Read Samburu Matayo 21 Bible Online

Matayo 21 - Samburu bible

Matayo 21

¹Kore payie enyikaki ꞉ninche Yerusalem, netabakita Betepage, natii Lowua loo Lng'erriyio, neipaaya Yeso looiteng'eni oare

²ajoki, <<Enchom idia ang natii idie, naa kore ake inia kata, itumtum sikiria naena teinie, eboitiere lkurrarru lenye. Entalaku, nikirikokiki.

³Tenejoki ntae ltung'ani mbae, entiaki, <Laitoriani oyieu ninche,> naa kepalu nabokata.>>

⁴Ketaase ana payie ebaya apa nairoro loiboni le Nkai ajo,

⁵<<Tiaaki Nkoliontoi e Sion,[38] <Ng'ura, kelotu lkinkii lino nitii, ebor, nedirita sikiria, edirita lkurrarru, ilo lkurrarru le sikiria.> >>

⁶Nepuo looiteng'eni, neas ana naitanapa ꞉Yeso.

⁷Neriku sikiria o lkurrarru, neiteleki nankan enche nkeper e inia sikiria o ilo kurrarru, nedir ꞉Yeso awuenie nkeper.

⁸Nesapan lturrur kitok oleng nankan enche to nkoitiei, nedung'u sii ꞉lkulikae mbene ee lkeek aasapan.

⁹Kore ilo turrur otii tekue ninye o ilo oirukurukore tesiedi, nebuak aajo, <<Hosana[39] ta Layieni le Daudi! Emayiana ilo olotu ta nkarna e Laitoriani! Hosana te chumata!>>

¹⁰Kore payie ejing Yeso Yerusalem, neing'olng'ola lkerenket pooki nejo, <<Ng'ae ele?>>

¹¹Newoliki ꞉ilo turrur ajo, <<Yeso ele, ilo oiboni le Nkai le Nasaret e Galilaya.>>

¹²Nejing Yeso atua nkaji e Nkai, nemiraa lolo pooki apa oomiricho o looinyiang'icho.[40] Neuroki nkop misaii ee lolo ooibelekeny ropiyiani o lorikan loo lolo oomirita nkutukurruki.

¹³Nejoki ninche, <<keigero ajo, <Kore Nkaji ai, naa keji nkaji e nkomono,> kake intaa ntae <nkapune ee lapurrok.> >>

¹⁴Nepuonu lmodook o lootigiligilete, etii ninye nkaji e Nkai, neichiunyie ninche.

¹⁵Kake kore payie edol lkutuaa laa laitainok la lasar o laiteng'enak loo nkitanapat mbaa e nking'asia naataasa ninye, neitoki aadol nkera ebuakita ta nkaji e Nkai aajo, <<Hosana ta Layieni le Daudi,>> negoro ninche.

¹⁶Neipar Yeso aajoki, <<Ining'ito nejoito kuna kera?>> Newoliki ajoki, <<Ee, eitu apake isomsom, <Too nkutukie ee nkera o nee nana newuon enakita lki indimie mikisisa iyie>?>>

¹⁷Kore payie eing'uaa ninche, neipung te lkerenket alo Betania, nejeyio te inie.

¹⁸Kore naikenyunyie, errinyo Yeso alo lkerenket, near ꞉sumach.

¹⁹Kore payie edol lng'aboli tabata nkoitiei, neiwuang'aki, kake eitu etum toki mara ake mbene. Nejoki ilo ng'aboli, <<Oi mintoki aikata aiu lng'anayioi!>> Netoii ilo cheni nabokata.

²⁰Kore payie edol ꞉looiteng'eni inia, neing'asia, neiparicho aajo, <<Aji eikuna lng'aboli payie etoi nabokata?>>

²¹Newoliki ꞉Yeso ajoki, <<Kedede kajoki ntae, tiniatata nkurukoto nemetii lng'ach, mara ake inia naitaasaki lng'aboli indimdim aataas, kake indimdim abaki aatiaaki ele donyuo, <Mikitodotuni, nikuurokini mpaso!> Naa keasai inia.

²²Naa kore pooki niomonmon Nkai to nkurukoto, naa itumtum.>>

²³Kore payie ejing Yeso nkaji e Nkai, nepuonu lkutuaa laa laitainok la lasar o lpayiani loo lyiaudi netii ninye, eiteng'enicho. Neipar aajoki, <<Taa kitoria iasita kuna baa, naa ng'ae likinchoo ana kitoo?>>

²⁴Newoliki ꞉Yeso ajoki, <<Kaipar sii nanu ntae nkipara nabo, naa kore tinikiwolikiki, naliki sii nanu ntae ajo taa kitoo aasita kuna baa.

²⁵Amaa, apa nkipatisare e Yoana, aji eing'uaa? Chumata ana ltung'ana?>> Nenyakino maate aajokino, <<Kore tinikijo <Chumata eing'uaa,> naa keipar iyioo ajoki, <Oo apa payie eitu irukruk ninye?>

²⁶Naa kore tinikijo <Ltung'ana eing'uaa,> nikiurie ilo turrur, amu kewuon eiken ltung'ana pooki aajo kera apa Yoana loiboni le Nkai.>>

²⁷Newoliki aajoki, <<Mikiyielo iyioo.>> Nejoki ꞉Yeso, <<Maliki sii nanu ntae ajoki te nkitoo e ng'ae aasita kuna baa.

²⁸<<Kaa ijoijo tana? Eti apa lpayian obo oata layiok oare. Nelo netii lekue nejoki, <Nkerai ai, chomo anapar taasa siaai ta lchampa loo lmusabibu.>

²⁹Newoliki papa lenye ajoki, <Malo.> Kake kore tesiedi, nedol ajo keitarruoyie, nelo aas ilo siaai.

³⁰Neitoki alo netii layieni lenye le oare, nejoki ana netiaka duo lekue. Newoliki ajoki, <Ayia, kalo papa lai!> Kake eitu elo.

³¹<<Amaa, too kulo ayiok oare, alo oataasa nayieu ꞉papa lenye?>> Newoliki ꞉ninche aajoki, <<Ilo lekue,>> Nejoki ꞉Yeso, <<Kedede kajoki ntae, kore laitalakunok le kodi o milayoni, naa kejing'ita nkitoria e Nkai tekue ntae.

³²Amu keyewuo Yoana Laipatisani eitodol ntae nkoitiei nayau sotua oipida o Nkai, neitu irukruk, kake keiruko laitalakunok le kodi o milayoni. Naa kore abaki itodua kuna, eitu irriidudu, nirukuruk ninye.

³³<<Entining nkae kitanyanyukoto: Eatae apa ltung'ani openy nkang otuuno lchampa loo lmusabibu, neigilunyie wuata, netur udoto naironyieki lolo ng'anayio, nechet ltalet, neiger laturok, nelo nkop nalakua.

³⁴Kore payie enyiku ng'amata naku lng'anayio, neipaaki laisiaayiak lenyena lolo aturok, metobosoki lolo ng'anayio ooikenakino ninye.

³⁵Kore ꞉lolo aturok neibung laisiaayiak lenyena, neidong lobo, near likae metua, nenang likae metua too soito.

³⁶Neipaaya aitoki lkulie aisiaayiak kumo oaalang laapa lekue, neitaas aitoki ninche nejia.

³⁷Kore tesiedi, neirruaaya layieni lenye ejo, <Keyanyit ana kerai ai.>

³⁸Kake kore payie edol ꞉lolo aturok ilo ayieni lenye, nejokino maate, <Ele taa lajung'oni, matar payie kiya njung'ore.>

³⁹Neibung ninye, nenang'aa aaipung'ie te ilo lchampa, near metua.

⁴⁰<<Amaa sa kenya tenelotu lopeny lchampa, aji eiko lolo aturok?>>

⁴¹Newoliki ꞉ninche Yeso aajoki, <<Keidakie lolo aturok torrok, neiger lkulikae oicho ꞉ninye lng'anayio lo lchampa ta ng'amata nakunyie.>>

⁴²Nejoki ꞉Yeso ninche, <<Eitu apake isomsom too Lkigerot: <Kore soit oatanya ꞉lachetak, ninye oataa soit le tipat oirichiu nkaji, Laitoriani eing'uaa ꞉ele soit, naa le nking'asia too nkonyek ang>?

⁴³<<Kore tankaraki inia, kajoki ntae nchere, keoruni ntae nkitoria e Nkai, neichori ltung'ana oiu lng'anayio lenyena.

⁴⁴Naa kore lorriakino nkeper ele soit negiligila aorooro, naa kore ilo tung'ani osulakino, neikaskas.>>

⁴⁵Kore payie ening ꞉lkutuaa laa laitainok la lasar o Lparisayo nkitanyanyukot naatejo Yeso, neyielou aajo mbaa naaipirita ninche eirorita.

⁴⁶Kake kore payie esaan aajo embung'a ninye, neuriei lturrurri, amu kedol ninche aajo loiboni le Nkai Yeso.