Read Samburu Matayo 5 Bible Online

Matayo 5 - Samburu bible

Matayo 5

¹Kore payie edol ꞉Yeso lturrurri, neiliep nkeper e ldonyuo. Kore payie ewuon, nepuonu looiteng'eni lenyena netii ninye,

²neiteng'en ninche ejo,

³<<Emayiana lolo ooyielo aajo laisinak era taa ltauja, amu nenche nkitoria e chumata.

⁴Emayiana lolo ooichir, amu keitigiri ninche.

⁵Emayiana lolo oobor, amu ninche oojung nkop.

⁶Emayiana lolo oaata sumach o nkure e sotua oipida o Nkai, amu keitiemuni ninche.

⁷Emayiana lolo oaata lng'er, amu keing'erruni ninche.

⁸Emayiana lolo oaata ltauja supati, amu kedol ꞉ninche Nkai.

⁹Emayiana lolo ooitemeleticho, amu keipoti ninche aajo nkera e Nkai.

¹⁰Emayiana lolo ooitami sina tankaraki naata sotua oipida o Nkai, amu nenche nkitoria e chumata.

¹¹<<Imayianana tenedeki ntae, neitami sina, neiteenikini ntae mbaa pooki torrok e sapare tankaraki nanu.

¹²Enting'idata, nichipapa amu keikitok laata inchi te chumata, amu nejia apake eikuna payie eitam sina[11] loibonok le Nkai ootii tekue ntae.

¹³<<Irara ntae makaat[12] e nkop, kake amaa, teneichunyie mpijan, nyo epiki aitoki payie epiju? Merokure eata tipat, mara tenenang'ari boo meeidacha ꞉ltung'ana.

¹⁴<<Irara ntae wong'an e nkop. Meisudoroi lkerenket otii nkeper e ldonyuo.

¹⁵Nemeinoki sii lkilang'ilang'et nepukurokini loket, kake kepiki nkeper e ng'oji netala, payie eitoong ltung'ana pooki ootii nkaji.

¹⁶Nejia sii entaas ntae: Enchoo wong'an inchi metoong'a tekue ltung'ana, payie edol ninche asat inchi supati neisis Papa linchi oti chumata.

¹⁷<<Emijo kayewuo aiturraa nkitanapat e Musa anaa loibonok le Nkai. Eitu alotu aitaa meitoki, kake kayewuo paatum aitabai katukul.

¹⁸Naa kedede kajoki ntae, kore ana metabana neng'ututari chumata o nkop, meatae hooyia sirata anaa lkardati loo nkitanapat oimin eitu eitabari pooki naayieuni.

¹⁹Metaa kore pooki ng'ae ogil Nkitanapata kini too kuna Kitanapat, eiteng'en lkulie metaasa nejia, naa keaku ninye le siedi te nkitoria e chumata. Kake kore pooki ng'ae oas, neiteng'enicho kuna Kitanapat, naa keipoti aajo lkitok te nkitoria e chumata.

²⁰Amu kajoki ntae, tanaa mirara ltung'ana loosipat oleng aalang Lparisayo o laiteng'enak loo nkitanapat, naa mijing'jing katukul nkitoria e chumata.

²¹<<Itining'o apa aajo ketiakaki ltung'ana le apa nchere, <Miar metua,> amu kore loar metua, naa keichiaakino neiguanareki.

²²<<Kake kajoki ntae, kore ilo ogorokino lalache lenye naa keichiaakino payie eiguanareki. Naa kore sii looidach lalache lenye ajo, <Meitoki ira,> naa keichiaakino nkiguana e nkitoo ee Lyiaudi, naa kore ilo ojo likae, <Lo madai!> naa keichiaakino nelo lmoti le nkima.

²³<<Naaku, tiniyau iyie nkichooroto ino lperere la lasar, niparru ajo keata lalache lino mbae namen te iyie,

²⁴tung'ai nkichooroto ino tekue lperere la lasar, nilo ang'as amelet o lalache lino, nilotu taa aitai nkichooroto ino tesiedi.

²⁵<<Tesioki, tining'ore ilo litarare ewuon irukurukore to nkoitiei, payie intai sotua eitu kiya netii ladung'oni le nkiguana, nikiya ꞉ninye netii sikarii, nikinang'akini atua jila.

²⁶Kedede kaajoki mimpung'u teinie katukul, ana talaa sintii le siedi.

²⁷<<Itining'o apa aajo ketejoki, <Miloloito.>

²⁸Kake kajoki nanu ntae, kore pooki ng'ae oing'or ng'oriei, neng'uar, naa etaasa ninye loloito o inia ng'oriei ta ltau lenye.

²⁹Kore tinikintasur ꞉nkong'u ino e tetene taasa ng'oki, tukurtu, nturrai. Amu naikach tininturraa rubata nabo e sesen, alang teneitodokini sesen lino pooki atua lmoti le nkima.

³⁰Kore aitoki tinikintasur nkaina ino e tetene taasa ng'oki, tudung'u, nturrai. Amu naikach tininturraa rubata nabo e sesen alang teneitodokini sesen lino pooki atua lmoti le nkima.

³¹<<Netejoki aitoki, <Kore ꞉ilo oar nkauti e nkitok enye, keiririkino payie eicho ninye mpalai naitodolu ajo ketaraki nkauti.>

³²Kake kajoki nanu ntae, kore ilo oar nkauti e mparratut enye, mara ake teneas ꞉inia parratut enye loloito, naa etipika ninye mpaach metaasa loloito. Naa kore pooki ng'ae oyem mparratut nataraki nkauti naa ketipikaki rruachet naasie loloito.

³³<<Itining'o aitoki aajo, etiakaki ltung'ana le apa, nchere <Migil lmumai lino, kake mbung'a ilo mumai litamie Laitoriani.>

³⁴Kake kajoki nanu ntae, emimanyare katukul, abaki chumata, amu ninye lorika le nkitoo e Nkai,

³⁵tanaa nkop, amu ninye lorika loo nkejek enyena, tanaa Yerusalem, amu lkerenket le ilo Kinkii kitok.[13]

³⁶Nimimanyare sii nkue ino, amu miindim hoo aiborrie anaa aitoroko lpapita obo.

³⁷Enchoo <ee> inchi metaa <ee> o <mara> metaa <mara,> amu kore nkae namara ana, naa ilo torno eing'uaa.

³⁸<<Itining'o apa aajo ketejoki, <Tinikikurtu ꞉ltung'ani nkong'u, nekurtuni sii nenye, naa tinikintai lalae, neitaini sii lenye.>

³⁹Kake kajoki nanu ntae, emimbooyo ltung'ani torno. Tinikiwoch ꞉ltung'ani seder e tetene, wuatuwuataki, mikitoocho nkae.

⁴⁰Naa tinikiya ꞉ltung'ani mikinguanareki tankaraki keyieu nikisimarie nkila ino e atua, nchoo abaki ne oriong.

⁴¹Naa kore likisimaki chomo kilomita nabo, chomo tenebo o ninye nkae nabo.

⁴²Kore likiomon, nchoo, nimirriny sii ꞉ilo likiyieu nikisilen.

⁴³<<Itining'o apa aajo ketejoki, <Tachama le latia ino, nimbai lmang'antita lino.>

⁴⁴Kake kajoki nanu ntae, entacham lmang'ati linchi, niomonokiki lolo ooitam ntae sina,

⁴⁵payie itumtum aataa nkera e Papa linchi oti chumata. Amu keitoong'oki ꞉ninye ndama lolo torrok o supati, neicho nchan loosipat o lamara loosipat.

⁴⁶Amaa, tinichamcham lolo oaacham ntae, nyo laata nitumtum ntae? Amaa, meas echi laitalakunok le kodi nejia?

⁴⁷Naa amaa, tinirorokiki lalachera linchi aapeny, nyo supat nitaasa alang nataasa lkulie? Aa meas echi lolo lemeyielo Nkai nejia?

⁴⁸Naaku, kore sii ntae, entaa lemeata ntioto ana payie era Papa linchi oti chumata lemeata ntioto.