Read Samburu Marko 15 Bible Online

Marko 15 - Samburu bible

Marko 15

¹Kore nochi naikenyunyie, neiguana laitainok kutuaa la lasar o lpayiani o laiteng'enak loo nkitanapat o lkiama pooki laa larikok loo Lyiaudi. Neen Yeso, nerik aaya, nepik nkaik e Pilato.

²Neipar ꞉Pilato ajoki, <<Iyie dei Lkinkii loo Lyiaudi?>> Nejoki ꞉Yeso, <<Iyie ojoito.>>

³Kore lkutuaa laa laitainok la lasar, nepik ninye mbaa kumo.

⁴Neigil Pilato aipar ninye ajoki, <<Meata niwol ajo? Todua newua mbaa nikipikitae.>>

⁵Kake eitu eitoki ꞉Yeso awoliki toki, neing'asia ana Pilato.

⁶Kore ng'amata pooki e ntasim, naa kelaaki echi ꞉Pilato lturrur ltung'ani obo oena oomonu ꞉ninche.

⁷Netii apa ltung'ani oena oji Barabas tenebo o lboitieii lenyena. Kore apa ninche naa lkiricho oaatara ltung'ana metuata ta ng'amata e long'olng'oli.

⁸Neiliepaki ꞉lturrur Pilato, neng'asu aaomon meitaasaki ninche naitaasaki chiaake.

⁹Nejoki ꞉Pilato ninche, <<Iyieuu nalaaki ntae Lkinkii loo Lyiaudi?>>

¹⁰Amu keteyielo ajo kore laaduo aitainok kutuaa la lasar, naa keichooitie Yeso tankaraki lom.

¹¹Kake neisur ꞉lkutuaa laa laitainok la lasar lturrur meichoo Pilato metalaaki ninche Barabas alang tenelaku Yeso.

¹²Neitoki ꞉Pilato ajoki ninche, <<Oo ele lijoijo Lkinkii loo Lyiaudi, kaa aitaas ninye?>>

¹³Nebuak aitoki aajo, <<Techo ninye to lmusalaba.>>

¹⁴Neipar ꞉Pilato ajoki, <<Aa kaa torno etaasa ninye?>> Kake neitoki ninche aabuak oleng alang duo aajo, <<Techo ninye!>>

¹⁵Kore amu keyieu apa ꞉Pilato neiting'id ilo turrur, nelaaki ninche Barabas. Neicho Yeso meidong'i te liche[41], neichooyo metechei.

¹⁶Nerik ꞉sikarini Yeso atua lgilata le nkaji e lkitok loo Rroman oji Praitoria namanya apa Pilato, neipotu sikarini pooki ootii inie.

¹⁷Neichopoki nanka mugie, neitibir nkopiyia ee lkuku, nepik nkue enye.

¹⁸Neng'asu aairoroki ninye eikordod aajoki, <<Supa, Lkinkii loo Lyiaudi!>>

¹⁹Neoch nkue to much, nenataki ninye nkamlak, negilakini kung aasai.

²⁰Kore pee eidip aaikordodo, neitai naduo anka mugie, neichopoki nankan enyena, nerik aulo aapuo aache to lmusalaba.

²¹Ketii apa ltung'ani oimita nkoitiei eing'uaa nkang'ite e oriong e Yerusalem, oji Simon. Naa keing'uaa apa lkerenket oji Kirene nera sii menye Alekisanda o Rrupo. Neisimaki ꞉sikarini ninye metanapa lmusalaba le Yeso.

²²Neriki Yeso ng'oji neji Golgota, aa keji, <<Ng'oji e mborbor e nkue.>>

²³Nesaan aicho ninye naichuo e lmusabibu nachulare malmal, kake neany.

²⁴Neche ꞉ninche ninye. Neorikino nkilani enyena, nenuk nkuko aadol ntoki nabaki pooki ng'ae atumo.

²⁵Naa saai uni e siran etecho ꞉ninche ninye.

²⁶Naa kore te keper ninye, netii lkigerot oojo <<LKINKII LOO LYIAUDI >> laa ninche etudung'okinyieki ninye nkiguana e lkiye.

²⁷Kore tenebo o ninye netechoki lapurrok oare, lobo te tetene enye o lobo te kidienye.

²⁸

²⁹Kore lolo ooimita inie, nedek ninye eipirpir nkuechi ejoito, <<Hoo! Iyie ojo kauroo nkaji e Nkai nintoki achet too mperot uni!

³⁰Todou taata to lmusalaba, ntejeu koon!>>

³¹Kore sii lkutuaa laa laitainok la lasar, neikordod ninye aaiko nejia ejokino o laiteng'enak loo nkitanapat, <<Keitejewua lkulie kake meidim aitejeu koon!

³²Nchoo Mesia Lkinkii loo Isirael metodou to lmusalaba payie kidol, nikiruk.>> Kore lolo ootechoki tenebo o ninye, nedek sii ꞉ninche ninye.

³³Kore payie ebaki saai ile, neaku naimin to nkop pooki ana metabaki saai saal.

³⁴Kore saai saal, nebuak Yeso to ltoilo kitok ajo, <<Eloi, Eloi, lema sabaktani?>> Kore nautu inia naa ana, <<Nkai ai, Nkai ai, aanyo payie kitung'ayie?>>

³⁵Kore pee ening ꞉lbata loo lolo ooitachoo te inie ejo nejia, nejo, <<Tining'o, Elija eipotuta.>>

³⁶Nekuet lobo, neiput mputaput naichuo naisiicho, neremoki loperriai neiliepie aicho metamata, nejo, <<Entung'ai, matodol tanaa kelotu Elija aitodou to lmusalaba.>>

³⁷Nebuak Yeso aichir to ltoilo sapuk, nedung'o tau.

³⁸Kore nochi anka naor nkaji e Nkai, nekija nkatitin are, ang'asu te keper ana meipung'o.

³⁹Kore pee edol ilo kitok loo sikarini oitache aing'urare Yeso, neikuna pee edung'o tau, nejo, <<Kedede kore ele tung'ani naa kera apa Nkerai e Nkai!>>

⁴⁰Netii sii inie ntomonok naaing'orita elakua, kore atua ninche ketii Maria Magadalena o Maria ng'otonye Yakobo lara lkini o lalache lenye oji Yose, netii sii Salome.

⁴¹Ninche naairukurukore etii Galilaya, neisiaai. Neatae sii nkulie kumo naailieputua aapuonu Yerusalem tenebo o ninye.

⁴²Kore tankaraki nataa teipa e inia parri e napa, eikienyu eaku mparri e Sabato, neinapnapaki Yosep le Arimataya Pilato neomonu sesen le Yeso. Kore apa ninye naa ltung'ani le nkanyit, nera lobo lo lkiama laa larikok loo Lyiaudi, neanyita sii ninye Nkitoria e Nkai.[42]

⁴³

⁴⁴Neing'asia Pilato pee eji ketua, neipotu lkitok loo sikarini neipar aitisipu tanaa ketua duo.

⁴⁵Kore pee esipu te ilo kitok loo sikarini ajo ketua, neicho Yosep meawa ilo sesen lenye.

⁴⁶Neinyiang'u Yose nanka supat napuyiapui, neitodou ilo sesen, neirinaki inia anka. Nepik atua nkurarei naguetuno to soit sapuk, neibeleleng'oki soit nkutuk e inia kurarei.

⁴⁷Kore Maria Magadalena o Maria ng'otonye Yosep, nedol inie neiteperieki ninye.