Read Samburu Marko 10 Bible Online

Marko 10 - Samburu bible

Marko 10

¹Neinyuototo Yeso alo te inie, nebaki mbata e Yudea, natii teidialo sere e Yordan. Neigil lturrurri loo ltung'ana aapuonu netii ninye, neiteng'en ninche ana neiko chiaake.

²Nchoo lbata loo Lparisayo, nepuonu aatem ninye, neipar aajoki, <<Amaa, keichiaakino tenear ꞉lpayian nkauti e mparratut enye?>>

³Newoliki ajoki, <<Nyo apa eitanapa ntae Musa?>>

⁴Nejoki, <<Eichoo apa ꞉Musa lpayian mpaach naigerie mpalai naarie nkauti e mparratut enye, nemiraa.>>

⁵Nejoki ꞉Yeso ninche, <<Kore tankaraki nagol ltauja linchi, neigeroki ntae Musa kuna kitanapat.

⁶Kake kore ta ng'asunoto payie eitai Nkai nkop, neitibir Nkai ninche, lee o lipong.

⁷Kore tankaraki inia, naa keing'uaa lee menye o ng'otonye, neibung'are mparratut enye,

⁸neaku pukura sesen obo, metaa merekure era seseni oare, kake sesen obo.

⁹Neaku kore inia naitutumo ꞉Nkai, mincho ltung'ani eor.>>

¹⁰Kore ake etii ninche nkaji, neipar aitoki ꞉looiteng'eni lenyena ninye inia bae naipirita arata e nkauti.

¹¹Nejoki ninche, <<Kajoki ntae nchere, kore pooki ng'ae oar nkauti e mparratut enye, neigil ayemicho, naa etaasa loloito o ninye.

¹²Naa teneiturraa ꞉mparratut lpayian lenye, metari nkauti, neyem ꞉likae, naa etaasa ninye loloito.>>

¹³Neyaki ltung'ana ꞉Yeso nkera kunini meiteleki nkaik, kake nekusakan ninche ꞉looiteng'eni lenyena aaing'ode.

¹⁴Kore pee edol Yeso inia, negoro. Nejoki ninche, <<Enchoo nkera meotu natii! Emimbooyo, amu kore nkitoria e Nkai naa noo ltung'ana ootuwuana nkera.

¹⁵Kedede kajoki ntae, kore lemeng'amaa nkitoria e Nkai tana nkerai kini, naa mejing katukul.>>

¹⁶Nerrapu ꞉ninye nkera aibung, neiteleki nkaik amayian.

¹⁷Kore eibung'uta ꞉Yeso nkoitiei alo te inie, nekuetiki ninye ltung'ani obo negilaki kung, neipar ajoki, <<Laiteng'enani supat, kaa aas payie ajung nkichon ee ntarasi?>>

¹⁸Nejoki ꞉Yeso, <<Aanyo payie kimpot ajo supat? Meatae hoo supat mara Nkai apeny.

¹⁹Iyielo nkitanapat naajo, <Miar metua, miloloito, mipurrucho, minteeniki likae sapare, miyayie likae ropiyiani to loseg, ianyita papa lino o ng'utunyi.> >>

²⁰Nejoki ninye, <<Laiteng'enani, kaibung'a kuna pooki ang'asu te lelero ai.>>

²¹Kore pee eing'or ꞉Yeso ninye naaku kecham, nejoki ninye, <<Iking'oriki naa ntoki nabo, chomo timira ntoki pooki niata nincho laisinak, naa itum parakuoicho te chumata. Nikilotu taa airukurukore nanu.>>

²²Kore pee ening ꞉ilo tung'ani inia, nesub nkomom, nelo etanyamala amu keata apa ninye parakuoicho kitok oleng.

²³Neitamanaa ꞉Yeso nkue nejoki looiteng'eni lenyena, <<Kebaa sa egol njing'ata e nkitoria e Nkai taa lparakuo.>>

²⁴Neing'asia looiteng'eni lenyena too lolo rereii lenyena. Kake nejoki ꞉Yeso aitoki ninche, <<Nakera, kegol oleng njing'ata e Nkitoria e Nkai!

²⁵Kelelek pee eim ntames udoto e ltudu alang ltung'ani parakuoni tenejing atua Nkitoria e Nkai.>>

²⁶Neing'asia katukul looiteng'eni lenyena, nejokino maate, <<Naa ng'ae sa oidim nejeu?>>

²⁷Neing'or ꞉Yeso ninche nejoki, <<Kore too ltung'ana naa meidimai ana, kake kore ta Nkai naa keidimai ntokitin pooki.>>

²⁸Neng'asu ꞉Petero airorie ninye ajoki, <<Ng'ura, ikitung'aitie iyioo ntokitin pooki, nikipuonu aairukurukore iyie!>>

²⁹Nejoki ꞉Yeso ninche, <<Kedede kajoki ntae, meatae ilo otung'ayie nkang tanaa lalachera tanaa nkanachera tanaa ng'otonye tanaa menye tanaa nkera tanaa lchampai, tankaraki nanu o tankaraki Lomon Supati, lemeichori nkatitin ip tana ng'amata e taata, nkajijik o lalachera o nkanachera o noo yieyio o nkera o lchampai tenebo o sinaitin ooitami, naa kore ta ng'amata nalotu, netum nkichon ee ntarasi.

³⁰

³¹Kake kore lkumo oaara lekue neaku le siedi, naa kore le siedi neaku lekue.>>

³²Kore to nkoitiei eiliep aapuo Yerusalem, netii Yeso tekue ninche, neing'asia looiteng'eni lenyena, neiputukuny lolo ooijipita ninche. Neitoki aiwuang'ie loochi tomon oare, neng'asu aliki nenia ꞉mbaa naaipung'oki kenya ninye.

³³Nejoki, <<Entining! Ikiliepita aapuo Yerusalem, naa kepiki Nkerai e Ltung'ani nkaik ee lkutuaa laa laitainok la lasar o naa laiteng'enak loo nkitanapat. Nedung'oki nkiguana e lkiye, neicho ltung'ana loo lkulie oreren,

³⁴neikordod ninye, nenataki nkamlak, neidong te liche, near metua, kake kore eicha mperot uni, nepiu.>>

³⁵Kore layiok le Sebedayo, Yakobo o Yoana, nepuo netii ninye, nejoki, <<Laiteng'enani, ikiyieu payie intaas iyioo inia nikimparu.>>

³⁶Neipar ninche, ajoki, <<Nyo duo iyieuu naasaki ntae?>>

³⁷Nejoki ninye, <<Nchoo metaa kewuenie lobo te iyioo nkaina ino e tetene, newuenie likae ne kidienye taatua nkitoo ino.>>

³⁸Kake nejoki ꞉Yeso ninche, <<Miyielolo hoo ntoki niomonutata. Amaa, indimdim aatamat lkikompe le mion lamat nanu kenya, tanaa eipatisi ntae nkipatisare e mion naipatisi nanu?>>

³⁹Nejoki, <<Ee ikindim.>> Kake nejoki ꞉ninye ninche, <<Imatmat ilo lkikompe lamat neipatisi ntae nkipatisare naaibatisi,

⁴⁰kake kore wuanata nawuenie tetene anaa kidienye ai, naa maitore nanu amu noo lolo ooitibirakaki.>>

⁴¹Kore pee ening ꞉lolo kulie ooiteng'eni lenyena tomon inia, negoro ninche tankaraki Yakobo o Yoana.

⁴²Neipotu ꞉Yeso ninche nejoki, <<Iyielolo aajo, kore lolo ooji laitoriak loo loreren naa keibooki ninche nkop, naa kore lkutuaa lenche nebuaaki.

⁴³Kake metiu nejia taa ntae. Amu kore loyieu neaku kitok taa ntae naa keyiere pee eaku laisiaayiani linchi,

⁴⁴naa kore loyieu neaku lekue, naa keyiere neaku rrindik loo pooki.

⁴⁵Amu eitu abaki elotu Nkerai e Ltung'ani meisiaai, kake keyewuo aisiaaicho, neitai nkichui enye alakunyie lkumo.>>

⁴⁶Nebaki ꞉ninche lkerenket le Yeriko. Kore eipung'uto Yeso o looiteng'eni lenyena o lturrur kitok teinie, netii ltung'ani modooni oomonicho ewuon tabata nkoitiei. Kore nkarna enye naa keji Bartimayo oara layieni le Timayo.

⁴⁷Kore pee ening ajo Yeso le Nasaret ilo, neng'asu abuak aichiraki ajo, <<Yeso, Layieni le Daudi, ng'erruaaki nanu!>>

⁴⁸Nekusakan aaing'ode ꞉ltung'ana kumo ninye metigirai, kake neitoki ninye abuak aichiraki oleng ajo, <<Layieni le Daudi, ng'erruaaki!>>

⁴⁹Neitache Yeso nejoki ninche, <<Empoto ninye.>> Neipotu ꞉ninche ilo tung'ani modooni, nejoki, <<Tonyuaa! Inyuo ntacho amu ikimpotito.>>

⁵⁰Nenang'aa ꞉ninye nkila enye e oriong nejo chut aipirri alo netii Yeso.

⁵¹Nejoki ꞉Yeso ninye, <<Nyo iyieu iyie naaitaas?>> Nejoki ꞉ilo modooni, <<Rrabuni[24], kayieu payie adolichoi aitoki.>>

⁵²Nejoki ꞉Yeso, <<Chomo, amu /ikinchiunyie ꞉nkurukoto ino.>> Nedolichoi ninye nabokata, neinyuototo airukurukore Yeso to nkoitiei.