Read Samburu Matayo 22 Bible Online

Matayo 22 - Samburu bible

Matayo 22

¹Neitoki Yeso airorie ninche tee nkitanyanyukot ajoki,

²<<Kore nkitoria e chumata, naa keinyinyukore lkinkii oitaka layieni lenye latim le nkiyema.

³Neipaaya laisiaayiak lenyena meipoto lolo pooki ooitoomonoki inia kiyema. Kake neany ninche epuonu.

⁴Neitoki aitoki aipaaya lkulie aisiaayiak ejo, <Entiaki lolo pooki ooitoomonoki nchere, <<Kore taata, kaidipa aitibira ndaa, naa keyiang'a lmong'i o nkichu ainien naapir, neidipie ntoki pooki. Ootu latim.>> >

⁵<<Neany epuo, nepuo aas siaitin lenche. Kechomo lobo lchampa lenye, nelo likae nkinyang'a o mirare enye.

⁶Kore lolo leitu epuo, neibung lolo aisiaayiak lenyena, neitaas ninche mbaa torrok, near metuata.

⁷Kore ilo kinkii, negoro, Neirruaaya njore enye netii lolo oaatara laisiaayiak lenyena, neidakie, nepejoo lkerenketi lenche.

⁸Kore tesiedi inia, nejoki laisiaayiak lenyena, <Keidipunye latim, kake nemeichiaakino lolo ooitoomonoki payie enya.

⁹Enchom naa ntumot ee nkoito naalala naapach lkerenket, nintoomonono lolo pooki litumtum meotu latim.>

¹⁰Neipung lolo aisiaayiak aapuo nenia oito naalala, neiturrur lolo pooki ootumo, nemenya ajo ltorrok anaa supati, neiputi nkaji e latim.

¹¹<<Kake kore payie ejing'u ilo kinkii aduaare lomon lenyena, nedol te inie ltung'ani lemeata nkilani e latim.

¹²Nejoki ninye, <Lchore, aji nkuna pii ijing'u ene miata nkilani e latim?> Nelau ꞉ilo tung'ani wolet.

¹³<<Nejoki ꞉ilo kinkii laisiaayiak, <Enteen ninye nkaik o nkejek, nimpung'ieng'ie aanang'aki atua naimin e aulo, ng'oji neichirieki, neonyieki lala te mion.

¹⁴Amu lkumo eipotoki, kake lkuni oogeluno.> >>

¹⁵Kore inia kata, nepuo Lparisayo aaiguana pee edol neiko teneibung Yeso to loseg tankaraki nkiroroto enye.

¹⁶Neirruaaya looiteng'eni lenche tenebo o lolo otii mbata e Erode netii Yeso, nejoki, <<Laiteng'enani, ikiyielo aajo ira ltung'ani loosipat, ninteng'en sii nkoitiei e Nkai te ndedei, nimintaa toki mbaa naajo ꞉ltung'ana, amu miing'or iyie nkitoo e ltung'ani.

¹⁷Tiliki naa iyioo, kaa idol iyie? Keichiaakino tenelaakini Kaisari kodi tana meichiaakino?>>

¹⁸Kake kore amu keyielo Yeso ntorno enche, nejoki, <<Ntae looitaakino! Aanyo payie kitemtem?

¹⁹Entoduaaki ropiyia e kodi.>> Kore inia ropiyia naa keji aitoki dinari. Neyaki ninye.

²⁰Nejoki, <<Ne ng'ae ana omom? Oo lkigerot, keigero ajo ng'ae?>>

²¹Newoliki ꞉ninche aajoki, <<Ne Kaisari.>> Nejoki ꞉Yeso, <<Enchoo naa Kaisari nenia naara ne Kaisari, ninchocho Nkai nenia naara ne Nkai.>>

²²Kore payie ening ꞉ninche inia, neing'asia oleng, nepuo aaing'uaa ninye.

²³Kore aitoki inia parri, nepuonu Sadukayo neti Yeso. Kore apa ninche naa keiruk aajo meatae mpiunoto. Neipar

²⁴aajoki, <<Laiteng'enani, ketejo apa Musa, kore teneye ltung'ani meata nkera, naa meata ajo meeyem ꞉lalache lenye inia oiliai, payie eiiki ilo alache lenye nkera.

²⁵Keatae apa lalachera sapa taatua iyioo. Kore lekue neyemicho, neye meata nkera, neing'uaki lalache lenye inia kitok.

²⁶Neasai aitoki inia te le oare o te le okuni ana metabaki le sapa.

²⁷Kore tesiedi ninche pooki, neye inia kitok.

²⁸Amaa kenya ta mparri e mpiunoto, nkitok e ng'ae too lolo sapa eaku ninye, amu keyema ꞉ninche pooki?>>

²⁹Kake newoliki ꞉Yeso ninche ajoki, <<Itopong'ori amu miyielolo Lkigerot tanaa sii ngolon e Nkai.

³⁰Amu kore kenya te mpiunoto meyemicho ltung'ana, nemeyemi, kake ketuwuanai ana lmalaikani le chumata.

³¹Amaa taa mbaa naaipirita mpiunoto ee lootuata, eitu isomsom netiiaka apa ntae Nkai payie ejo,

³²<Nanu Nkai e Abraam o ne Isaka o ne Yakobo?> Mara ninye Nkai e lootuata kake noo looichu.>>

³³Kore payie ening lturrurri ninye, neing'asia oleng te inia kiteng'ena enye.

³⁴Kore payie ening Lparisayo aajo eitigira ꞉Yeso Sadukayo, netumo aaiguana.

³⁵Kore payie eidip aaiguanata, nelo lobo lenche oara laiteng'enani loo nkitanapat e Musa atem ninye, neipar ajoki,

³⁶<<Laiteng'enani, amaa tee nkitanapat e Musa, kaa naisul pooki?>>

³⁷Nejoki ꞉Yeso ninye, << <Tachama Laitoriani Nkai ino ta ltau lino pooki o te nkichui ino pooki o te ng'eno ino pooki.>

³⁸Ana taa nkitanapata kitok too pooki, naa ninye nekue.

³⁹Kore ne are nainyinyukore inia, naa ana, <Tachama le latia ino ana koon.>

⁴⁰Kore kuna kitanapat pukura are, naa ninche eitacheyie nkitanapat pooki e Musa o loibonok le Nkai.>>

⁴¹Kore payie eiturrurro Lparisayo, neipar ꞉Yeso ninche

⁴²ajoki, <<Amaa, kaa ijoijo ntae naipirita Kristo, ilo Aitejeunoni lianyutata? Layieni le ng'ae ninye?>> Nejoki ꞉ninche, <<Layieni le Daudi.>>

⁴³Nejoki ꞉Yeso, <<Aji naa eikuna Daudi payie eipot ninye ajo <Laitoriani> eidimie ꞉Ltau Sinyati? Amu kejoito ninye,

⁴⁴<Kore Laitoriani, naa ketiaka Laitoriani lai, <<Towuana ta mbata ai e tetene, ana maichoo lmang'ati linono ndacha murto.>> >

⁴⁵<<Amaa naa, tanaa keipot ꞉Daudi ninye ajo <Laitoriani> aji eiko payie era Kristo layieni lenye?>>

⁴⁶Kake nemetii hoo lobo oidima atowoliki ninye toki. Naa kore ang'asu inia parri, meatae ltung'ani oitieu aipara ninye likae rereii.