Read Samburu Matayo 6 Bible Online

Matayo 6 - Samburu bible

Matayo 6

¹<<Entodol emintoduaaya asat inchi ee sipat tekue nkonyek ee ltung'ana metoduaa ntae, amu kore tiniasias nejia, naa mitumtum laata ta Papa linchi le chumata.

²Naa tinincho laisinak, mikut mowuo metining'i aajo nchoo, ana neas lolo ooitaakino taatua Sinagogini o taatua nkoitieii payie etum ꞉ltung'ana aaterrep ninche. Kedede kajoki ntae, eidipa ninche aatum laata enche.

³Kake tinincho laisinak, mincho meteyielo nkaina ino e kidienye ntoki naasita ne tetene,

⁴metaa no lkutoto nkichooroto ino, paa kore Papa lino odol atua ng'oji neing'opa, nikilaaki iyie.

⁵<<Naa tiniomonmon, emiaku ana lolo ooitaakino, oaacham aatoomon eitachoo taatua Sinagogini o too ntumot ee nkoito, payie edol ninche ꞉ltung'ana. Kedede kajoki ntae, etumo ninche laata enche ebore.

⁶Kore tiniomon, tijing'a atua lgilata le nkaji ino, ninken, niomon Papa lino otii ng'oji neing'opa, amu kore Papa lino odol nenia naaing'opa, naa ikilaaki.

⁷<<Naa tiniomonmon ntae, emiingil rereii lemeata tipat, ana neiko loreren lemeyielo Nkai. Amu kejo ninche kening'i tankaraki rereii lenche kumo.

⁸Emitiuu ana ninche, amu keyielo ꞉Papa linchi nenia niyieuu ewuon abaki eitu iomonmon ninye.

⁹Naa, tiniomonmon, entoomon aajo inji: <Papa lang oti chumata, meyanyiti nkarna ino,

¹⁰meeu nkitoria ino, metaasai niyieu to nkop ana netiiu to chumata,

¹¹nchoo iyioo mparri pooki ndaa naitiemu iyioo.

¹²Nipaliki iyioo ntorrok ang, ana payie kitapalikita sii iyioo lolo ooitarruokita iyioo.

¹³Naa mincho iyioo kijing atua ntemat, kake talaku iyioo te Ilo torno.>[14]

¹⁴<<Amu tinipalikiki ntae lolo ooitarruoki ntae, naa kepaliki sii ntae ꞉Papa linchi le chumata.

¹⁵Kake tinimipalikiki ntae ltung'ana ng'ok enche, nemepaliki sii ntae ꞉Papa linchi nkuninchi.

¹⁶<<Naa tinienien nkutukie inchi, emiaku ana lolo ooitaakino oosub nkomomi, amu keidisie nkomomi payie edol ltung'ana aajo keteena nkutukie. Kedede kajoki ntae, etumo ninche laata enche ebore.

¹⁷Kake tinien nkutuk, iela nkue ino, nintuk nkomom,

¹⁸payie medol ltung'ana aajo iteena nkutuk, kake payie edol ꞉Papa lino otii ng'oji neing'opa, oyielo nenia naasai too ng'ojitin neing'opa, nikilaaki iyie.

¹⁹<<Emichumaki ate parakuoicho to nkop nanyayie lasai o kutu, neidim sii lapurrok aatigil inie, nepurroo.

²⁰Kake entipik parakuoicho inchi chumata, inie nemenyayie lasai o kutu, nemegil lapurrok aapurroo.

²¹Amu kore netii parakuoicho ino, naa inie etii ltau lino.

²²<<Kore lkilang'ilang'et le sesen naa nkong'u. Naa teneisupat nkong'u ino, neboreii wong'an sesen lino pooki.

²³Kake tanaa keitorno nkong'u ino, neboreii sesen lino pooki ꞉naimin. Amaa tanaa kera wong'an niata naimin, kewuaa sa inia aimin?

²⁴<<Meatae loidim aisiaayia lkutuaa oare. Amu keibai likae nechamu likae, tanaa eibung'are likae nemenu likae. Mindimdim naa aaisiaayia Nkai o parakuoicho e nkop!

²⁵<<Kore tankaraki inia kaajoki ntae, emiirrana tee nkichoni inchi, aajo nyo inyanya tanaa nyo imatmat anaa sii nyo inchopchop. Amaa, mara kelang nkichon ndaa, nelang sesen nkichopo?

²⁶Eng'ura ja nkueeny e ai, meunicho, nemedung'ucho nemebosoki sii ndaa lkompeii, kake keitoti Papa linchi le chumata. Mirara ntae le tipat aalang ninche?

²⁷Naa amaa taa ntae, ng'ae eirrana oidim neponiki nkichui enye saa nabo?

²⁸Aanyo sii payie iirranana tankaraki nkichopo? Eng'ura ntapuka e soro neiko tenebulu, nemenyok aasicho, nemepiyaicho.

²⁹<<Kake kajoki ntae, eitu abaki eichopo Solomon te nkitoo enye pooki ainyinyikore nabo ee nana tapuka.

³⁰Oi siake ntae oaata nkurukoto kini! Amaa, tanaa nejia eiko Nkai nkujit e soro, naatae ana parri, neikenyu nenang'akini nkima, mara keichop ninye ntae aitalang ninche?

³¹Emiirrana ntae aajo, <Nyo kinya?> anaa <Nyo kimat?> anaa <Nyo kinchop?>

³²Amu kore nenia pooki, naa keirrana loreren lemeyielo Nkai aayiaya. Kake keyielo ꞉Papa linchi le chumata ajo, iyieu ntae nenia pooki.

³³Naa entang'as enteyiai nkitoria enye o sotua oipida tenebo o Nkai, naa keponikini ntae nenia pooki.

³⁴Naaku naa, emiirrana tankaraki teisiere, amu keata teisiere nenyena. Meata mparri nemeata nyamali enye.