Read Samburu Marko 12 Bible Online

Marko 12 - Samburu bible

Marko 12

¹Neng'asu airorie ninche too nkitanyanyukot nejo, <<Etuuno ltung'ani lchampa loo lmusabibu, neitamanaa wuata, netur ng'oji neironyunyie naichuo ee lolo ng'anayio lo lmusabibu, nechet ltalet oirritayie. Neitaaki laturok, nelo nkae kop.

²Kore pee ebau nkata e ndung'oto e lchampa, nereu laisiaayiani netii lolo aturok meyau lng'anayio lo lchampa lenye, oaara lenyena.

³Kake neibung ꞉ninche ninye, neidong nechuk ninye mechomo taa nkaik naarok.

⁴Neitoki airruaki ninche likae aisiaayiani lenye, nedany ninye nkue, neitam anyit.

⁵Neitoki ake aigil areu likae, kore ilo near metua. Nereu lkulie kumo, kore lbata loo lolo neidong, kore lkulikae near metuata.

⁶Kore ake lobo ong'or naa layieni lenye oacham. Kore tesiedi pooki nereu ilo ayieni lenye ejo, <Kebaki neanyit nkerai ai.>

⁷Kake nejokino laaduo aturok, <Lele taa lajung'oni. Wootu taa matar ninye metua, pee eaku njung'ore nanang.>

⁸Neibung ninye near metua, nenang'aki aulo e ilo champa.

⁹<<Amaa, kaa sa eas lopeny ilo champa lo lmusabibu? Kelotu naa, kemut lolo aturok, kore ilo champa lo lmusabibu neicho lkulie tung'ana.

¹⁰Amaa, eitu aikata isomsom ntae kulo kigerot, <Kore soit oatanya ꞉lachetak, ninye oataa soit le tipat oirichiu nkaji,

¹¹Laitoriani eing'uaa ꞉ele soit, naa le nking'asia too nkonyek ang>?>>

¹²Nenyok ninche aayiaya nkoitiei naibung'ie ninye, tankaraki keyielo aajo, kore ana kitanyanyukoto naa ninche eipirita. Kake neurie lturrur. Neroyie aaing'uaa ninye, nepuo.

¹³Nerewakini Yeso lbata loo Lparisayo o lbata lo lturrur le Erode, meibung'a te rerei lenye.

¹⁴Kore pee epuonu netii ninye, nejoki, <<Laiteng'enani, ikiyielo aajo ira iyie ltung'ani loosipat, nimintaa toki mbaa naajo ltung'ana, amu mara nkitoo ee ltung'ana ing'or, kake inteng'en nkoitiei e Nkai te ndedei. Amaa! Keichiaakino tenelaakini Kaisari kodi tana meichiaakino? Ikilaaki tana mikilaaki?>>

¹⁵Kake kore amu keyielo Yeso ajo keitaakino ninche, nejoki, <<Aanyo pee kitemtem nanu? Eyakaaki ropiyia[29] nabo matodua.>>

¹⁶Neyaki nabo, neipar ninche ajoki, <<Ne ng'ae ana omom? Oo lkigerot, keigero ajo ng'ae?>> Nejo ninche, <<Ne Kaisari.>>

¹⁷Nejoki ꞉Yeso ninche, <<Enchoo naa Kaisari nenia naara ne Kaisari, ninchocho Nkai nenia naara ne Nkai.>> Neing'asia ninche oleng tankaraki ninye.

¹⁸Nepuonu Sadukayo loochi oojo meatae mpiunoto, neti Yeso neiparichiere aajoki,

¹⁹<<Laiteng'enani, keigeroka apa iyioo Musa ajoki, kore teneye ltung'ani neing'uaa mparratut meata nkera, naa keyiere neyem inia oiliai ꞉lalache lpayian lenye payie eiiki ilo alache lenye oitienye nkera.

²⁰Keatae apa lalachera sapa, kore lekue, neyemicho neye meata nkera.

²¹Neyem le oare inia oiliai, neye aitoki ninye meata nkerai, neitoki le okuni aiko nejia.

²²Neye pukura sapa meata lotung'ayie nkerai. Kore tesiedi, neye sii inia parratut.

²³Amaa kenya ta mparri e mpiunoto, keaku inia parratut na ng'ae, amu keyema pukura sapa?>>

²⁴Nejoki ꞉Yeso, <<Amaa, mara tankaraki inia payie itopong'ori ntae paa miyielolo Lkigerot tanaa sii ngolon e Nkai?

²⁵Amu kore tenepiu ninche taatua lootuata, meyemicho, nemeyemi, kake ketuwuanai ana lmalaikani te chumata.

²⁶Naa amaa naipirita mpiunoto ee lootuata, eitu isomsom ntae to mbuku e Musa inie ng'oji naipirita suur naiyupyup te nkima, neikuna Nkai pee ejoki ninye, <Nanu Nkai e Abraam o ne Isaka o ne Yakobo>?

²⁷Mara ninye Nkai ee lootuata, kake noo looichu. Naaku ipong'oritata.>>

²⁸Kore laiteng'enani obo loo nkitanapat payie ening eikarnyasa ninche, netoduaa ajo ketoolika ꞉Yeso ninche aitibiraki, nelotu netii neipar ajoki, <<Aa kitanapata naisul pooki?>>

²⁹Nejoki ꞉Yeso, <<Kore naisul naa ana, <Tining'o Isirael! Kore Laitoriani Nkai aang, naa Laitoriani obo.

³⁰Naa tachama Laitoriani Nkai ino ta ltau lino pooki o to nkichui ino pooki o te ng'eno ino pooki o to ngolon ino pooki.>

³¹Kore ne are naa ana, <Tachama le latia ino ana koon.> Meatae nkae nkitanapata naisul kuna.>>

³²Nejoki ꞉ilo aiteng'enani loo nkitanapat ninye, <<Itoolua aitibiraki! Kore inia nitejo naa sipata, nchere nabo Nkai nemeatae nkae mara Ninye.

³³Naa kore tinicham Ninye ta ltau pooki o te ng'eno pooki o to ngolon pooki o sii, tinicham latia ana nicham koon, naa inia naata tipat alang suom pooki naapejori[30] o lkulie asarri pooki likintaki Nkai.>>

³⁴Kore pee edol Yeso ajo ketoolua ninye te ng'eno, nejoki ninye, <<Milakuaniki iyie Nkitoria e Nkai.>> Naaku meatae aitoki ltung'ani oitieu aipara ninye ntoki.

³⁵Kore eiteng'enicho Yeso taatua nkaji e Nkai neiparu ajo, <<Aji etiu paa kejo laiteng'enak loo nkitanapat <Kore Mesia[31] naa Layieni le Daudi>?

³⁶Ketejo abaki Daudi koon, etuutaka ꞉Ltau Sinyati, <Kore Laitoriani, naa ketiaka Laitoriani lai, <<Towuana ta mbata ai e tetene, ana maichoo lmang'ati linono ndacha murto.>> >

³⁷<<Keipoto ꞉Daudi koon ninye ajo, <Laitoriani.> Aji naa eiko teneaku layieni lenye?>> Neinining ꞉ilo turrur kitok ninye te ng'ida.

³⁸Kore eiteng'enita ꞉Yeso ninche, nejoki, <<Errita ate taa laiteng'enak loo nkitanapat. Kore ninche naa kecham aaisaba, eichopito nankan naadoo, necham teneirorokini tee nemirichiereki.

³⁹Necham sii aatewuenie kue too lorikan supati le Sinagogi o too lorikan lekue laa latimi.

⁴⁰Nemut ntokitin pooki taa nkajijik ee nkoilia. Neitoodor nkomono, eitaakino. Naa kore ninche, kedung'okini nkiguana nagol oleng.>>

⁴¹Newuon Yeso eing'urare inie ng'oji neitainyieki nkichoorot, eing'orita ilo turrur neiko tenepik ropiyiani atua sanduku loo nkichoorot e nkaji e Nkai. Kore lparakuo kumo, nepik ropiyiani kumo inie.

⁴²Nelotu nkoiliai nabo aitarani, neitai sintii oare laa keikini oleng ntoki nanya.

⁴³Neipotu ꞉Yeso looiteng'eni lenyena, nejoki, <<Kedede kajoki ntae, kore ana oiliai aitarani, ninye natipika ntoki kitok alang ltung'ana pooki ootipika ropiyiani atua sanduku le nkichoorot.

⁴⁴Amu kore kulo pooki naa keitaitua nkichoorot taatua parakuoicho enche. Kake kore ana oiliai aitarani, naa keitayia taatua menai enye ntoki pooki naichiwue ninye.>>