Read Samburu Marko 3 Bible Online

Marko 3 - Samburu bible

Marko 3

¹Neitoki Yeso ajing atua Sinagogi, netii inie ltung'ani oikaolo nkaina.

²Newueni ltung'ana aaleen tanaa keichiunyie ꞉Yeso ilo tung'ani ta mparri e Sabato payie etum aatilikoi ninye meiguanareki.

³Nejoki Yeso ilo tung'ani oikaolo nkaina, <<Wou ntacho te nkiji e ene!>>

⁴Neipar ꞉Yeso ninche, ajoki, <<Kaa naichiaakino tee nkitanapat ta mparri e Sabato, teneasi supat ana teneasi ntorno? Tanaa sii, teneitopoki ana teneri metua?>> Kake nejo ꞉ninche tau!

⁵Neitamanaa nkonyek aing'or ninche to ngoro, eisinanio oleng tankaraki e ngolon ee nkuechi enche, nejoki ilo tung'ani, <<Ntusunyai nkaina ino!>> Neitusunyaa nkaina enye, neichiu asupatu aitoki.

⁶Neipung Lparisayo nabokata aaiguana tenebo o lolo tung'ana le Erode, aayiaya loseg oaarie Yeso metua.

⁷Neing'uaa Yeso inie, nelo o looiteng'eni lenyena nchepata e mpaso, neirukurukore lturrur kitok ninche oing'uaa Galilaya.

⁸Naa kore tankaraki naning'orita ltung'ana mbaa kumo e nking'asia naasita Yeso, nepuonu eing'uaa Yudea o Yerusalem o Idumea o lkokun le Yordan o looing'uaa aitoki Tiro o Sidon, netii ninye.

⁹Naaku kore tankaraki ilo turrur kitok, nejoki ꞉Yeso looiteng'eni lenyena meitibira meli pee meiding'akini ninye.

¹⁰Amu /keichiunyie apa lkumo, metaa kore lolo pooki oata moyianitin, nediding'unye aayiaya nkoitiei naiseyie ninye.

¹¹Naa kore aitoki nkata pooki nadol ninye ꞉lairiruani, nerriaa ninche tekue ninye neichir aabuak, aajo, <<Ira iyie Nkerai e Nkai.>>

¹²Kake neing'ode ꞉Yeso ninche ajoki, pee melikoo aajo ng'ae era.

¹³Neiliep Yeso alo lowua, neipot lolo ooyieu ꞉ninye, nepuonu ninche netii ninye.

¹⁴Negelu tomon o oare, neicho nkarna ajo <<lkipaareta>>, pee eaku tenebo o ninye, netum sii airruai ninche mechomo aalikoo Lomon Supati.

¹⁵Neicho nkitoria naararie lairiruani meeipung'o, neichiunyie moyianitin.

¹⁶Naa kulo tomon o oare taa apa etegelua ninye: Simon oichoo nkarna naji Petero

¹⁷o Yakobo layieni le Sebedayo o lalache lenye oji Yoana, oichoo ninche nkarna naji Boanerges aa keji layiok le nkurrukurroto

¹⁸o Andirea o Pilipo o Batolomayo o Matayo o Tomas, o Yakobo layieni le Alpayo, o Todayo o Simon ilo agoloni

¹⁹o Yudas Isikariot, lapa otilikoyie Yeso meibung'i.

²⁰Nejing Yeso nkang, neitoki ltung'ana aaiturrurrokino ninye o looiteng'eni lenyena, metala ninche neiko tenenya ndaa.

²¹Kore pee ening ꞉nkang enche ana, nepuo aibung ninye ayau, amu ketejo merekure ebore nkue.

²²Nejo laiteng'enak loo nkitanapat ooing'uaa Yerusalem, <<Keitoria ninye ꞉Beelsebul, naa te ilo kitok laa lairiruani earaa ꞉ninye lairiruani meeipung'o.>>

²³Neipot ꞉Yeso ninche meotu netii, neirorie ninche tee nkitanyanyukot ajoki, <<Aji eiko Chitani tenearaa chitani meeipung'o?

²⁴Naa kore teneoro nkitoria arere koon, meidim inia kitoria aitacho.

²⁵Kore teneoro nkaji arere koon naa meidim inia aji aitacho.

²⁶Naa teneinyuototo Chitani arere koon netum oro, naa meitache nkitoria enye kake keiting.

²⁷Nemeatae ltung'ani oidim atijing'a nkaji e ltung'ani ogol neisimaa aya ntokitin enyena, mara keteena ang'as ilo tung'ani ogol. Kore inia kata netum atupurro nkaji enye.

²⁸Kake kedede kajoki ntae sipata nadede, kore pooki ng'oki o pooki deket odekicho ꞉ltung'ana menya ajo ldeket otuwuaja edekicho, naa kepalikini.

²⁹Kake kore ꞉ltung'ani odek Ltau Sinyati, naa mepalikini ninye aikata, amu etaasa ninye ng'oki nabik ntarasi.>>

³⁰Naa nejia etiaka ꞉Yeso ninche, tankaraki najoito, <<Keata ꞉ninye lairirua.>>

³¹Nebau taa ng'otonye Yeso inie o lalachera lenyena. Kore eitachoo to boo, neirruaaya ltung'ani meipoto ninye.

³²Netii apa lturrur owuon aigilu Yeso, nejoki ꞉ninche ninye, <<Ng'ura, ikiyeita iyie ꞉ng'utunyi o lalachera linono to boo.>>

³³Neng'amaa ꞉Yeso ninche ajoki, <<Ng'ae dei yieyio naa oo ng'ae lalachera lainien?>>

³⁴Neitamanaa ninye nkue aing'or lolo oowueni aigilu ninye, nejoki, <<Kore yieyio o lalachera lainien naa kulo!

³⁵Amu kore pooki ng'ae oas yieunoto e Nkai, naa ninye lalache lai o nkanache ai o yieyio lai.>>