Read Samburu Matayo 7 Bible Online

Matayo 7 - Samburu bible

Matayo 7

¹<<Eminguanare lkulie, meiguanareki ntae.

²Amu kore ana ninguanarere lkulie, naa nejia eikoni teneiguanareki ntae. Kore nkiguana nidung'oki likae, naa inia kidung'okini iyie.

³<<Aanyo payie idol somua natii nkong'u e lalache lino, nimidol leng'oti natii nino?

⁴Anaa aji inko tinijoki lalache lino, <Wou maaitai somua,> naa ng'ura, kore iyie ikitii leng'oti nkong'u.

⁵Iyie oitaakino, tang'asa ntai koon inia leng'oti nikiti nkong'u, payie itumoki atoduaa aitai inia somua natii nkong'u e lalache lino.

⁶<<Emincho ldein ntoki nasinya, payie meiwuatuwuatakino aar ntae, niminang'akiki soit ogol nkinyang'a mbitiro, payie meroro tee nkejek.

⁷<<Entoomonu naa keichori ntae, enteyiai, naa itumtum, enkodkodo naa keboluni ntae.

⁸Amu kore pooki ng'ae oomonu, neng'amaa, kore ilo oyiaya naa ketum, kore ilo oikodkod nkutuk e nkaji neboluni.

⁹<<Ng'ae taa ntae aa kore teneomon ꞉nkerai enye mukate, neicho soit?

¹⁰Anaa teneomon sinkir, neicho lasurai?

¹¹Amaa sa tiniyielolo ntae oaara torrok aaichoo nkera inchi nkichoorot supati, kebaa sa eitulusoo Papa linchi oti chumata aichoo lolo oomon ninye?

¹²Kore mbaa pooki niyieu nikintaas ꞉ltung'ana, ntaasa sii iyie ninche nejia, amu nejia ejo nkitanapat e Musa o nkiteng'ena ee loibonok le Nkai.

¹³<<Entijing te ltim opirik, amu kelala ltim, neidapach nkoitiei nalo mutai, naa inie eeim lkumo.

¹⁴Kake kepirik ilo tim, naa ronkai nkoitiei nalo nkichon, naa lkuni ootum.

¹⁵<<Entodol ate too loibonok le sapare, amu kepuonu nitii eichopito nkilani ee nkerra, kake kore atua ltauja lenche, naa suyiani oonyeicho.

¹⁶Naa taa lng'anayio lenche iyielouu ninche. Amaa, kebosu ꞉ltung'ana lmusabibu too lkeek loo lkuku, anaa lng'abolo too lpopong?

¹⁷Naaku kore lcheni pooki supat, nejing lng'anayio supati, kake kore lcheni pooki torno, nejing lng'anayio torrok.

¹⁸Mejing ꞉lcheni supat lng'anayio torrok, nemejing sii ꞉lcheni torno lng'anayio supati.

¹⁹Kore lcheni pooki lemejing lng'anayio supati, nedung'i, nenang'akini nkima.

²⁰Naaku naa, taa lng'anayio lenche iyielouu ninche.

²¹<<Mara pooki ng'ae laaipot ajo, <Laitoriani, Laitoriani,> ojing nkitoria e chumata, kake ilo oas nayieu Papa lai oti chumata.

²²Kaajoki kenya lkumo te inia parri e nkiguana, <Laitoriani, Laitoriani, amaa, ta nkarna ino, eitu apa kimbonicho, nikimiraa lairiruani, nikintoki aas mbaa kumo e nking'asia?>

²³Naibalie ajoki ninche inia kata, <Mayielo nanu ntae, enchom entung'ayieeki lagilak loo nkitanapat.>

²⁴<<Kore pooki ng'ae oning kulo omon lainien, neas, naa inji etuwuana ltung'ani ng'en otecheta nkaji enye te nkeper e ndadapoi.

²⁵Necha nchan, nenang'unye nkariak, nekutunye lwuao kitok, nenang inia aji, kake eitu eurori, amu etuunieki lkitamanyunoto lenye nkeper e ndadapoi.

²⁶Kake kore ltung'ani pooki oning kulo rerei lainien nemeas, naa inji etuwuana ltung'ani oamada otecheta nkaji enye te nkeper e sunyai.

²⁷Necha nchan, nenang'unye nkariak, nekutunye lwuao, nenang inia aji, neurori, nemutmuta.>>

²⁸Kore payie eidip Yeso atejo kuna baa, neing'asia nkiteng'ena enye lturrurri,

²⁹tankaraki eiteng'ena ana ilo oata nkitoria, namara tana laiteng'enak lenche loo nkitanapat.