Read Samburu Marko 11 Bible Online

Marko 11 - Samburu bible

Marko 11

¹Kore pee enyikaki ꞉ninche Yerusalem, netabakita Betepage o Betania naatii Lowua loo Lng'erriyio, neirruaaya ꞉Yeso looiteng'eni lenyena oare,

²nejoki ninche, <<Enchom lkerenket otii tekue ntae naa kore ake nijing'ieng'ie, itumtum lkurrarru oena leitu aikata ewuenie ꞉ltung'ani nkeper. Entalaku nirikuku ene.

³Teneipara ntae ltung'ani ajoki, <Aanyo pee iasias ana?> Entejo, <Laitoriani oyieu, naa kereu ltung'ana oochuku tanakata.> >>

⁴Nepuo netum lkurrarru otii tabata nkoitiei oena to ltim le nkang le ilo kerenket, nelaku ninye.

⁵Kore lbata loo ltung'ana ooitachoo teinie, nejoki ninche, <<Nyo iasitata? Aanyo pee ilakuku ele kurrarru?>>

⁶Nejoki ninche ana duaake netiaka Yeso metiaaki, nepalaa ꞉ltung'ana ninche mechomo.

⁷Neyaki Yeso ilo kurrarru, neiteleki nkilani enche, nedir awuenie nkeper.

⁸Kore ltung'ana kumo, nesapan nkilani enche to nkoitiei, neitoki lkulie aadung'u mbene ee lkeek too lchampai nesapan.

⁹Kore lolo tung'ana otii tekue ninye o lolo ooirukurukore tesiedi, nebuak aajo, <<Hosana![25]>> <<Emayiana ilo olotu ta nkarna e Laitoriani!>>

¹⁰<<Emayiana nkitoria nalotu e papa lang Daudi!>> <<Hosana te idie te chumata!>>

¹¹Nejing Yeso Yerusalem nelo atua nkaji e Nkai. Kore pee eidip aaing'ura ntoki pooki natii, neipung alo Betania tenebo o lolo tomon oare tankaraki kemuto.

¹²Kore pee eikienyu eing'uaa ninche Betania, neisumachu Yeso.

¹³Nedol te nelakua lng'aboli obore mbene, nelo aing'uraa tanaa ketum lng'anayio. Kore pee ebaki ilo cheni, netum aa mbene aapeny, amu mara ng'amata ee lng'abolo.

¹⁴Nejoki ꞉Yeso ilo ng'aboli, <<Nchoo paa mikinyiayie aikata ꞉ltung'ani lng'anayio.>> Nening looiteng'eni lenyena inia natejo ninye.

¹⁵Nebaki ꞉ninche Yerusalem, naa kore pee ejing Yeso atua boo e nkaji e Nkai, neng'asu amiraa lolo oomiricho o looinyiang'icho meeipung'o te inie. Neuroki nkop misaii ee lolo apa ooibelekeny ropiyiani o lorikan loo lolo apa oomirita nkutukurruki,

¹⁶nemitiki pooki ng'ae eim atua nkaji e Nkai enapita abaki ntoki nabo.

¹⁷Neiteng'en ninche nejoki, <<Aa meigero ajo, <Kore Nkaji ai naa keji nkaji e nkomono too loreren pooki>? Kake intaa ntae <nkapune ee lapurrok.> >>

¹⁸Nening ꞉laitainok kutuaa la lasar o laiteng'enak loo nkitanapat inia, neng'asu aaing'oru nkoitiei naarie ninye metua, amu keurie ninye, tankaraki naing'asia nkiteng'ena enye lturrur pooki.

¹⁹Kore pee eaku teipa, neipung ninche[26] aaing'uaa ilo kerenket.

²⁰Kore epuoito ninche tasiran, nedol lang'ole ng'aboli etoyio ng'oji pooki, ang'asu taa ntana.

²¹Neparru Petero nejoki Yeso, <<Laiteng'enani, ng'ura! Kore lang'ole ng'aboli litediaa, etoyio!>>

²²Nejoki ꞉Yeso ninche, <<Entaa loata nkurukoto ta Nkai.

²³Kedede kajoki ntae kore tenejoki ꞉ltung'ani ele donyuo, <Oi kidotuni nikintodokini mpaso,> nemeata lng'ach ta ltau lenye, kake keiruk ajo keasai inia najoito, naa keasakini ninye inia.

²⁴Naaku naa kajoki ntae kore pooki niomonunu to nkomono, eruko aajo itumo, neaku ninchi.

²⁵Naa kore nkata nintachoo aaomon, niatata mbae nimenmen te likae, entapaliki payie epaliki sii ntae Papa linchi otii chumata ntorrok inchi.[27]

²⁶Kake kore tanaa mipalikiki lkulikae, mepaliki sii Papa linchi otii chumata ntae ng'ok.>>[28]

²⁷Neitoki ninche aapuonu Yerusalem, naa kore ake emanaa Yeso taatua boo e nkaji e Nkai, nepuonu netii ninye ꞉laitainok kutuaa la lasar, o laiteng'enak loo nkitanapat o lpayiani.

²⁸Neipar ninye aajoki, <<Taa kitoria iasita kuna baa? Anaa ng'ae likinchoo nkitoria niasie ana?>>

²⁹Newoliki ꞉Yeso ajoki, <<Kaipar nanu ntae nkipara nabo, entowolikaaki naa kaliki sii nanu ntae ajo taa kitoria aasita kuna baa.

³⁰Amaa apa nkipatisare e Yoana, chumata eing'uaa ana ltung'ana? Entilikaaki!>>

³¹Nenyakino ninche maate nejo, <<Kore tinikijo, <Chumata eing'uaa,> naa kejoki iyioo, <Oo pee eitu irukruk ninye?>

³²Naa ikijo sa, <Ltung'ana eing'uaa?> >> Kake neurieii ꞉ninche ltung'ana amu keiken apa pooki aajo, kore Yoana naa kesipa ajo loiboni le Nkai.

³³Nejoki ꞉ninche Yeso, <<Mikiyielo iyioo.>> Newoliki sii ꞉Yeso ninche ajoki, <<Maliki abaki nanu ntae ajo taa kitoria aas kuna baa.>>