Read Samburu Marko 14 Bible Online

Marko 14 - Samburu bible

Marko 14

¹Mperot are ake naang'or pee eaku Pasaka o ntasim ee mukateni nemeisiichieki,[33] neyieita laitainok kutuaa la lasar o laiteng'enak loo nkitanapat neiko payie eibung Yeso to loseg o neiko payie ear metua.

²Kake nejo ninche, <<Mara ta ng'amata e ntasim pee meing'olng'ola ltung'ana.>>

³Kore etii Yeso Betania, nkaji e Simon oata nkeeya ee lbolot, anyeita ndaa, nelotu ntomononi inie enapita lkidong. Kore ilo kidong naa soit oji alabasta eitibirunyieki, netii lata narok narropili nagol nkinyiang'a naji Nardo. Kore payie eiper ilo kidong abol, nebukoki inia lata nkue e Yeso.

⁴Negoro lbata loo ltung'ana ootii inie nejokino, <<Aanyo pee eimieki ana lata siu?

⁵Anata duaake etimiraki aaitam ropiyiani naarisere laata e laisiaayiani e lari obo,[34] neichori laisinak!>> Neilemlemakini inia kitok.

⁶Kake nejoki ꞉Yeso, <<Entung'ai ninye, aanyo pee intanyamalmal? Kaitaasa nanu mbae supat.

⁷Amu kore laisinak naa icheche ake aata tenebo o ntae, naa kore tiniyieuu, indimdim aaitaasa ninche supati, kake mikicheche aata nanu nkata pooki.

⁸Etaasa ninye naidim, eelie sesen lai lata tankaraki nukaroto ai, ewuon eng'or inia kata.

⁹Kedede kajoki ntae, kore ng'oji pooki nelikorieki kulo omon supati to nkop nalulung'a, naa kelikori abaki ana bae nataasa ninye pee eparrunyieki.>>

¹⁰Kore Yudas Isikariot, lobo loo lolo tomon oare, nelo netii laitainok kutuaa la lasar pee etum atilikoi Yeso, nepik nkaik enche.

¹¹Kore pee ening ꞉ninche, neng'ida, neitaki lekutuk oichorie ninye silinkini. Neyiaya ꞉Yudas mpaach supat naichoorie ninye meibung'i.

¹²Kore mparri ekue e ntasim e mukate nemeisiichieki, nkata nayieng'i lkuo leker le Pasaka, neipar ꞉looiteng'eni lenyena ninye aajoki, <<Aji iyieu nikipuo aitibiraki iyie, payie inyiayie ndaa ee Pasaka?>>

¹³Neirruaaya oare loo looiteng'eni lenyena, nejoki, <<Enchom lkerenket, naa kenang'are ntae lpayian onapita moti e nkare, erukurukore ninye.

¹⁴Kore nejing, entiaki lopeny nkaji, <Kejo Laiteng'enani, <<Kore nkaji ee lomon, nanyayie Pasaka o looiteng'eni lainien?>>>

¹⁵Naa keitodol ntae nkaji kitok e keper, naitibira netii ntokitin pooki atua naasichiereki. Entibiraki naa iyioo ndaa te inie.>>

¹⁶Neinyuototo laaduo ooiteng'eni aapuo, nebaya lkerenket, netum etuwuana ana natiaka. Neitibir ndaa e Pasaka.[35]

¹⁷Kore pee eaku teipa, nebau o looiteng'eni lenyena tomon o oare.

¹⁸Kore enyeita ndaa tenebo, nejo Yeso, <<Kedede kajoki ntae, kaapik ꞉lobo linchi nkaik ee ltung'ana - ilo taa onyeita ndaa tenebo o nanu.>>

¹⁹Neng'asu ninche aaisinanio, neipar ninye maa obo obo, <<Mara mara nanu sa?>>

²⁰Nejoki ninche, <<Lobo taa ntae tomon o oare, ilo oitodokita nkaina ncharaa tenebo o nanu.

²¹Amu keing'uaa Nkerai e Ltung'ani ana kop ana inia naigeroki naipirita ninye, kake oi siake ꞉ilo tung'ani oichooyo Nkerai e Ltung'ani! Eikach te ilo tung'ani teneitu aikata eini!>>

²²Kore enyeita ninche ndaa, nerrapu Yeso mukate, nemayian, negil, neicho ninche nejoki, <<Entang'amai, sesen lai ele.>>

²³Neitoki arrapu lkikompe, kore payie eidip aichoo Nkai nache, neicho ninche, nemat ꞉pooki.

²⁴Nejoki ninche, <<Lodo lai ele lo lning'o, oibukori tankaraki lkumo,

²⁵kedede kajoki ntae maitoki amat inia naing'uaa lng'anayio lo lmusabibu, ana metabaki inia parri namat eteng'ejuko taatua Nkitoria e Nkai.>>

²⁶Kore pee eidip aatarany sinkoliotin[36], neinyuototo aapuo Lowua loo Lng'erriyio.

²⁷Nejoki ꞉Yeso ninche, <<Irriaa pooki, amu keigero ajo, <Kaar lchekut, nesachari nkerra.>

²⁸<<Kake kore payie aidip atipiu, naituruk tekue ntae alo Galilaya.>>

²⁹Nejoki ꞉Petero ninye, <<Kore abaki tinikutung'aitie ninche pooki, maaing'uaa nanu katukul.>>

³⁰Nejoki ꞉Yeso ninye, <<Kedede kaajoki, kore ade ana kuarie, ewuon eitu eiru lkoko nkatitin are, ikimiki nkatitin uni.>>

³¹Kake nereki ꞉ninye ajoki, <<Kore abaki tanaa kairiam o iyie, maamiki hooyia.>> Nejo pooki nejia.

³²Nepuonu ninche ng'oji[37] neji Getesemane, nejoki ꞉Yeso looiteng'eni lenyena, <<Entewueni tene aomonito.>>

³³Nerik ꞉Yeso Yoana o Petero o Yakobo, neng'asu ninye aisinanio oleng nenyamalu.

³⁴Neitoki ajoki ninche, <<Kaata sina kitok te nkurruk ai, metaa kaye. Entewueni tene, naa entirripicho.>>

³⁵Kore pee elo nkiti rioto, neirrabalakino nkop, neomon ajo tanaa keidimai pee epaachere ꞉inia kata e sina.

³⁶Nejo, <<Aba,[38] Papa, kore ntokitin pooki naa keidimai te iyie, ntapaachereeki ele sina[39], kake mara ana nayieu nanu, kake ana niyieu iyie.>>

³⁷Nelotu neirrachu ninche eilura, nejoki Petero, <<Simon, ilura? Aaku miindim atirripicho nkini kata?

³⁸Entirripicho niomonmon payie mijing'jing atua ntemat, kore ltau naa keata yieuna, kake kechal sesen.>>

³⁹Nelo aitoki aomon ejo laaduo rereii.

⁴⁰Neigil alotu netii ninche, neirrachu eilurate amu keinaurita too njuo ana metaa meidim hoo aatewueni. Naaku meyielo nawoliki ninye.

⁴¹Nechukunyie nkata e uni nejoki ninche, <<Ewuon ake ilurara niyeng'iyeng'ang'a? Eidipe taa ana! Etabawua nkata! Kore Nkerai e Ltung'ani naa kepiki nkaik ee loopeny ng'ok.

⁴²Enyuoto maapetin! Leilo laalikoo oatabawua!>>

⁴³Kore ake ewuon eirorita, nchoo Yudas lobo loo loochi tomon o oare, nelotu tenebo o lturrur. Kore ilo turrur neata lalema o runkun, naa keing'uaa ninche netii lkutuaa laa laitainok la lasar o laiteng'enak loo nkitanapat o lkutuaa loo lpayiani.

⁴⁴Kore ilo otilikoyie naa keichoo apa ninche nkitodolunoto, ejo, <<Kore ilo lagus, naa ninye embung'a, niyaya irriprrip.>>

⁴⁵Kore pee elotu Yudas, nelo nabokata netii Yeso nejoki, <<Rrabi![40]>>, negus.

⁴⁶Nepik Yeso nkaik, neibung.

⁴⁷Kore lobo loo lolo ooitachoo teinie, nechutu lalem lenye, neoch rrindik la laitainoni kitok la lasar, nedung'oo nkiyok.

⁴⁸Nejoki Yeso ninche, <<Amaa, lapurroni dei ara payie kiotuo aaibung iatata lalema o runkun?

⁴⁹Kore chiaake, kawuon mperot pooki ta nkaji e Nkai aiteng'enicho, neitu kimbung'bung. Kake ketaasate kuna pee ebaya Lkigerot Sinyat.>>

⁵⁰Neing'uaa ninye ꞉looiteng'eni pooki, nekuet aaisig.

⁵¹Netii ꞉lbarnoti obo oirukurukore Yeso, erretenita nkini anka napuyiapui apeny. Neibung ꞉ninche ninye,

⁵²kake neing'uaa inia anka, nejo kar aisig meichopo.

⁵³Nerik Yeso netii laitainoni kitok la lasar. Netumo laitainok kutuaa pooki la lasar o lpayiani o laiteng'enak loo nkitanapat.

⁵⁴Kore Petero neirukurukore elakuaniki ana metabaki boo e nkaji namanya lkitok laa laitainok la lasar, newuon tenebo o laisiaayiak aij nkima.

⁵⁵Neyiaya lkutuaa laa laitainok la lasar o lkiama laa larikok pooki laa lpayiani ntoki naibung'ie Yeso pee etum aatar metua, kake nelau.

⁵⁶Amu keiteenikita ninye lkumo, kake kore rereii lenche nepaacha.

⁵⁷Neinyuototo lkulie aaiteeniki aajo,

⁵⁸<<Kitining'o ninye ejo, <Kauroo nanu ana Aji e Nkai natechetaki taa nkaik ee ltung'ana, naa kore tee mperot uni, nachet nkae nemecheta taa nkaik ee ltung'ana.> >>

⁵⁹Kake kore etiu nejia, kepaacha limunot enche.

⁶⁰Neinyuototo laitainoni kitok la lasar te nkiji enche, neipar Yeso ajoki, <<Amaa, miata wolet nimitunyie koon? Kakua baa kuna nikitipika ꞉kulo tung'ana?>>

⁶¹Kake negira ninye eitu ewoliki toki. Neitoki laitainoni kitok la lasar aipar ninye, <<Iyie dei Mesia likianyuta, inia Kerai e ilo Oisisi?>>

⁶²Nejoki ꞉Yeso, <<NANU ILO. Naa idoldol Nkerai e Ltung'ani ewuon ta mbata e tetene e Lopeny ngolon, elotu taatua nkidisin e loing'ang'e.>>

⁶³Nekij ꞉laitainoni kitok la lasar nkilani enyena nejo, <<Aanyo aitoki payie kiyiaya lkulie oolimu?

⁶⁴Itining'o ldeket lenye. Aa duata iatata ntae?>> Nedung pooki nkiguana nchere keichiaakino lkiye.

⁶⁵Neng'asu lkulie lenche aanataki nkamlak, neisiap nkomom enye, neoch ninye taa nkaik, nejoki, <<Mbonoki iyioo!>> Neya ꞉lolo aisiaayiak le inia kiguana ninye aaidong.

⁶⁶Kore etii Petero taabori inie netii Yeso to boo e nkaji, nelotu nkaisiaayiani nabo e laitainoni kitok la lasar.

⁶⁷Naa kore payie edol Petero eiijito nkima, neing'or asipu nejoki, <<Itii abaki apa iyie tenebo o ilo tung'ani lo kerenket le Nasaret, oji Yeso.>>

⁶⁸Kake nemiki ꞉Petero nejo <<Mayielo, namaning sii nijoito iyie.>> Neinyuototo aipung nelo boo e oriong, neiru lkoko.

⁶⁹Kore payie edol naduo aisiaayiani ninye, neng'asu aitoki ajoki lolo ooitachoo te inie <<Kore ele tung'ani naa lobo lenche.>>

⁷⁰Neitoki ꞉ninye amiki. Kore eicha nkini kata, nejoki aitoki ꞉lolo ooitachoo te inie Petero, <<Kesipa ira lobo lenche, amu ira sii iyie loo Lgalilaya.>>

⁷¹Neng'asu aipotoki koon ldeketa, nenya lmumai ajo, <<Mayielo nanu ilo tung'ani liroritata ntae lomon lenyena.>>

⁷²Kore inia kata, neiru lkoko nkata e are. Neparru Petero netiaka ꞉Yeso ninye, <<Kore ewuon eitu eiru lkoko nkatitin are, ikimiki nkatitin uni.>> Nejo lkiyio rrua, neichir.