Read Samburu Matayo 26 Bible Online

Matayo 26 - Samburu bible

Matayo 26

¹Kore payie eidip Yeso kuna kurorot, nejoki looiteng'eni lenyena,

²<<Iyielolo aajo kebau Pasaka tee mperot are naapuonu, naa keichoori Nkerai e Ltung'ani metechei to lmusalaba.>>

³Kore te inia kata, neiturrurro lkutuaa la laitainok la lasar o lkutuaa loo ltung'ana ta nkaji nageluno namanya lkitok laa laitainok la lasar, oji apa Kayapas.

⁴Neiguana tenebo payie etum aaibung'a Yeso to loseg payie ear metua.

⁵Kake nejo, <<Mara ng'amata e latim kimbung, payie mepuku long'olng'oli taatua ltung'ana.>>

⁶Kore etii Yeso Betania, nkaji e Simon oata apa nkeeya ee lbolot,

⁷nelotu ntomononi inie enapita lkidong. Kore ilo kidong naa soit oji alabasta eitibirunyieki, netii lata narropili nagol nkinyiang'a. Kore enyeita Yeso ndaa, nebukoki nkue lata.

⁸Kore payie edol ꞉looiteng'eni lenyena inia, negoro, ejo, <<Aanyo payie eimie lata siu?

⁹Anata duo etimirieki ropiyiani kumo, neichori laisinak.>>

¹⁰Neyielou ꞉Yeso nejoito, nejoki, <<Aanyo payie intanyamalmal ana tomononi? Kaaitaasa nanu mbae supat.

¹¹Kore laisinak naa icheche ake aata tenebo o ntae, kake mikicheche aata nanu.

¹²Amu kore ebukoki sesen lai lata narropili, naa kaaitibirakita nukaroto ai.

¹³Kedede kajoki ntae, kore ng'oji pooki nelikorieki kulo Omon Supati to nkop nalulung'a, naa kelikori abaki ana bae nataasa ninye payie eparrunyieki.>>

¹⁴Kore te inia kata, nelo lobo loo loochi tomon o oare oji Yudas Isikariot netii lkutuaa laa laitainok la lasar

¹⁵nejoki, <<Nyo iyieuu nikinchocho tanapik ninye nkaik inchi?>> Neichori ninye ropiyiani osom.[43]

¹⁶Kore ang'asu inia kata, neyiaya mpaach napikie Yeso nkaik enche.

¹⁷Kore mparri ekue e latim le mukate nemeisiichieki, nepuo looiteng'eni le Yeso netii ninye, ejoito, <<Aji iyieu nikintibir payie inyiayie ntasim e Pasaka?>>

¹⁸Nejoki ninche, <<Enchom lkerenket netii ltung'ani oje, nijokiki, <Kejo Laiteng'enani, ketinyikua nkata ai, kanya ntasim e Pasaka o looiteng'eni lainien ta nkaji ino.> >>

¹⁹Neas looiteng'eni ana naiparaka ꞉Yeso ninche, neitibiraki ntasim e Pasaka.

²⁰Naaku kore payie eaku kuarie newuon te misa tenebo o looiteng'eni lenyena tomon o oare.

²¹Kore enyeita ꞉ninche ndaa, nejo, <<Kedede kajoki ntae, kaapik ꞉lobo linchi nkaik ee ltung'ana.>>

²²Neiputukuny pooki, neng'asu aaipar ninye maaboobo, ejo, <<Laitoriani, mara mara nanu sa?>>

²³Newoliki ajoki, <<Kore loitodoka nkaina ncharaa tenebo o nanu, ilo taa laapik nkaik ee ltung'ana.

²⁴Kelo Nkerai e Ltung'ani ana inia naigeroki naipirita ninye, kake oi siake ꞉ilo oichooyo Nkerai e Ltung'ani! Eikach te ilo tung'ani teneitu aikata eini.>>

²⁵Nejo Yudas, ꞉ilo taa oichooyo ninye, <<Lokitok, mara mara nanu sa?>> Nejoki Yeso ninye, <<Iyie otejo.>>

²⁶Kore enyeita ninche ndaa, nerrapu Yeso mukate, nemayian, negil, neicho looiteng'eni lenyena nejoki, <<Entang'amai, entam. Sesen lai ele.>>

²⁷Neitoki arrapu lkikompe, kore payie eidip aichoo Nkai nache, neicho ninche ejo, <<Entamatichiere ele pooki,

²⁸amu ele lodo lai lo lning'o ng'ejuk oibukori tankaraki lkumo payie etum mpalikinoto ee ng'ok.

²⁹Kajoki ntae, mamat aitoki katukul inia naing'uaa ele ng'anayioi lo lmusabibu, ana metabaki inia parri namat eteng'ejuko tenebo o ntae taatua nkitoria e Papa lai.>>

³⁰Kore payie eidip aatarany sinkoliotin,[44] neinyuototo aapuo Lowua loo Lng'erriyio.

³¹Nejoki ꞉Yeso ninche, <<Ikijurjur, nikindosokiki nanu ntae pooki ana kuarie, amu eigeroki aajo, <Kaar lchekut, nesachari nkerra e mboo.>

³²<<Kake kore payie aidip atipiu, naituruk tekue ntae alo Galilaya.>>

³³Neitemioki ꞉Petero ajoki, <<Maaing'uaa hooyia abaki tinikitung'aitie lkulie.>>

³⁴Nejoki ꞉Yeso, <<Kedede kaajoki iyie, kore ewuon eitu eiru lkoko ana kuarie naa ikimiki nkatitin uni.>>

³⁵Newoliki Petero, <<Kore abaki tanaa kairiam o iyie, maamiki hooyia!>> Nejo sii lkulie ooiteng'eni pooki nejia.

³⁶Kore te inia kata, nelo Yeso tenebo o ninche ng'oji neji Getesemane. Nejoki looiteng'eni lenyena, <<Entewueni ntae tene, aomonito nanu tende.>>

³⁷Nerik ꞉Yeso Petero o loochi ayiok oare le Sebedayo, neng'asu aisinanio nenyamalu.

³⁸Neitoki ajoki ninche, <<Kaata sina kitok ta ltau lai, metaa kaye. Entewueni tene, naa entirripicho tenebo o nanu.>>

³⁹Nelo nkini rioto neirrabalakino nkop neomon ejo, <<Papa lai, kore tanaa keidimai, tooruaaki ele sina,[45] kake mara ana nayieu nanu, kake ana niyieu iyie.>>

⁴⁰Nelotu netii laaduo ooiteng'eni, neirrachu eilurate, nejoki Petero, <<Aaku, mindimdim aatirripicho tenebo o nanu te nkini kata?

⁴¹Entirripicho niomonmon payie mijing'jing atua ntemat, kore ltau naa keata yieuna, kake kechal sesen.>>

⁴²Neitoki alo nkata e are aomon ejo, <<Papa lai, tanaa maarepaa ele sina eitu aatum,[46] nchoo etiu ana niyieu iyie.>>

⁴³Neigil alotu netii ninche, neirrachu eilurate amu keinaurita too njuo ana metaa meidim hoo aatewueni.

⁴⁴Neitoki aing'uaa ninche, nelo nkiti rrioto aomon nkata e uni neigil ajo ladei rerei.

⁴⁵Nelotu netii looiteng'eni lenyena nejoki ninche, <<Ewuon ake ilurara, niyeng'iyeng'ang'a, eng'ura, etinyikua nkata napikieki Nkerai e Ltung'ani nkaik ee loopeny ng'ok.

⁴⁶Enyuoto maapetin! Leilo laalikoo oatabawua!>>

⁴⁷Kore ewuon eirorita, nchoo lobo loo loochi tomon o oare, oji Yudas, nelotu tenebo o lturrur sapuk. Kore ilo turrur neata lalema o runkun, naa keing'uaa ninche netii lkutuaa laa laitainok la lasar o lkutuaa loo ltung'ana.

⁴⁸Kore ꞉ilo otilikoyie naa keichoo apa ninche nkitodolunoto, ejo, <<Kore ilo lagus, naa ninye, embung'a.>>

⁴⁹Nelo nabokata netii Yeso nejo, <<Serian Rrabi![47]>> Negus ninye.

⁵⁰Nedung ꞉Yeso ninye tooriong ajoki <<Lchore, nyo nikiyewua ene?>> Nepuonu, nepik Yeso nkaik, neibung.

⁵¹Nchoo lobo lo lolo ooboitiere Yeso, neitorioo nkaina aibung lalem, nechutu neoch laisiaayiani la laitainoni kitok la lasar, nedung'oo nkiok.

⁵²Nejoki ꞉Yeso, <<Tirrinyoki lalem lino nchachur, amu kore pooki oibung lalem naa ta lalem eidakieki.

⁵³Aa miyielo ajo kaidim atoomono Papa lai, naa kaarewaki nabokata njorin kutuaa[48] ee lmalaikani naalang tomon o oare maatimitu?

⁵⁴Kake amaa teneasai inia, aji naa eiko tenebaya Lkigerot oojo, meata nchere payie measai ana?>>

⁵⁵Kore te inia kata, nejoki ꞉Yeso lturrurri, <<Amaa, lapurroni oricho dei ara payie kiotuo aaibung iatata lalema o runkun? Kore chiaake, kawuon mperot pooki ta nkaji e Nkai aiteng'enicho, neitu kimbung'bung.

⁵⁶Kake ketaasate kuna pooki payie ebaya Lkigerot loo loibonok le Nkai.>> Kore inia kata, neing'uaa ninye ꞉looiteng'eni pooki, nekuet aaisig.

⁵⁷Kore ꞉lolo ooibung'a Yeso, nerik ninye netii Kayapas, ilo kitok laa laitainok la lasar. Naa inie apa eiturrurrore laiteng'enak loo nkitanapat o lpayiani.

⁵⁸Kore Petero, neirukurukore elakuaniki, ana metabaki nkaji nageluno namanya lkitok laa laitainok la lasar, nejing atua boo e inia aji, newuon o larripok adol naasai.

⁵⁹Neyiaya lkutuaa laa laitainok la lasar o lkiama laa larikok pooki laa lpayiani, nkiteenakinoto e sapare payie etum nearie ninye metua.

⁶⁰Kake kore abaki eipung'utua ltung'ana kumo ooitaitua nkiteenakinot e sapare, nelau rerei odung'okinyie ninye lkiye. Kore tesiedi, nepuku oare,

⁶¹nejo, <<Ele tung'ani otejo, <Kaidim atara nkaji e Nkai, nachet taatua mperot uni.> >>

⁶²Neinyuototo laitainoni kitok la lasar nejo, <<Amaa, miata wolet nimitunyie koon? Kakua baa kuna nikitipika ꞉kulo tung'ana?>>

⁶³Kake nejo ake Yeso tau! Nejoki ꞉lkitok la laitainok la lasar ninye, <<Kaaitam lmumai tekue Nkai naichu, tiliki iyioo tanaa Kristo ira, inia Kerai e Nkai.>>

⁶⁴Newoliki Yeso ninye ajoki, <<Iyie otejo. Kake kaajoki nanu iyie, kore ang'asu taata, idoldol Nkerai e Ltung'ani ewuon ta mbata e tetene e Ilo openy ngolon, elotu tee nkidisin e loing'ang'e.>>

⁶⁵Nekij ꞉laitainoni kitok la lasar nkilani enyena, nejo, <<Etedia Nkai! Aanyo aitoki payie kiyiaya lkulie oolimu? Kore naa taata, itining'o ldeket lenye.

⁶⁶Aa duata iatata ntae?>> Newoliki ninche ninye aajoki, <<Keichiaakino lkiye.>>

⁶⁷Nenatakini ninye nkamlak nkomom, neochi, nedam lkulie ninye seder

⁶⁸ejoito, <<Mbonoki iyioo, iyie Kristo! Ng'ae likitoocho?>>

⁶⁹Kore te inia kata newuon Petero to boo e nkaji. Nelotu nkaisiaayiani nabo neti nejoki, <<Iti abaki iyie tenebo o Yeso le nkop e Galilaya.>>

⁷⁰Kake nemiki tekue ninche pooki ejo, <<Mayielo ntoki nijoito.>>

⁷¹Kore payie elo ltim aing'uaa inie, nedol ꞉nkae aisiaayiani ninye, nejoki ltung'ana otii inie, <<Ketii apa ele tung'ani tenebo o Yeso, lo lkerenket le Nasaret.>>

⁷²Neitoki amiki inia, enya lmumai ajo, <<Mayielo ilo tung'ani.>>

⁷³Kore te nkini kata, nepuonu lkulie tung'ana ooitachoo duo te inie nejoki Petero, <<Kedede ira abaki iyie lobo lenche amu ikilikoo abaki ꞉nkiroroto ino.>>

⁷⁴Neng'asu aipotoki koon ldeketa nenya lmumai ajo, <<Mayielo ilo tung'ani.>> Kore inia kata neiru lkoko.

⁷⁵Neparru Petero ilo rerei apa oiroro Yeso nchere, <<Kore ewuon eitu eiru lkoko ikimiki nkatitin uni.>> Neipung aulo, neichir te mion.