Read Samburu Matayo 24 Bible Online

Matayo 24 - Samburu bible

Matayo 24

¹Kore payie eipung Yeso eing'uaa nkaji e Nkai, nepuonu looiteng'eni lenyena aautaki nchetat naapaacha ta nkaji e Nkai.

²Newoliki ajoki, <<Ee, mara ing'oritata kuna tokitin pooki? Kedede kajoki ntae, meatae hoo soit obo oing'uari eitelekino likae, eitu edotori.>>

³Kore ewuon Yeso to Lowua loo Lng'erriyio, nepuonu looiteng'eni aa ninche aapeny netii ninye nejoki, <<Tiliki iyioo ng'amata naasai kuna, naa nyo nkitodolunoto e lotunoto ino o ne nkiting'oto e nkop?>>

⁴Newoliki ꞉Yeso ajoki, <<Errita ate payie meitopong'ori ntae.

⁵Amu kepuonu lkumo ta nkarna ai ejo, <Nanu Mesia,> neitopong'oo lkumo.

⁶Naa Ining'ning larrabali o lomon laa larrabali, kake entodol emiguretu, amu meata ajo mepuku kuna, kake ewuon ake eng'or nkiting'oto.

⁷Keinyuototo locho arare likae ocho, nera nkitoria o nkae nkitoria, nepuku lameii o nkikirikirot e nkop too ng'ojitin kumo.

⁸Kore kuna pooki naa ng'asunoto e mion e saisai.

⁹<<Neichoori ntae entum sina, neri ntae entuata, neibaii ntae lochon pooki tankaraki nkarna ai.

¹⁰Naaing'uaa ꞉lkumo, nelikoro too lkutuaa, neibaino.

¹¹Naa keipung'u loibonok kumo le sapare, nesap lkumo.

¹²Naa kore tankaraki natoponari ntorrok, neiropiju nchaman ee lkumo.

¹³Kake kore ilo ong'iri ana metabau nkiting'oto, neitejeuni.

¹⁴Kore lolo Omon Supati le nkitoria naa kelikori to nkop pooki nalulung'a payie eaku limunoto too lochon pooki. Kore tesiedi, nelotu nkiting'oto.

¹⁵<<Enchoo laisomani ening'u nairoro apa loiboni le Nkai Daniel naipirita ntaboi nayau mutai. Kore tinidoldol inia eitache to Ng'oji sinyati,

¹⁶enchoo lootii nkop e Yudea eisigaki lowuan.

¹⁷Kore ilo otii nkeper e nkaji emincho edou alotu aya ntokitin natii atua nkaji enye.

¹⁸Naa kore ilo otii atua lchampa, emincho errinyunyie aya nkila enye.

¹⁹Oi siake nenia naatunutete o naaitanakicho tee nenia perot!

²⁰Entoomon, payie meaku nkisigata inchi ne ng'amata e nkijepe o ne mparri e Sabato.

²¹Amu kelotu kenya sina kitok, leitu apake elotu, ang'asu payie eng'asuni nkop ana metabaki taata, nemeitoki sii kenyaake alotu aikata.

²²Naa tenemeitodorropi nenia perot, anata meata hoo ltung'ani ojeu. Kake kore tankaraki lgelunot, naa keitodorropi nenia perot.

²³Naa tenejoki ntae ltung'ani, <Ng'ura ketii Kristo, ilo Aitejeunoni lianyutata, ene!> anaa, <Ketii idie!> emiiruk inia.

²⁴Amu kepuonu kenya looitaakino Kristo o looitaakino loibonok le Nkai, neitodolu nkitodolunot kutuaa o mbaa e nking'asia, payie teneidimai, neitopong'oo abaki lgelunot.

²⁵Entodol naa ana, amu katilika ntae ewuon eng'or.

²⁶<<Naa kore tenejoki ntae, <Ng'ura, ketii Kristo lkees,> emiimpung, naa tenejo, <Ng'ura, ketii atua lgilata le atua nkaji,> emiiruk inia.

²⁷Kore ana netiu nkiwuang'ata teneing'uaa nkiliepunoto e ndama neitoong abaki ndoyioroto e ndama, nejia sii kenya etiu lotunoto e Nkerai e Ltung'ani.

²⁸Kore pooki netii lpopok, neiturrurrokino sakerin.

²⁹<<Kore ake inia kata payie eng'ututari ꞉ilo sina lee nenia perot, <nemismisu ndama, nemeitai lapa wong'an enye, nesulunye lakir to loing'ang'e neikirikirieki ngolon ee ntokitin naatii loing'ang'e.>

³⁰<<Kore inia kata, nepuku nkitodolunoto e Nkerai e Ltung'ani to loing'ang'e, neichir loreren pooki le nkop, nedol Nkerai e Ltung'ani elotuta tee nkidisin e loing'ang'e eata ngolon o nkitoo kitok.

³¹Neirruaaya lmalaikani lenyena ekututa mowuarak to ltoilo kitok. Neiturrurru ꞉ninche lgelunot too lubot ong'uan e nkop, te neng'asunyie loing'ang'e o neiting'ie.

³²<<Enteyielo te nkitanyanyukoto e lng'aboli nchere kore payie eyuk ntilita ee sura nebulu mbene, naa etinyikua ng'amata e lari.

³³Naaku naa, kore tinidoldol sii ntae kuna baa pooki easai, enteyielo aajo etinyikua ninye nkutuk e ltim.

³⁴Kedede kajoki ntae, meichunye naa ltung'ana le ana pukunoto, eitu easai kuna baa.

³⁵Kore keper o nkop naa keichunye, kake meichunye hooyia rereii lainien.

³⁶Kore kenya inia parri o inia kata naa meatae hooyia loyielo. Meyielo abaki ꞉lmalaikani le chumata anaa sii Nkerai, mara ake Papa apeny.

³⁷Naa kore ana netiu apake too mperot e Noa, naa nejia sii etiu lotunoto e Nkerai e Ltung'ani.

³⁸Amu kore apa tee nenia perot ewuon eitu elotu ꞉inia are sapuk natumuta nkop, kerrutuchoi nematichoe, keyemichoe neyemi, ana metabau inia parri natijing'a Noa atua sapina.

³⁹Kake eitu eyielou ꞉ninche ana meeu ꞉inia are sapuk natumuta nkop neya ltung'ana pooki. Naa nejia kenya etiu tenelotu Nkerai e Ltung'ani.

⁴⁰Kore te inia kata, netii lewa oare ang'ata aasicho, neyai lobo neing'uari likae.

⁴¹Netii sii ntomonok are aaidong'ito nkano to soit, neyai nabo, neing'uari nkae.

⁴²<<Entirripicho naa, amu miyielolo aajo aa parri elotu Laitoriani linchi.

⁴³Kake enteyielo ana, nchere tanaa keyielo lopeny nkaji nkata e nkuarie nalotu lapurroni, anata meicho nkaji enye metigili.

⁴⁴Naaku enterretenata naa, tankaraki ng'amata nimintiekiki kenya elotunyie Nkerai e Ltung'ani.

⁴⁵<<Ng'ae naa laisiaayiani oisiligai naa ng'en, oichoo ꞉lkitok lenye metaramata nkaji enye, neicho ltung'ana ndaa ta nkata naichiaakino?

⁴⁶Emayiana ilo aisiaayiani, aa kore payie errinyunyie lkitok lenye, neirrachu easita nejia.

⁴⁷Kedede kajoki ntae, keicho meitoria ntokitin enyena pooki.

⁴⁸Kake oo tanaa keitorno ilo aisiaayiani, nejo ta ltau lenye, <Keimalmal lkitok lai.>

⁴⁹Neng'asu aidong lolo kulie aisiaayiak, nerrutucho, nematicho tenebo o lamerak,

⁵⁰naa kelotu lkitok le ilo aisiaayiani nkata nemeiteki ajo kelotu o nkata nemeyielo,

⁵¹naa kedung ninye katare, neituchulaki lolo ooitaakino, naa te inie eaku nkichirata o onyata ee lala.