Read Samburu Marko 5 Bible Online

Marko 5 - Samburu bible

Marko 5

¹Nebaki ꞉ninche nkop ee Lgerasin natii ildo kokun le mpaso.[5]

²Kore ake nochi nadounyie Yeso te meli, nelotu ꞉ltung'ani taatua nkuraren oata lairirua anang'are.

³Naa kemanya apa ilo tung'ani atua nkuraren, nemeata hoo ltung'ani oidima ateena ninye, abaki tee senke.

⁴Amu ketonyuaaki nkatitin kumo aaen ninye tee senke, kake kore senke naateenieki nkaik neng'urng'ur, kore nee nkejek nemutmut ang'ur. Nemeatae ltung'ani poogol nawuaa oidima aitoborro ninye.

⁵Kore kuarie o parkiji taatua nkuraren o too lowuan, naa keichir ninye nebuak, nedung'dung koon too soito.

⁶Kore pee edol Yeso elakua, nekuetiki negilaki kung.

⁷Nebuak to ltoilo kitok ajo, <<Nyo kirum nanu, Yeso Nkerai e Nkai naisul pooki? Ntakaaki lekutuk ta nkarna e Nkai ajo mikinteme.>>

⁸Amu kejokita ꞉Yeso ilo airirua, <<Tupuku tung'ai ele tung'ani!>>

⁹Neipar ꞉Yeso ninye ajoki, <<Ikijuae nkarna?>> Newoliki ajoki, <<Kaaji nkarna Njore kitok[6], amu ikira iyioo kumo.>>

¹⁰Nelej ꞉ninye Yeso naleng, pee memiraa ninche aipung'ie te inia kop.

¹¹Netii inie mboo kitok ee mbitiro naadaa to nkocheke e ndonyuo.

¹²Kore ꞉lolo airiruani nelej Yeso aajoki, <<Timiraki iyioo atua kunda bitiro, pee kijing atua ninche.>>

¹³Neicho ninche mechomo, neipung ꞉lolo airiruani, nejing atua nana bitiro. Kore inia boo ee mbitiro naabaya matejo nkalupuni are, nejo dii aaitutunyie te ilo owua, nedoki atua mpaso, neya ꞉nkare.

¹⁴Neisig lchekuti otii nana bitiro nepuo lkerenket o lchampai, aalikoo inia bae. Nepuonu ltung'ana aadol aajo nyo nataase.

¹⁵Naa kore epuonuta netii Yeso, nedol ilo tung'ani chiaake oata lairiruani, ewuon neichope aitibiraki, nemeng'or mparrunot enyena, neiputukuny ninche.

¹⁶Kore lolo ootoduaa duo inia bae nataase, neliki ninche neikuna ilo tung'ani oata lairiruani payie eichiu o mbaa naaipirita nenia bitiro.

¹⁷Neng'asu ltung'ana aalej Yeso mechomo aing'uaa nkop enche.

¹⁸Kore edirita Yeso meli alo, nelej ꞉ilo tung'ani oata apa lairirua meichoo mechomo tenebo o ninye.

¹⁹Kake eitu eicho ꞉Yeso ninye meirukurukore, nejoki, <<Chomo nkang netii ltung'ana linono niliki ninche mbaa pooki nikintaasa ꞉Laitoriani, o nikinkuna payie king'urrie iyie.>>

²⁰Neinyuototo ninye alo te inie, neng'asu alikoo te Dekapolis[7] mbaa pooki naitaasa ninye Yeso, neing'asia ltung'ana pooki.

²¹Kore pee eidip Yeso aitoki atalang'aki laduo kokun le mpaso te meli, neiturrurrokino ninye ꞉lturrur kitok te nchepata e mpaso.

²²Nelotu lobo loo lkutuaa le Sinagogi, oji nkarna Yairo. Kore pee edol Yeso, nerriakino nkejek enyena,

²³nelej ninye oleng ejo, <<Ketaa keye ntito ai kini. Wou nteleki ninye nkaik inono pee eichiu, nemeye.>>

²⁴Neing'uaa ꞉Yeso inie alo o ninye. Neirukurukore ninye ꞉lturrur kitok, neiding'aki ninye taa mbat pooki.

²⁵Netii inie nkitok nabo namuai natowe larin tomon o oare.

²⁶Netumo ꞉ninye sina oleng tankaraki labaak kumo, netumutaka ninche ntokitin enyena pooki naata. Kake nepal neikachu, nelo kue arroyo naleng.

²⁷Kore pee ening lomon le Yeso, neim atua ilo turrur, nenyikaki Yeso aimu tooriong, neiseyie nkila enye.

²⁸Amu etejo ninye, <<Kore ake tanaa kaiseiyie nkila enye, naichiu.>>

²⁹Negem nabokata ilo odo oruko, nening te sesen lenye ajo eichiwua, netung'ayie sina.

³⁰Kore ake payie eyielou Yeso ajo etung'ayie ninye ꞉ngolon, neiwuatuwuata nabokata te nkiji e ilo turrur, nejo, <<Ng'ae oiseyie nkila ai?>>

³¹Newoliki ꞉looiteng'eni lenyena aajoki, <<Aanyo payie ijo ng'ae laaiseyie, idolita ajo ikinding'akita ꞉ele turrur?>>

³²Kake neitamanaa nkonyek payie etum atoduaa ilo tung'ani otaasa inia.

³³Kore inia kitok, nelotu netii Yeso eikirikira neiputukunyuo tankaraki nayielo inia nataase, nerriakino tekue nkejek enyena, neliki sipata pooki.

³⁴Nejoki ꞉Yeso ninye, <<Ntitai, /kinchiunyie nkurukoto ino. Chomo te seriani, naa ikitooruaki iyie ilo sina lino.>>

³⁵Kore ake ewuon eirorita Yeso, nepuonu ltung'ana ooing'uaa nkang e laduo kitok le Sinagogi, nejoki ilo kitok, <<Etaa etua ntito ino, aanyo payie intoki airran Laiteng'enani?>>

³⁶Kore payie ening ꞉Yeso lkilikuai olimuta ninche, nejoki ilo kitok le Sinagogi, <<Miurieicho, iruko ake apeny.>>

³⁷Eitu eicho ꞉Yeso lkulie tung'ana meirukurukore ninye, mara ake Petero o Yakobo o Yoana lalache le Yakobo.

³⁸Nebaki ꞉ninche nkang e ilo kitok le Sinagogi, nedol ꞉Yeso ltung'ana ooing'olng'ola, neichirita, nebuakita naleng.

³⁹Kore payie ejing ninye atua nkaji, nejoki ninche, <<Aanyo payie ing'olng'olala ninchiritata? Eitu eye nkerai kake keilura ake.>>

⁴⁰Nekueniyie ꞉ninche ninye. Kake kore Yeso, neipung'ie ninche pooki, nerik menye o ng'otonye nkerai o laaduo ooiteng'eni lenyena, nelo atua inie netii nkerai.

⁴¹Neibung inia kerai nkaina, nejoki, <<Talita koum![8]>> Kore kipirte e inia tinimbelekeny naa, <<Ntitai kini, kaajoki iyie inyuo!>>

⁴²Neinyuototo nabokata inia tito aitache, neng'asu alo. Kore apa ninye, naa keata larin tomon o oare.[9] Neing'asia ninche naleng.

⁴³Neitaarriyian ninche oleng pee meyielou hoo ltung'ani obo ana bae, neitoki ajo meichori inia tito ntoki nanya.