Read Samburu Matayo 4 Bible Online

Matayo 4 - Samburu bible

Matayo 4

¹Nerik ꞉Ltau Sinyati Yeso atua lkees metetema ꞉Chitani.

²Neen ꞉ninye nkutuk mperot artam eitu enya ndaa kuarie o parkiji, near ꞉sumach.

³Nelotu ilo atemani netii ninye nejoki, <<Tanaa ira iyie Nkerai e Nkai, tiaaki kulo soito metaa mukateni.>>

⁴Kake nejoki ꞉Yeso ninye, <<Keigeroki aajo, <Kore ltung'ani, naa mara mukate apeny eichiwue, kake rerei pooki oing'uaa nkutuk e Nkai.> >>

⁵Neitoki Chitani arik ninye lochi kerenket sinyati, neitacheyie to ng'oji neodo aisul pooki ta nkaji e Nkai.

⁶Nejoki, <<Kore tanaa ira iyie Nkerai e Nkai, tusulai koon amu keigeroki aajo, <Ikirewaki ꞉Nkai lmalaikani lenyena, niking'amaa taa nkaik enche, payie mikinkub hooyia ndap ino soit.> >>

⁷Nejoki ꞉Yeso, <<Keigero aitoki ajo, <Mitem Laitoriani Nkai ino.> >>

⁸Neitoki Chitani arik ninye nkeper e ldonyuo oodo oleng, neitodol nkitoria ee nkopi o murdaicho pooki enche.

⁹Nejoki, <<Kore ana murdaicho pooki nidolita, kaaicho tinikigilaki kung, nikirigokino asai.>>

¹⁰Kake nejoki ꞉Yeso ninye, <<Chomo Chitani, amu keigero ajo, <Tasayia Laitoriani Nkai ino apeny, naa ninye apeny siaayia.> >>

¹¹Kaa hae, neing'uaa ꞉Chitani ninye, nepuonu lmalaikani le Nkai aaisiai ninye.

¹²Kore payie ening ꞉Yeso ajo eteenaki Yoana,[8] nechuko alo Galilaya.

¹³Kore payie eiwuot te lkerenket le Nasaret, nelo awuon te lkerenket le Kapernaum otii nchepata e mpaso, e nkop e Sebulun o Naputali,

¹⁴payie ebaya inia apa natejo loiboni le Nkai Isaya,

¹⁵<<Nakop e Sebulun o ne Naputali, naim ꞉nkoitiei nalo mpaso, e ildo kokun sere e Yordan! Nakop e Galilaya ee loreren lemeiruk Nkai e Isirael!

¹⁶Kore lolo tung'ana otii atua naimin, etoduaa ninche wong'an kitok oleng, naa kore sii lolo otii nkop naimulayie ꞉loip lo lkiye, etoong'aka ninche wong'an.>>

¹⁷Kore te inia kata, neng'asu Yeso alikoo ajo, <<Erriidu, amu etinyikua nkitoria e chumata.>>

¹⁸Kore mparri nabo echepita ꞉Yeso mpaso e Galilaya, nedol lalachera oare, enang'akita lgiitani atua mpaso, amu kera apa ninche laibung'ak loo sinkirri. Kore lobo naa Simon, oichooki kenya nkarna naji Petero, neji ilo likae Andirea.

¹⁹Nejoki ninche, <<Ootu erukurukoreeki, naa kaiteng'en ntae payie iakuku laibung'ak loo ltung'ana ana ninkoko tinimbung'bung sinkirri.>>

²⁰Neing'uaa lgiitani lenche nabokata, neirukurukore ninye.

²¹Kore eloito te inie, nedol aitoki lkulie alachera oare, Yakobo layieni le Sebedayo o lalache lenye Yoana, etii atua meli aaitibir lgiitani o papa lenche Sebedayo. Neipotu ninche.

²²Neing'uaa nabokata meli o papa lenche, neirukurukore ninye.

²³Nemanaa Yeso taatua Galilaya pooki, eiteng'enicho taatua Sinagogini,[9] nelikoo Lomon Supati le nkitoria, neichiunyie nkeeyaitin pooki o moyianitin taatua ltung'ana.

²⁴Nebulaa lomon lenyena ana metabaki nkop e Siria pooki. Neyaki ninye ꞉ltung'ana ltamoyia pooki, oaata moyianitin naapaacha, lolo oaata mion kitok o loaata lairiruani o loaata moyian e nkiterria o lolo ootigilgilete, neichiunyie pooki.

²⁵Neirukurukore ninye ꞉lturrurri kumo ooing'uaa Galilaya o Dekapolis [10] o Yerusalem o Yudea o ildo kokun le sere e Yordan.