Read Samburu Marko 1 Bible Online

Marko 1 - Samburu bible

Marko 1

¹Kore Lomon Supati ooipirita Yeso Kristo, Nkerai e Nkai naa ketang'asua,

²ana naigero loiboni le Nkai Isaya ejo: <<Teyielo ajo, kareu lkipaaret lai tekue iyie, likintibiraki nkoitiei ino>>

³<<Ening'o ltoilo le ilo obuakita te lkees ejo, <Entibiraki Laitoriani nkoitiei, entorioi nkoitieii kunini enyena.> >>

⁴Nelotu taa ltung'ani oji Yoana Laipatisani aipung'oki lkees, elikoo nkipatisare e nkirriidunoto ee ng'ok, nayau mpalikinoto ee ntorrok.

⁵Nedotunyie ꞉nkop pooki e Yudea o ltung'ana lo lkerenket le Yerusalem aapuo netii ninye, neipatis ninche te sere e Yordan, eibalie ꞉ninche ng'ok enche.

⁶Kore apa Yoana neichopito nkilani naaitibirieki lpapit le ntames, nerretenita nkimeente e nchoni te nkiji enye, nenya lmaat o naichuo e soro.

⁷Nelikorita ninye ejo, <<Kore lolotu tesiedi nanu, naa keata ngolon kitok alang nanu, namaaichiaakino abaki nanu tanairrigo alak nkeenita ee namuka enyena.

⁸Kaipatis nanu ntae ta nkare, naa kore ninye keipatis ntae ta Ltau Sinyati.>>

⁹Kore tee nenia perot nelotu Yeso eing'uaa lkerenket le Nasaret e Galilaya, neipatis ꞉Yoana te sere e Yordan.

¹⁰Kore ake pee eipung'u Yeso taatua nkare, nedol chumata eoro abolo o Ltau Sinyati edou te nkitanyanyukoto e nkutukurruk, newuenie ninye.

¹¹Nening'oi ltoilo oing'uaa chumata ejo, <<Ira iyie Nkerai ai nacham, niata omom ta nanu.>>

¹²Kore ake te inia kata nereu ninye ꞉Ltau Sinyati mechomo lkees,

¹³newuon te inie mperot artam etemita ꞉Chitani, neboitiere ng'uesi e soro, neisiaaita ꞉lmalaikani ninye.

¹⁴Kore eidipaki aateen Yoana, nelo Yeso Galilaya alikoo Lomon Supat le Nkai.

¹⁵Nejo, <<Etabawua nkata, netinyikua nkitoria e Nkai. Erriidu nirukuruk Lomon Supati le Nkai.>>

¹⁶Kore eloito Yeso te nchepata e mpaso e Galilaya, nedol Simon o lalache lenye oji Andirea enang'akita lgiitani ooibung'ieki sinkirri atua nkare, amu kera apa ninche laibung'ak loo sinkirri.

¹⁷Nejoki ꞉Yeso ninche, <<Ootu erukurukoreeki, naa kaitaa ntae laibung'ak loo ltung'ana.>>

¹⁸Neing'uaa nabokata lolo giitani, nepuo aairukurukore ninye.

¹⁹Kore pee eikonyi ninye alo teinie, nedol Yakobo layieni le Sebedayo o lalache lenye oji Yoana, etii atua meli aaitibirita lgiitani.

²⁰Neipot ninche nabokata, neing'uaa papa lenche Sebedayo tenebo o laisiaayiak lenyena ooigero metaasa siaai te meli, nepuo aairukurukore ninye.

²¹Nepuo lkerenket le Kapernaum, naa kore ake pee ebau mparri e Sabato, nejing Yeso atua Sinagogi neng'asu aiteng'en ltung'ana.

²²Neing'asia ltung'ana te inia kiteng'ena enye, amu keiteng'ena ninche ana ilo oata nkitoria, nemetuwuana ana laiteng'enak lenche loo nkitanapat.

²³Kore ake te inia kata, netii apa ltung'ani oata lairirua[1] inia Sinagogi enche. Nebuak to ltoilo sapuk,

²⁴ejo, <<Yeso le Nasaret, nyo iyieunyie iyioo? Iyewuo aar iyioo? Kayielo ajo ng'ae ira, ira ilo Sinyati le Nkai.>>

²⁵Nekusakan ꞉Yeso aing'ode ajoki, <<Tigirai, mpung'u tung'ai ninye!>>

²⁶Neipuch ꞉lairirua ilo tung'ani, nebuak to ltoilo sapuk, neipung aing'uaa ninye.

²⁷Neing'asia ltung'ana pooki, neipara ninche maate aajo, <<Aa bae ana? Nkiteng'ena ng'ejuk naata nkitoria! Kebuaaki abaki ꞉ninye lairiruani, nening ninye!>>

²⁸Kore taatua nkini kata nebulaa lomon le Yeso too lubot pooki e Galilaya.

²⁹Kore ake payie eipung ninche aaing'uaa Sinagogi, nepuo tenebo o Yakobo o Yoana nkang e Simon o Andirea.

³⁰Kore nkautani e Simon naiu ntomononi enye naa keperito ninye emuai tankaraki naata nkirewua. Nelikini Yeso nabokata lomon lenyena.

³¹Nelo netii ninye. Kore payie eibung nkaina enye, nerrapu, neing'uaa ninye ꞉inia kirewua, neng'asu aicho ninche ndaa.

³²Kore teipa, nochi nadoorie ndama, neyakini Yeso ltamoyia pooki o lolo oaata lairiruani.

³³Netodotunyie ilo kerenket pooki, aiturrurrokino nkutuk e inia aji.

³⁴Neichiunyie ꞉Yeso lkumo oata moyianitin kumo naapaapaacha, nearaa meeipung'o lairiruani kumo, kake eitu eicho lolo airiruani meiroro, amu keyielo ꞉ninche ninye.

³⁵Kore tasiran ewuon emismis pii, neinyuototo Yeso aipung te inia aji, nelo ng'oji neliyio, neomon.

³⁶Neng'asu Simon o lboitieii lenyena aayiaya ninye oleng.

³⁷Netum ninye nejoki, <<Ikiyieita iyie ꞉ltung'ana pooki.>>

³⁸Nejoki Yeso, <<Maapetin nkae ng'oji, maapetin lkulie kerenketi oaataana, paatum sii atilikoi Lomon Supati teinie, amu inia apa paa ayewuo nkop.>>

³⁹Nemanaa ninye te inia kop e Galilaya pooki elikoo Lomon Supati tee Sinagogini enche, nearaa sii lairiruani meeipung'o.

⁴⁰Nelotu ltung'ani oata nkeeya ee lbolot netii Yeso, elejita negilaki kung, ejoki, <<Laitoriani, tanaa iyieu, naa ikindim aichiunyie matusupata.>>

⁴¹Kore tankaraki natoduaka ꞉Yeso lng'er, neitorio nkaina enye neiseyie, nejoki, <<Kayieu! Tusupata!>>

⁴²Kore nabokata, neing'uaa ninye ꞉inia keeya ee lbolot, neichiu ninye.

⁴³Nereu ꞉Yeso ninye nabokata mechomo, neing'ode ajoki,

⁴⁴<<Nchoo metaa meata hoo ltung'ani liliki ana. Kake chomo, ntoduaa koon laitainoni la lasar, nincho nkichooroto nairirikino bioticho nitumo, ana napa naitanapichie Musa, metaa limunoto naitisipu nkichiunoto ino tee ninche.>>

⁴⁵Kake kore abaki etilikaki neas, neng'asu ninye alikoo kulo omon oleng aitubulaa inia naitaasaki. Naaku, merekure eidim Yeso atijing'a atua lkerenket hoo obo eyieloi, kake newuon ake too ng'ojitin neeliyio. Kore ake etiu nejia, nepuonu ltung'ana too lubot pooki netii ninye.