Read Samburu Marko 2 Bible Online

Marko 2 - Samburu bible

Marko 2

¹Kore pee ebik Yeso nkuti perot, nerrinyunyie aitoki alotu Kapernaum, nening'i ꞉ninye aajo ketii nkang.

²Nepuo lkumo aaiturrurrokino ninye ana metali mpaach abaki to nkutuk e nkaji. Neiteng'en ꞉Yeso ninche rerei le Nkai.

³Neyakini ninye ltung'ani otigilgile, oanapita ltung'ana oong'uan.

⁴Kore tankaraki ilo turrur, nelau mpaach naitabakinyie ilo otigilgile netii Yeso. Nedir nkeper e nkaji, nebol aang'eru nkisiapet te ng'oji neichiaakinore Yeso. Neitodoki ninye inia choni naperie ilo otigilgile.

⁵Kore pee edol ꞉Yeso nkurukoto enche, nejoki ilo otigilgile, <<Nkerai ai, kitapalikaki ng'ok inono.>>

⁶Netii sii laiteng'enak loo nkitanapat oowueni te inie, neparraa taa ltauja lenche, ejo,

⁷<<Aanyo pee eiroro ele tung'ani ajo inchi? Nkai edekita ninye! Ng'ae oidim atapaliki ng'ok, mara Nkai ake apeny?>>

⁸Kore ake inia kata, neyielou Yeso ta ltau lenye ajo, ana duaake eata taa ltauja lenche, nejoki, <<Aanyo payie iparraa kuna baa taa ltauja linchi?

⁹Kaa nalelek, tenejokini ele otigilgile, <Kipalikino ng'ok inono,> ana tenejokini, <Inyuo, tarrapu nchoni ino chomo?>

¹⁰Kake kore payie iyielouu aajo keata Nkerai e Ltung'ani nkitoria to nkop napalikinyie ng'ok>>

¹¹- nejoki taa ilo tung'ani otigilgile - <<Kore naajoki iyie, inyuo, tarrapu nchoni ino chomo nkang!>>

¹²Neinyuototo ninye, nerrapu nchoni enye nabokata, neipung edolita ltung'ana pooki, meing'asiata ninche, neisis Nkai ejo, <<Eitu hoo aikata kidol mbae natuwuana ana!>>

¹³Neipung aitoki Yeso achep nchepata e mpaso. Nelotu lturrur pooki netii ninye, neng'asu aiteng'en ninche.

¹⁴Kore echepita Yeso mpaso, nedol Lawi layieni le Alpayo ewuon to ng'oji nelakieki kodi. Nejoki ninye, <<Rukurukoreeki nanu!>> Neinyuototo Lawi, neirukurukore ninye.

¹⁵Kore tesiedi inia, newuon Yeso anya ndaa ta nkaji e Lawi. Netii sii lkumo laitalakunok le kodi o loo ng'ok aanyeita ndaa tenebo o ninye o looiteng'eni lenyena, amu keikumo apa lootuo airukurukore ninye.

¹⁶Kore pee edol ꞉lolo aiteng'enak lo nkitanapat oara lo Lparisayo ninye enya ndaa tenebo o lolo loo ng'ok o laitalakunok le kodi, neipar ꞉ninche looiteng'eni lenyena, aajoki, <<Aanyo pee enya ninye ndaa tenebo o kulo aitalakunok le kodi o loopeny ng'ok?>>

¹⁷Kore pee ening ꞉Yeso nejoito ninche, neng'amakino ajoki, <<Mara lolo lememoyiaa ooyieu labaani kake lolo oomoyiaa ooyieu. Eitu alotu aipot loosipat, kake loaata ng'ok.>>

¹⁸Kore apa looiteng'eni le Yoana Laipatisani o Lparisayo naa keen nkutukie. Nepuonu lkulie tung'ana neipar Yeso aajoki, <<Aanyo pee een looiteng'eni le Yoana o loo Lparisayo nkutukie, nemeen linono?>>

¹⁹Newoliki ꞉Yeso ninche ajoki, <<Amaa sa, aji eiko lomon lo ltung'ani oyemicho teneen nkutukie, ewuon eboitiere ꞉loyemicho ninche? Meata neiko pee eas nejia ewuon ake eboitiere ninye.

²⁰Kake kebau kenya nkata nayae ilo oyemicho aitung'aa ninche, naa keen ninche nkutukie inia parri.

²¹Meatae ltung'ani, oripaki rache e nkila ng'ejuk nkila musana, amu teneiko nejia, naa keng'erari ꞉inia kila ng'ejuk to musana, nerroyo nkijata oleng.

²²Nemeatae sii ltung'ani opik naichuo e lmusabibu ng'ejuk lbenia musan, amu tenepik, nedany ꞉naichuo lolo benia musan, nerroyo naichuo tenebo o lolo benia. Kake kore naichuo ng'ejuk naa lbenia ng'ejuko epiki.>>

²³Kore mparri nabo e Sabato, neim Yeso o looiteng'eni lenyena atua lchampa le nkano, kore eimita ninche atua ilo champa, neng'asu looiteng'eni aagilu nkuechi ee lperes le nkano.

²⁴Nejoki ꞉Lparisayo ninye, <<Ng'ura, aanyo pee eas looiteng'eni linono ta Sabato ana bae nemeichiaakino?>>

²⁵Neng'amaa ninche, nejoki, <<Amaa, eitu aikata isomsom inia nataasa apa Daudi, ta nkata e laitainoni kitok la lasar oji Abiatar, pee elau ninye ndaa nanya, netum sumach o lboitieii lenyena?

²⁶Neitu sa isomsom, neikuna apa ꞉ninye te inia kata pee ejing nkaji e Nkai, nenya mukateni naaitakaki Nkai neitoki aicho lboitieii lenyena, abaki meichiaakino apa payie enya lkulie tung'ana mara ake laitainok la lasar aapeny?>>

²⁷Neitoki Yeso ajoki ninche, <<Eitibiraki Sabato tankaraki ltung'ani, kake mara ltung'ani tankaraki Sabato.

²⁸Naaku naa kera Nkerai e Ltung'ani[2] Laitoriani abaki le Sabato.>>