Read Samburu Matayo 3 Bible Online

Matayo 3 - Samburu bible

Matayo 3

¹Kore te inia ng'amata apa, nelotu Yoana Laipatisani elikoo te lkees le Yudea

²ejoito, <<Erriidu amu etinyikua nkitoria e chumata.>>

³Amu ele apa eiroroki mbaa enyena to loiboni le Nkai Isaya, <<Ening'o ltoilo le ilo obuakita te lkees ejo, <Entibiraki Laitoriani nkoitiei, entorioi nkoitieii kunini enyena.> >>

⁴Kore Yoana, neichopito nkilani naaitibirieki lpapit le ntames, nerretenita nkimeente e nchoni te nkiji enye. Kore ndaa enye naa lmaat o naichuo e soro.

⁵Nedotunyie ꞉Yerusalem o Yudea pooki o lubot pooki e Yordan aapuo netii ninye.

⁶Neipatis ninche te sere e Yordan, eibalie ꞉ninche ng'ok enche.

⁷Kake kore payie edol ꞉ninye ltung'ana kumo loo Lparisayo o Sadukayo epuonuta inie ng'oji neipatisie ltung'ana, nejoki ninche, <<Naichoi ana ee lasuria! Ng'ae otiaka ntae, ing'ataa ngoro nalotu e Nkai?

⁸Entiiu naa lng'anayio ooiririkino nkirriidunoto ee ng'ok.

⁹Emijokino maate, <Kore Abraam, ikiata iyioo era papa lang.> Amu kajoki ntae, keidim Nkai neitibiru nkera too kulo soito metaa nkera e Abraam.[7]

¹⁰Naa kore taata, eidipaki aatipik ntolu ntana ee lkeek metaa kore pooki cheni lemeiu lng'anayio supati, nedung'uni, nenang'akini nkima.

¹¹Kaipatis ntae ta nkare payie iwuenienie nkirriidunoto, kake kore ilo laaijipu naa keata ngolon kitok alang nanu, namaichiaakino abaki tanaitai namuka enyena. Naa keipatis ninye ntae ta Ltau Sinyati o te nkima.

¹²Kore ta nkaina enye naa keibung'uta masaaita naorieki nkano supat o siau, neor lkurroto, neiturrurroki nkano supat ng'oji neiteng'elieki ndaa, nepejoo siau te nkima nemerai.>>

¹³Kore tesiedi, nelotu Yeso eing'uaa Galilaya alo sere e Yordan meipatisa ꞉Yoana.

¹⁴Nenyok Yoana aibooyo, ejo, <<Keyiere paa iyie likimpatis nanu, nilotu iyie natii?>>

¹⁵Newoliki ꞉Yeso ajoki, <<Nchoo eaku nejia taata, amu keichiaakino tinikias kuna payie kintabaya sipata e Nkai.>> Nechamaa ꞉Yoana.

¹⁶Kore ake payie eipatisi Yeso, neipung'u taatua nkare. Nebolo chumata, nedol ꞉ninye Ltau Sinyati le Nkai edou ana nkutukurruk, newuenie ninye.

¹⁷Nening'oi ltoilo oing'uaa chumata ejo, <<Ana Nkerai ai nacham naa katachamayie.>>