Read Samburu Matayo 28 Bible Online

Matayo 28 - Samburu bible

Matayo 28

¹Kore payie eidipai Sabato, etinyikua siran, nelo Maria Magadalena o nochi Maria nkae aaing'uraa nkurarei.

²Kore ta nkata nabo, nelotu nkikirikiroto kitok e nkop, amu lmalaika la Laitoriani otodowua eing'uaa chumata, nelo inie netii ilo soit neibeleleng'oo, newuenie.

³Kore nkung'urata enye neinyinyukore nkiwuang'ata, neibor nkilani enyena ana nkidis naibor.

⁴Neikirikira sikarini, nenang nkop netuwuanai ana ltung'ana ootuata tankaraki naurie ninye.

⁵Nejoki ꞉lmalaika nenia tomonok, <<Emiguretu, amu kayielo ajo Yeso otechoki iyieitata.

⁶Meti ene amu, ketipiwua ana natejo apa. Wootu entodol ng'oji neiteperieki apa.

⁷Enchom naa entesioi entiliki looiteng'eni lenyena, nchere, etipiwua ninye too lootuata, naa keituruk tekue ntae alo Galilaya, te inie idoldol ninye. Kaidipa naa taata atiliki ntae.>>

⁸Neipung nabokata aaing'uaa nkurarei te ngureticho o te ng'ida sapuk oleng, nekuet aaliki looiteng'eni lenyena.

⁹Kore te inia kata, netumore ꞉Yeso ninche nejoki, <<Eserian!>> Nenyikaki ꞉ninche, neibung nkejek enyena, negil kung aasai ninye.

¹⁰Nejoki ꞉Yeso ninche, <<Emiurieicho, enchom entiaki lalachera lainien mechomo Galilaya, naa te inie aadol nanu ꞉ninche.>>

¹¹Kore etii ntomonok nkoitiei aapuoito, nchoo lbata loo sikarini nebaki lkerenket neliki lkutuaa laa laitainok la lasar ntoki pooki nataase.

¹²Kore payie eiturrurro laitainok kutuaa la lasar tenebo o lpayiani, nedung nkiguana payie eicho sikarini ropiyiani kumo,

¹³nejoki, <<Entejo inji, <Looiteng'eni lenyena ootuo kuarie ewuon kilura nepurroo ninye.>

¹⁴Naa tenebaki ele rerei lkitok oitoreicho, nikilej iyioo ninye, nikiworu ntae nyamali.>>

¹⁵Neya ꞉ninche ropiyiani, neas ana naiparakaki, neibulaa ele rerei too Lyiaudi o taata.

¹⁶Kore lolo ooiteng'eni tomon o obo, nepuo ilo donyuo oti Galilaya oiparaka apa Yeso ninche mechomo.

¹⁷Kore payie edol ꞉ninche ninye, negil kung aasai, kake neing'ach lbata lenche.

¹⁸Nelotu Yeso anyikaki ninche, nejoki, <<Kaaichooki nkitoria pooki te chumata o to nkop,

¹⁹enchom naa entaa lochon pooki looiteng'eni lainien, impatisasa ninche ta nkarna e Papa o ne Nkerai o ne Ltau Sinyati,

²⁰ninteng'ening'en ninche meibung'a pooki naitanapa ntae, naa katii nanu tenebo o ntae mperot pooki metabaki nkiting'oto e ng'amata e ana kop.>>