Read Samburu Matayo 8 Bible Online

Matayo 8 - Samburu bible

Matayo 8

¹Kore payie edou Yeso to lowua, neirukurukore ꞉lturrurri kutuaa.

²Nelotu inia kata ltung'ani oata nkeeya ee lbolot netii, negil kung tekue ninye, nejo, <<Laitoriani, tanaa iyieu, naa ikindim aichiunyie matusupata.>>

³Neitusunyaa Yeso nkaina enye, neiseyie ilo tung'ani, nejoki, <<Kayieu! Inchiu!>> Neichiunyieki inia kata nkeeya ee lbolot.

⁴Neitoki Yeso ajoki ninye, <<Nchoo metaa meata ltung'ani liliki ana. Kake chomo, ntoduaa koon laitainoni la lasar, nincho nkichooroto e lasar napa naitanapichie Musa, metaa limunoto naitisipu nkichiunoto ino tee ninche.>>

⁵Kore ejing'ita Yeso lkerenket le Kapernaum, nelotu lkitok loo Rroman oitacheki sikarini oonyikaa ip nabo netii, nesai

⁶ajoki, <<Laitoriani, keperito laisiaayiani lai ta nkang etigiligile, nemeito oleng.>>

⁷Nejoki ꞉Yeso ninye, <<Naaku, nanu iyieu nalotu aichiunyie?>>

⁸Newoliki ꞉ilo kitok ajoki, <<Laitoriani meichiaakino eji tanaaku iyie likincho nkanyit nawuenyi alotu ajing'u nkaji ai. Kake tejo ake rerei obo, naa keichiu laisiaayiani lai.

⁹Amu kore sii nanu, naa kara ltung'ani otii taabori nkitoria, naata sii sikarini laatii taabori nanu. Kore payie ajoki ele, <Chomo!> nelo, najoki elde, <Wou!> nelotu, najoki laisiaayiani lai, <Taasa ana!> neas.>>

¹⁰Kore payie ening ꞉Yeso inia, neing'asia, nejoki lolo ooirikurukore ninye, <<Kedede kajoki ntae, eitu hoo adol ltung'ani te Isirael oata nkurukoto kitok nawuana ana.

¹¹Kake kajoki ntae, kepuonu lkumo eing'uaa neiliepunyie o nedoyierie ndama, newueni tenebo o Abraam o Isaka o Yakobo te nkitoria e chumata.

¹²Kake kore naapa kera e nkitoria, nenang'ari aulo atua naimin, ng'oji neichirieki, neonyeki lala te mion.>>

¹³Nejoki ꞉Yeso ilo kitok loo sikarini, <<Chomo! Metaasai te iyie inia, ana niruko.>> Neichiunyieki laisiaayiani lenye inia kata.

¹⁴Kore payie ejing Yeso atua nkaji e Petero, nedol nkautani naiu ntomononi e Petero eper to rruat eibisiong, eata nkirewua.

¹⁵Neiseyie ꞉Yeso nkaina enye, neing'uaa ninye ꞉nkirewua, neinyuototo, neng'asu aichoo ninye ndaa.

¹⁶Kore payie eaku kuarie, neyakini ninye ltung'ana kumo oaata lairiruani, nearaa lairiruani te rerei lenye, neichiunyie ltamoyia pooki.

¹⁷Naa ketaase ana, payie ebaya inia apa natejo Nkai aimu loiboni lenye Isaya, ejo, <<Ninye koon owa nchalan ang, nenap moyianitin ang.>>

¹⁸Kore payie edol ꞉Yeso lturrur kitok emanita ninye, neitanap looiteng'eni lenyena metalang'aki likae kokun le mpaso.

¹⁹Nelotu laiteng'enani obo loo nkitanapat, nejoki, <<Laiteng'enani, kaairukurukore iyie ng'oji pooki nilo.>>

²⁰Newoliki ꞉Yeso ajoki, <<Keata mbariak udot, neata nkueeny e ai nkajijik enche, kake kore Nkerai e Ltung'ani meata neitepetaa nkue enye.>>

²¹Nejoki ꞉lobo loo looiteng'eni lenyena, <<Laitoriani, nchooki ang'as machomo anukaa papa lai!>>

²²Nejoki ꞉Yeso ninye, <<Rukurukoreeki nanu! Nchoo lmeneng'a enukaa lmeneng'a lenche.>>

²³Nedir ꞉Yeso meli, neirukurukore ꞉looiteng'eni lenyena, nepuo.

²⁴Neinyuototo inia kata lkutati sapuk taatua mpaso, metaa kore inia meli, eyiata eimilie ꞉laing'ok le nkare, kake kore ꞉Yeso naa keilura.

²⁵Nepuo looiteng'eni lenyena netii, neinyoyie aajoki, <<Laitoriani, ntejeu iyioo amu etaa kindaaya!>>

²⁶Nejoki ninche, <<Aanyo payie iuriechiochio? Oi ntae oaata nkurukoto kini!>> Neinyuototo inia kata, nebuaaki ilo kutati o mpaso. Kore duo ilo kutati oinyuo ta mpaso, neitirring'a katukul.

²⁷Neing'asia ꞉ninche, neipara aajo, <<Amaa, aa pukunoto e ltung'ani ana? Kening ninye abaki ꞉lkutati o mpaso!>>

²⁸Kore payie elang ꞉Yeso alo ildo kokun, nebaya nkop ee Lgadara.[15] Neipung'oki ꞉ltung'ana oare oaata lairirua eing'uaa nkuraren. Kore ninche naa ltung'ana ooricho oleng, naaku meatae hoo ltung'ani oitieu aima inia oitiei.

²⁹Nebuaaki ꞉ninche Yeso, nejoki, <<Nkerai e Nkai, nyo dei irum iyioo? Iyewuo dei ene aitam iyioo sina ewuon eng'or ng'amata ang?>>

³⁰Kore te inie, netii mboo kitok ee mbitiro naadaa elakuaniki ninche.

³¹Nelej ꞉lairiruani Yeso aajoki, <<Kore tanaa imiraa iyioo aipung'ie, terewa iyioo matijing idia boo ee mbitiro.>>

³²Nejoki ninche, <<Enchom!>> Neipung'u ninche, nepuo aajing nenia bitiro, nejo dii inia boo pooki aaitutokino atua mpaso. Neidaaya ninche pooki taatua nkare.

³³Kore payie edol lchekuti otii kuna bitiro nataase, neisig aapuo lkerenket. Nelikoo mbaa pooki naataasate naaipirita mboo ee nenia bitiro o naaipirita lolo tung'ana oaata apa lairirua.

³⁴Neinyuototo inia kata lkerenket pooki aipung atumore Yeso. Kore payie edol ninye, neomon metung'ai nkop enche.