Read Samburu Matayo 27 Bible Online

Matayo 27 - Samburu bible

Matayo 27

¹Kore payie eaku tasiran, nedung lkutuaa laa laitainok la lasar o lpayiani pooki nkiguana aajo kear Yeso metua.

²Neen ninye, nepuo aarik, nepik nkaik e lkitok loo Rroman oitoreicho to nkop e Yudea, oji Pilato.

³Kore payie edol ꞉Yudas, ilo otilikoyie ninye, ajo ketudung'okaki Yeso nkiguana e lkiye, nenyau inia nataasa. Nerrinyoki lkutuaa laa laitainok la lasar o lpayiani ropiyiani osom,[49]

⁴ejoito, <<Kataasa ng'oki alikoo ltung'ani lemeata ntioto.[50]>> Nejo ninche, <<Nyo taa inia tee iyioo? Todua iyie makoon.>>

⁵Nenang'aki nenia ropiyiani nkaji e Nkai, neipung, nelo ailili koon agor to lgiita.

⁶Kore lkutuaa laa laitainok la lasar, nerrapu nejo, <<Meichiaakino nepiki ng'oji neisudorieki ropiyiani te nkaji e Nkai, amu ne lodo kuna ropiyiani.>>

⁷Kore payie eiguana ninche, neinyiang'u tee nenia ropiyiani ng'oji neji <<Lchampa la laitibirani loo ntokitin e mparpar>> payie enukarie ltung'ana leiching'a.

⁸Tankaraki inia payie etejoki inie ng'oji, <<Lchampa lo lodo>> ana o taata.

⁹Kore te inia kata, nebaya nairoro apa Nkai aimu loiboni lenye Yeremia ejoito, <<Neya ninche nenia ropiyiani osom, naairirikino naaitami ilo otipikakita apa ꞉ltung'ana le Isirael naairirikino te nkinyiang'a.

¹⁰Neinyiang'unyie nenia ropiyiani <Lchampa la laitibirani loo ntokitin e mparpar> ana naaiparaka nanu Laitoriani.>>

¹¹Kore inia kata eitache Yeso tekue ilo kitok loo Rroman oitoreicho te Yudea, neipar ꞉ilo kitok ajoki, <<Amaa, iyie dei lkinkii loo Lyiaudi?>> Newoliki Yeso ajoki, <<Iyie ojoito.>>

¹²Kake kore payie eitar kusaka ꞉lkutuaa laa laitainok la lasar o lpayiani, neitu ewoliki ninche hoo toki.

¹³Nejoki inia kata ꞉Pilato ninye, <<Mining'ito newua mbaa nikipikitae?>>

¹⁴Kake eitu eicho wolet, abaki e mbae nabo naiteenikaki. Kore tankaraki inia neing'asia ilo kitok oitoreicho oleng.

¹⁵Kore nkata pooki e ntasim e Pasaka, naa keata ilo kitok lkerreti olakunyie ltung'ani obo oena, ogelu ꞉lturrur.

¹⁶Kore apa te inia kata neatae ltung'ani yieloti oena oji Barabas.

¹⁷Nchoo Pilato, eidipa ltung'ana aaiturrurroto, nejoki ninche, <<Ng'ae iyieuu nalaaki ntae, Barabas tana Yeso, ilo oipoti aajo Kristo?>>

¹⁸Amu keteyielo ajo keyeutua ꞉ninche Yeso netii ninye tankaraki lom.

¹⁹Kore ewuon Pilato to lorika le nkiguana, nerewaki ꞉ntomononi enye lkilikuai ajoki, <<Meatae hooyia niatayie ilo tung'ani loosipat, amu katumo duo sina oleng te nkidetidetata tankaraki ninye.>>

²⁰Kake kore lkutuaa laa laitainok la lasar o lpayiani, nelej ltung'ana metoomonu metalakuni Barabas neichooyo Yeso metari.

²¹Neitoki taa loitoreicho aipar ltung'ana ajoki, <<Amaa, alo too kulo pukura oare iyieuu nalaaki ntae?>> Nejo ninche, <<Talaaki iyioo Barabas.>>

²²Nejoki ꞉Pilato ninche, <<Naaku kaa iyieuu naitaas Yeso, ilo oipoti aajo Kristo?>> Nejo pooki, <<Nchoo echei to lmusalaba!>>

²³Nejoki Pilato ninche, <<Aa, kaa torno etaasa?>> Kake nebuak ninche oleng nalang duo ejo, <<Nchoo echei!>>

²⁴Kore payie edol ꞉Pilato ajo meatae neidim ataasa, neng'asuta ltung'ana aaing'olng'ola, nerrapu nkare neituk nkaik enyena tekue lturrur, nejo, <<Maata nanu ntioto to lodo le ele tung'ani loosipat. Entodol ntae inia maate!>>

²⁵Newolu ltung'ana pooki ejo, <<Nchoo lodo lenye eaku te keper iyioo o nkera ang!>>

²⁶Nelaaki ninche ꞉Pilato Barabas, naa kore payie eidipi aaidong'o Yeso te liche naenikino loik oopi, neichooyo ninye metechei to lmusalaba.

²⁷Nerik sikarini lo loitoreicho Yeso atua lgilata le nkaji oji Praitoria, neiturrur lturrur pooki loo sikarini tekue ninye.

²⁸Neitai nankan, neichopoki lkila onyiekie[51],

²⁹neitibir nkopiyia ee lkuku, neichopoki nkue enye, nepik sobua nkaina enye e tetene, negilaki kung neikordodoo ninye ejo, <<Supa lkinkii loo Lyiaudi!>>[52]

³⁰Nenataki ninye nkamlak, neoru sobua neidong'ie nkue enye.

³¹Kore payie eidip aaikordodo ninye, neitai naduo anka, neichopoki nankan enyena, nerik aapuo aache to lmusalaba.

³²Kore eipung'uto aapuo aache ninye nenang'are ltung'ani le Kirene oji Simon, neisimaki ninye metanapa lmusalaba le Yeso.

³³Kore payie ebaya ng'oji neji Golgota, aa keji <<Ng'oji e mborbor e nkue,>>

³⁴neicho ꞉ninche Yeso naichuo e lmusabibu nachulakino lodua metamata, kake kore payie eichamcham naaku meyieu nemat.

³⁵Kore payie eidip aateche, neor nankan enyena enuk nkuko.

³⁶Nejo siap aarrip ninye te inie.

³⁷Nepik te keper nkue enye lkigerot oaatarieki oojo, <<ELE YESO, LKINKII LOO LYIAUDI .>>

³⁸Nechei sii te inia kata lapurrok ooricho oare tenebo o ninye, lobo te tetene enye o lobo te kidienye.

³⁹Kore lolo ooimita nkoitiei nedek ninye, eipirpir nkuechi enche

⁴⁰ejoito, <<Iuroo nkaji e Nkai nichet too mperot uni! Kore tanaa Nkerai e Nkai ira, ntejeu koon, nidou to lmusalaba.>>

⁴¹Nejia sii aitoki etaasa lkutuaa laa laitainok la lasar o laiteng'enak loo nkitanapat o lpayiani aaikordodoo ejoito,

⁴²<<Keitejewua lkulie, kake meidim aitejeu koon. Mara lkinkii le Isirael dei ninye? Nchoo naa taata edou to lmusalaba, payie kiruk ninye.

⁴³Keisilig Nkai, nchoo naa taata meitejeu ninye tanaa keyieu, amu ketejo ninye, <Kara Nkerai e Nkai.> >>

⁴⁴Kore abaki laaduo apurrok ootechoki o ninye nedek ninye ana duo neikuna ꞉lkulie.

⁴⁵Kore payie eaku saai ile, neaku naimin to nkop pooki ana metabaki saai saal.

⁴⁶Kore nochi naaku saai saal, neichir Yeso abuak to ltoilo sapuk ejo, <<Eli, Eli, lema sabaktani.>> Kore nautu inia naa ana, <<Nkai ai, Nkai ai, aanyo payie kitung'ayie?>>

⁴⁷Kore lkuti tung'ana ooitachoo te inie, nening inia nejokino maate, <<Elija eipotu ele tung'ani.>>

⁴⁸Nejo kar lobo lenche neyau mputaput. Neiput naichuo naisiicho, neremoki inia putaput loperriai neicho metamata.

⁴⁹Kake nejo lolo lkulie, <<Tung'ai! Mataanyu aadol tanaa kelotu Elija aitejeu ninye.>>

⁵⁰Neitoki Yeso abuak to ltoilo sapuk, nedung'o tau.

⁵¹Kore inia kata, nekija nochi anka naisiapaa nkutuk e Ng'oji Sinyati naaisul pooki ta nkaji e Nkai nkatitin are, ang'asu te keper ana meipung'o, neikirikiro nkop, nebaa ndadapo.

⁵²Nebolo sii nkurare, neitipiuni seseni kumo loo lolo sinyat apa ooteperio.

⁵³Naa kore eidipa Yeso atipiu, neipung ninche too nkuraren, nepuo lochi kerenket sinyati, neipung'oki lkumo.

⁵⁴Kore payie ening ꞉lkitok loo sikarini o lolo otii tenebo o ninye aarripito Yeso nkikirikiroto e nkop, nedol mbaa naataasate, neiputukuny oleng nejo, <<Kedede, Nkerai e Nkai ana.>>

⁵⁵Keti sii apa ntomonok kumo inie naaing'oricho elakua, ꞉nenia naairukurukore apa Yeso ang'asu te Galilaya payie eisiai ninye.

⁵⁶Kore taatua ninche netii Maria Magadalena o Maria ng'otonye Yakobo o Yosep, o ng'otonye layiok le Sebedayo.

⁵⁷Kore payie emutu nelotu ltung'ani garsis oing'uaa Arimataya, oji Yosep, oataa apa loiteng'eni le Yeso.

⁵⁸Nelo ninye neti Pilato, neomon sesen le Yeso, neitanapicho Pilato meichori.

⁵⁹Neya Yosep sesen neirin ta nanka supat napuyiapui,

⁶⁰neiteper to nkurarei enye ng'ejuk, natuturo ninye to soit. Kore payie eidip aibeleleng'oki soit sapuk nkutuk e nkurarei, nelo aing'uaa.

⁶¹Netii inie Maria Magadalena o nochi Maria nkae, ewueni aaitalang'akinere inia kurarei.

⁶²Kore teisiere ta mparri e Sabato, neiturrurro lkutuaa la laitainok la lasar o Lparisayo tekue Pilato

⁶³nejo, <<Lokitok, ikitaparrutua aajo ketejo ele asapani ewuon apa eichu, nchere, <Kore eicha mperot uni naa kapiu aitoki.>

⁶⁴Naaku naa, ntanapicho metirripi nkurarei ana metabaki mparri e uni, payie mepuonu looiteng'eni lenyena aapurroo, nejoki ltung'ana nchere ketipiwua aing'uaa lootuata, naa kerepaa sapare e siedi inia apa ekue.>>

⁶⁵Nejoki Pilato ninche, <<Iatata sikarini, enchom entirrip aitibiraki ana nindimdim.>>

⁶⁶Nepuo ninche aaing'uaa inie, nerrip nkurarei aitirrichaki aapik soit ntoki naitodolu teneigutugutieki, nepik sii sikarini oorrip.