Read Samburu Marko 16 Bible Online

Marko 16 - Samburu bible

Marko 16

¹Kore teipa e Jumamos eicha Sabato, neinyiang'u Maria Magadalena o Maria ng'otonye Yakobo, o Salome latan naarropil pee etum aachom aaelie Yeso.

²Nepuo tasiran oleng e Jumapili[43], nkurarei nochi ake nailiepunyie ndama.

³Nejokino ninche maate, <<Ng'ae sa oibeleleng'oki iyioo ele soit to nkutuk e nkurarei?>>

⁴Kore pee eapu nkonyek aing'or, nedol aajo eibeleleng'oyieki ilo soit, naa keikitok oleng.

⁵Nejing nkurarei, nedol lbarnoti owuon ta mbata e tetene neichopito nkila naibor naado, neing'asia ninche oleng.

⁶Nejoki ninche, <<Eming'asia, Yeso le Nasaret iyieitata otechoki. Etipiwua, metii ene! Eng'ura, ende apa eiteperieki ninye!

⁷Kake enchom entiliki looiteng'eni lenyena o Petero aajoki, <Keituruk tekue ntae alo Galilaya. Kore te inie, naa idoldol ninye ana apake natiaka ntae.> >>

⁸Neipung to nkurarei aaisig, amu keikirikirete to ngureticho, neing'asiate. Neaku meata hoo obo otilikita amu ketuguretita.[44]

⁹Kore pee epiu Yeso te siran e Jumapili, neipung'oki Maria Magadalena tekue. Kore Maria, naa ninye apa etaarayie ꞉Yeso lairiruani sapa meeipung'o.

¹⁰Nelo ninye aliki lolo ootii apa tenebo o Yeso, ooisinanio, neichirita.

¹¹Kore pee ening ninche aajo keichu Yeso, netoduaa ꞉Maria Magdalena, neany eiruk inia.

¹²Kore eicha inia, neitoki Yeso aipung'oki lkulie lenche oare, ta nkae pukunoto epuoito lchampai.

¹³Nepuo sii ninche aaliki lolo kulikae, kake eitu abaki eiruk ꞉ninche.

¹⁴Kore tesiedi, neipung'oki lolo tomon obo enyeita ndaa. Nekusakan tankaraki neitu eiruk, negol ltauja lenche. Amu kore lolo otoduaa ninye etipiwua, neitu eiruk ꞉ninche.

¹⁵Nejoki ninche, <<Enchom nkopi pooki entilikoi Lomon Supati too ltung'ana pooki le nkop.

¹⁶Kore loiruk naa keipatisi, neitejeuni. Naa kore ilo lemeiruk, nedung'okini nkiguana torno.

¹⁷Naa kuna nkitodolunot naaku tenebo o lolo laairuk nanu. Kore ta nkarna ai naa kearaa lairiruani meipung'o neiro too nkutukie ng'ejuko,

¹⁸neibung lasuria taa nkaik naa kore tenemat sayiet nayecho, nemeata hoo neiko ninche. Keiteleki ꞉ninche ltamoyia nkaik neichiu.>>

¹⁹Kore pee eidip Laitoriani Yeso airorie ninche, neyai aailiepie chumata. Newuon ta mbata e tetene e Nkai.

²⁰Nepuo laaduo ooiteng'eni aalikoo to ng'oji pooki, neasicho Laitoriani tenebo o ninche, eitodolu ajo kedede ilo kilikuai too nkitodolunot naataa tenebo o ninche.