Read Samburu Matayo 9 Bible Online

Matayo 9 - Samburu bible

Matayo 9

¹Nejing Yeso meli achuko tenebo o looiteng'eni lenyena, nelang mpaso nebaki lkerenket omanya.[16]

²Etii apa inia kata ltung'ana oonapita ltung'ani otigilgile aayaki Yeso. Nenapu eperito to lchoni. Kore payie edol ꞉Yeso nkurukoto enche, nejoki ilo otigilgile, <<Ntogolo ltau nkerai ai, amu kepalikino ng'ok inono.>>

³Nchoo laiteng'enak loo nkitanapat, neing'amng'am maate aajokino, <<Ketedia ꞉ele tung'ani Nkai!>>

⁴Kake kore amu keyielo Yeso mparrunot enche, nejoki ninche, <<Aanyo paa mbaa torrok iparraa taa ltauja linchi?

⁵Aa kaa nalelek, teneji, <Kepalikino ng'ok inono,> anaa <Inyuo chomo!>?

⁶Kake kore payie iyielouu aajo keata Nkerai e Ltung'ani nkitoria to nkop napalikinyie ng'ok>> - nejoki taa ilo tung'ani otigilgile - <<Inyuo ntacho tarrapu lchoni lino, chomo nkang.>>

⁷Neinyuototo ninye, nelo nkang.

⁸Kore payie edol ꞉lturrurri ana, neguretu, neisis Nkai naichoo ltung'ana nkitoria natiu nejia.

⁹Kore einyuototo Yeso alo teinie, nedol ltung'ani oji nkarna enye Matayo ewuon to ng'oji nelakieki kodi. Nejoki, <<Rukurukoreeki nanu!>> Neinyuototo Matayo, neirukurukore ninye.

¹⁰Kore aitoki, enyeita Yeso ndaa ta nkaji enye, nepuonu laitalakunok kumo le kodi o loo ng'ok aanya ndaa tenebo o Yeso o looiteng'eni lenyena.

¹¹Kore payie edol ꞉Lparisayo ana, neipar looiteng'eni lenyena aajoki, <<Aanyo payie enya laiteng'enani linchi ndaa tenebo o laitalakunok le kodi o loopeny ng'ok?>>

¹²Kore payie ening ꞉Yeso inia, nejoki ninche, <<Mara lolo lememoyiaa ooyieu labaani kake lolo oomoyiaa ooyieu.

¹³Kake enchom enteng'enare kipirte e ele rerei le Nkai: <Kayieu lng'er mara lasar.> <<Amu eitu alotu nanu aipot loosipat, kake loopeny ng'ok.>>

¹⁴Nepuonu tesiedi inia ꞉looiteng'eni le Yoana neipar ninye aajoki, <<Aanyo chiaake payie kien iyioo o Lparisayo nkutukie, nemeen ꞉looiteng'eni linono?>>

¹⁵Nejoki ꞉Yeso, <<Amaa sa, aji eiko lomon lo ltung'ani oyemicho teneisinanio ewuon eboitiere ninche? Kake kebau mperot naayae loyemicho aaitung'aa ninche, neyen taa nkutukie.

¹⁶Meatae ltung'ani oripaki rache e nkila ng'ejuk nkila musana, amu keng'erari inia rache te inia kila musana, nerroyo nkijata oleng.

¹⁷Nemeatae sii ltung'ani opik naichuo e lmusabibu ng'ejuk lbenia musan, amu tenepik, nekija lolo benia musan, neibukori inia aicho, nerroyo lolo benia. Kake kore naichuo ng'ejuk naa lbenia ng'ejuko epiki.>>

¹⁸Kore elikita ꞉Yeso ninche kuna baa, nchoo lkitok le Sinagogi, nelotu, negilaki kung, nejoki, <<Etepero ake taata ntito ai, kake wou, nteleki ninye nkaina ino, naa keitoki apiu.>>

¹⁹Neinyuototo Yeso o looiteng'eni lenyena, neirukurukore.

²⁰Nchoo aitoki, nelotu nkitok namuai, naturukie lodo too larin tomon o oare aimu tooriong Yeso, neiseyie sarkudai le nkila enye.

²¹Amu kejo ta ltau lenye, <<Kore ake tanaiseyie sarkudai le nkila enye, naa kaichiu.>>

²²Neiwuatuwuata Yeso, nedol ninye, nejoki, <<Ntogolo ltau lino, ntito ai, amu /ikinchiunyie ꞉nkurukoto ino.>> Kore ang'asu te inia kata, neichiu.

²³Kore payie ebaki Yeso nkaji e laduo kitok le Sinagogi, nedol lolo ookut ndulen, eng'or nukaroto e lmeneng'ai o lturrur eichirita.

²⁴Nejo, <<Ewuang'a, amu eitu eye ntito, kake keilura ake.>> Nekueniyie ninye.

²⁵Kore payie eipung'ieki ilo turrur boo, nejing Yeso nkaji, neibung inia tito nkaina, neinyuototo ninye.

²⁶Neibulaa kulo omon inia kop pooki.

²⁷Kore eloito Yeso aing'uaa inie, neirukurukore ꞉ltung'ana oare modook, ebuakita aajo, <<Ng'erru iyioo, Layieni le Daudi!>>

²⁸Kore payie ebaki nkaji namanya, nepuonu lolo modook oare neti, neipar ajoki, <<Irukruk ntae aajo kaidim ataasa inia duo niyieuu?>> Newoliki aajo, <<Ee Laitoriani.>>

²⁹Neiseyie nkonyek enche, nejo, <<Enchoo easai taa ntae ana ake niruko.>>

³⁰Nebolo nkonyek enche te inia kata. Neitemioki ꞉Yeso ninche ajoki, <<Entodol, emincho hoo eyielou ltung'ani obo ana nataase.>>

³¹Kake neipung ninche, neitarasaa lomon lenyena te inia luboto pooki.

³²Kore eipung'uto ninche teinie, neyakini aitoki Yeso ltung'ani oata lairirua nemeidim sii airoro.

³³Kore payie eitupukuni lairirua taatua ilo tung'ani, neng'asu ninye airo. Neing'asia lturrurri ejo, <<Eitu aikata edoli mbae natuwuana ana taatua Isirael.>>

³⁴Kake kore Lparisayo, nejo, <<To ngolon e lkitok laa lairiruani eipung'unyie ꞉ninye lairiruani.>>

³⁵Neimaa Yeso lkerenketi o nkang'ite pooki, eiteng'enicho tee Sinagogini, nelikoo Lomon Supati le nkitoria e chumata, neichiunyie pooki keeya o moyian.

³⁶Kore payie edol lturrurri, neduaaki lng'er tankaraki naitanyamalaki, nemeata reto, tana nkerra nemeata lchekut.

³⁷Nejoki looiteng'eni lenyena, <<Keikitok ndung'ore e lchampa kake keikuni laasak le siaai.

³⁸Naaku entoomon Lopeny ndung'ore metereu laasak le siaai atua ndung'ore enye.>>