Read Samburu Marko 4 Bible Online

Marko 4 - Samburu bible

Marko 4

¹Neng'asu aitoki Yeso aiteng'enicho te nchepata e mpaso. Nelotu lturrur kitok oleng aiturrurrokino ninye ana metidira ninye meli natii atua mpaso, newuon. Netii ilo turrur pooki nchepata e inie.

²Neiteng'en ninche mbaa kumo oleng too nkitanyanyukot, nejoki ninche ana te inia kiteng'ena enye,

³<<Entining! Kore apa nelo launoni aisuaaya lantarara.

⁴Naa kore eisuaaya ninye lantarara aun, nedoki lbata nkoitiei, nepuonu nkueeny, nenya aamut.

⁵Nedoki lkulie ng'oji e lkarkar, nemetii nkulupo kumo, nebulu aasieku amu megut nkulupo te inie.

⁶Kake kore pee eiliepu ndama nepejori, netoii aitoki amu keidorropi ntana enche.

⁷Nedoki lkulie atua lkuku, nebulu ꞉lkeek loo lkuku, neiding'aki, negor, metaa eitu eiu lantarara.

⁸Nedoki lkulie nkuluponi supat neiu lantarara, amu kore epuku aabulu, neiu lobo osom, neiu likae ntomoni ile neitoki likae aiu ip nabo.>>

⁹Nejoki ꞉Yeso, <<Kore loata nkiyiaa naaning'ichere, nchoo ening.>>

¹⁰Kore aa ninye apeny, nchoo ꞉lolo ooboitiere duo tenebo o looiteng'eni lenyena tomon oare, neipar ninye neikununo nkitanyanyukot.

¹¹Nejoki ninche, <<Kore mbae e Nkitoria e Nkai naisudoro naa ntae eichooki, kake kore lolo lemetii atua, nelikini ninche mbaa pooki too nkitanyanyukot.

¹²Payie eaku: <Kedol ninche nemeyielou, neitoki aaning nemening'u, payie metumoki ninche aaibelekenyata nepalikini!> >>

¹³Nejoki ꞉Yeso ninche, <<Mining'ung'u ntae ana kitanyanyukoto? Kaji naa inkoko tinining'ung'u nkulie kitanyanyukot pooki?

¹⁴Kore launoni naa rerei le Nkai eun.

¹⁵Kulo naa lantarara ootodokita inia oitiei: lolo laa kore pee ening ꞉ninche rerei, nelotu Chitani nabokata neitai ilo rerei otuunoki taatua ninche.

¹⁶Kulo naa aitoki lantarara ootodokita ng'ojitin e lkarkar: lolo laa kore pee ening ilo rerei, neng'amaa nabokata te ng'ida.

¹⁷Naa kore amu meata ninche ntana, newueni ake te nkiti kata, kake kore pee etum ninche nyamali o sina oitami tankaraki ilo rerei, nesioki ninche aarriaa.

¹⁸Kulo naa aitoki lantarara ootodokita ng'oji ee lkuku: lolo ooning ilo rerei,

¹⁹kake kore pee ejing ꞉mbaa e ana kop o mpong'ori e parakuoicho[3] o lng'uarra loo nkulie tokitin ltauja, neiding'aki, negor ilo rerei metaa meiu lng'anayio.

²⁰Naa kulo aitoki lantarara ootodokita nenia kulipo supati: lolo ooning rerei, neng'amaa neiu lantarara. Kore lobo neiu lantarara osom, neiu likae ntomoni ile, neiu sii likae ip nabo.>>

²¹Nejoki ninche, <<Amaa, mara meyauni lkilang'ilang'et nepukurokini loket, tanaa sii eitulutori lkorror? Mara nkeper e ng'oji netala epiki?

²²Amu meatae naisudoro nemeibalunyieki, nemeatae sii naisiaparo nemeboluni aayau wong'an.

²³Kore ilo oata nkiyiaa naaning'ichere, nchoo ening.>>

²⁴Nejoki aitoki ninche, <<Entodol inia nining'ining, amu kore ake ninkoko tinining'ning naa nkiririkinoto e inia ake itumtum, nitumtum abaki nalang inia.

²⁵Amu kore ilo oata naa keponikini, kake kore ilo lemeata neoruni abaki inia naata.>>

²⁶Neitoki ajoki, <<Kore nkitoria e Nkai naa nchi etuwuana ana tenelo ltung'ani aisuaaya lantarara aun too nkulupo.

²⁷Kore nkata pooki naaku kuarie, neilura, neinyuototo ake aitoki nkata pooki tasiran, naa kore easita nejia neichipuchiputa ake lantarara aabulu, nemeyielo ninye neikuna payie easai inia.

²⁸Amu keitubulu nkulupo aapeny, ang'asu lmakurroti, neitoki lperes o nkue e lperes naabore lantarara le nkano.

²⁹Kake kore ake payie eku nkano, neitai lpanka lenye adung amu ketabawua nkata e ndung'ore.>>

³⁰Nejo aitoki, <<Nyo kintinyinyukore Nkitoria e Nkai? Tanaa kaa kitanyanyukoto kitemie?

³¹Nchi etuwuana lantararai kini[4], ilo laa kore teneuni too nkulupo, naaku kera ninye kini alang lkulie antarara pooki le nkop.

³²Naa kore teneuni, nebulu neaku kitok alang lkeek pooki lo lchampa, neitai sura sapuki, paa kore nkueeny e ai, netum aatechet nkajijik enche too sura enyena.>>

³³Kore tee nkitanyanyukot kumo naatuwuana kuna, neliki ninche rerei ana naaidim aatining.

³⁴Neitu eirorie ninche mara ake tee nkitanyanyukot, kake kore aa ninye apeny o looiteng'eni lenyena neibalakinyie ninche mbaa pooki.

³⁵Kore inia parri pee emutu, nejoki Yeso looiteng'eni lenyena, <<Matalang aapuo ildo kokun.>>

³⁶Neing'uaa ꞉ninche ilo turrur, nedir naduo meli natii Yeso, nepuo o ninye, neatae nkulie melin natii tenebo o ninye.

³⁷Neinyuototo lkutati kitok alimana ta mpaso, neoch laing'ok le nkare meli, paa keipututa meli nkare.

³⁸Kake kore Yeso neilura te siedi e meli eata ntoki nairichunyie nkue, neinyuoyie ꞉ninche ninye, nejoki, <<Laiteng'enani, aaku dei mara toki te iyie tinikindaaya?>>

³⁹Kore payie einyoyieki, nebuaaki ilo kutati meitacho, nejoki inia paso, <<Ntirring'ai! Teperoi!>> Negira ilo kutati aitirring'a, nejo tau ꞉laing'ok le nkare.

⁴⁰Nejoki ninche, <<Aanyo payie iatata ntae ngureticho? Ewuon ake miatata ntae nkurukoto?>>

⁴¹Neiputukuny ninche naleng, nejokino, <<Aa ng'ae dei ele, eji paa kening lkutati o mpaso?>>