paaicho ele tung'ani otisiraki tesiedi narisiere naaichoo iyie.

¹⁵Meichiaakino payie aitaas ntokitin ainien ana nayieu? Tana iata lom tankaraki ltung'ani supat ara?>

¹⁶Nejia naa etiu, keaku le siedi lekue, neaku lekue le siedi.>>

¹⁷Kore eloito Yeso Yerusalem, neiwuang'ie looiteng'eni pukura tomon o oare nejoki,

¹⁸<<Entining! Ikiliepita aapuo Yerusalem, naa kepiki Nkerai e Ltung'ani nkaik ee lkutuaa laa laitainok la lasar o naa laiteng'enak loo nkitanapat. Nedung'oki nkiguana e lkiye,

¹⁹nepiki aitoki ninye nkaik ee laitoriak loo Rroman meikordodo, neidong, nechei to lmusalaba. Kore ta mparri e uni, nepiu.>>

²⁰Nelotu nkitok e Sebedayo tenebo o layiok lenyena oare netii Yeso, negilaki kung, neomon metaasaki ntoki nabo.

²¹Neipar ꞉Yeso ajoki, <<Nyo iyieu?>> Nejo, <<Nchoo metaa kore kenya te nkitoria ino, kewuon layieni lai obo ta nkaina ino e tetene, newuon likae ta nkaina e kidienye.>>

²²Nejoki Yeso ninche, <<Miyielolo ntoki niomonutata! Indimdim aaimai sina lalo kenya aimaa?[37]>> Neng'amaa aajoki, <<Ee, ikindim.>>

²³Nejoki, <<Ee, iimaa dei sina lai, kake kore wuanata nawuenie tetene o kidienye ai, naa maitore nanu, amu noo lolo ooitibiraka Papa lai.>>

²⁴Kore payie ening ꞉lolo kulie ooiteng'eni lenyena tomon inia, negoro ninche tankaraki lolo alachera oare.

²⁵Neipotu ꞉Yeso ninche nejoki, <<Iyielolo naa aajo kore laitoriak loo loreren naa keibooki ninche nkop, nebuaaki sii ꞉lkutuaa lenche.

²⁶Kake kore taa ntae, naa metiu nejia. Amu kore loyieu neaku kitok taa ntae, naa keyiere payie eaku laisiaayiani linchi.

²⁷Naa kore pooki ng'ae oyieu neaku lekue, naa keyiere payie eaku rrindik linchi,

²⁸ana neikuna Nkerai e Ltung'ani. Eitu elotu ninye meisiaai, kake keyewuo aisiaaicho, neitai nkichui enye alakunyie lkumo.>>

²⁹Kore eloito Yeso o looiteng'eni lenyena aaing'uaa Yeriko, neirukurukore ninye lturrur kitok.

³⁰Netii lmodook oare oowueni tabata inia oitiei. Kore payie ening aajo keimita Yeso inie, nebuak to ltoilo aajo, <<Laitoriani, Layieni le Daudi, ng'erru iyioo!>>

³¹Kore ꞉ilo turrur, nebuaaki ninche aaing'ode metigirata, kake nebuak lolo modook to ltoilo sapuk oleng aajo, <<Laitoriani, Layieni le Daudi ng'erru iyioo!>>

³²Neitache Yeso neipot ninche. Neipar ajoki, <<Nyo iyieuu naitaas ntae?>>

³³Newoliki aajoki, <<Laitoriani ikiyieu nibol iyioo nkonyek.>>

³⁴Neing'erru ꞉Yeso ninche, neiseyie nkonyek enche, nedolichoi ninche nabokata, neirukurukore ninye.