Read Samburu Marko 6 Bible Online

Marko 6 - Samburu bible

Marko 6

¹Neipung Yeso aing'uaa inie, nelo lkerenket lenche, neirukurukore looiteng'eni lenyena.

²Kore pee ebaki mparri e Sabato, neng'asu aiteng'enicho taatua Sinagogi. Neinining ninye ltung'ana kumo, neing'asia nejo, <<Taaji pasa etumo ꞉ele tung'ani kuna baa? Naa aa ng'eno ana naichooki ninye, eji paa keas mbaa kutuaa e nking'asia naijo kuna taa nkaik enyena?

³Amaa, mara ilo aitibirani loo ntokitin ee nkeek ele, layieni le Maria nera sii lalache Yakobo o Yosep o Yuda o Simon? Metii dei nkanachera enyena atua iyioo?>> Negorokino ꞉ninche ninye.

⁴Nejoki Yeso ninche, <<Kore loiboni naa keichori ake nkanyit tae ng'oji pooki mara ake to lkerenket lenche o taatua lmarei lenye o ta nkang enye>>

⁵Naaku eitu eidim ninye ataasa hooyia mbaa e nking'asia teinie, mara ake lolo kuti tamoyia ooiteleka nkaik, neichiu ninche.

⁶Neing'asia tankaraki meata ninche nkurukoto. Nemanaa Yeso taatua nkang'ite eiteng'enicho.

⁷Neipotu loochi ooiteng'eni lenyena tomon o oare, neng'asu airruaya ninche maa are are, neicho ninche nkitoria meitoria lairiruani.

⁸Neitanap payie, menap hoo ntoki to nkoitiei mara ake sobua, nemenap ndaa, anaa mbene anaa sii ropiyiani tee mbenia ee nkimeenteni enche.

⁹Kake payie eichop namuka, nemeichop nankan maare.

¹⁰Neitoki sii ajoki, <<Kore nkaji pooki nijing'jing, entewuenie ana metabau nkata nimpung'pung aaing'uaa inie.

¹¹ Naa kore teneatae ng'oji nemeitoomonieki tanaa nemening'ieki ntae, kore impung'utoto te inie, empiripiroi nterit ee nkejek inchi[10], metaa nkitodolunoto tee ninche.>>

¹²Nepuo aaing'uaa inie aaliki ltung'ana metung'ai nkoitieii enche torrok aaibelekenyakino Nkai.

¹³Nearaa ꞉ninche lairiruani kumo meeipung'o, neelie ltamoyia kumo lata, neichiunyie ninche.

¹⁴Kore tankaraki natining'ie nkarna e Yeso, nejoito lbata loo ltung'ana, <<Ketipiwua Yoana Laipatisani too lootuata naa tankaraki inia payie easicho inia golon te ninye.>>

¹⁵Nejo lkulie, <<Kore ele tung'ani, naa lapa oiboni le Nkai oji Elija.>> Neitoki lkulie ajo, <<Kera ninye likae oiboni le Nkai ana lolo oibonok le apa,>> nening sii Lkinkii oji Erode lolo omon lenyena.

¹⁶Naa kore pee ening, nejo, <<Yoana dei ilo, lapa tung'ani latudung'oyie nkue, otipiwua too lootuata.>>

¹⁷Amu kore apa ꞉Erode naa keirruayie meibung'i Yoana. Neen, nepik jila tankaraki Erodias, nkitok e Pilipo lalache lenye, nawa ayem ewuon eichiu ninye.

¹⁸Amu kejokita apake ꞉Yoana ninye, <<Meichiaakino tee nkitanapat e Nkai tiniya nkitok e lalache lino.>>

¹⁹Kore Erodias, naa keiba Yoana, neyieu near metua. Kake eitu etumoki,

²⁰amu keurie apa ꞉Erode Yoana, nerripito ninye, amu keyielo ajo kera ltung'ani loosipat naa sinyati. Nenyamalu oleng teneinining Yoana, kake kecham ainining'o ninye.

²¹Kore mparri nabo pee eitibir Erode sikukuu aachipakino inoto enye, neitoomono lkutuaa le sirkali enye o lkutuaa lenyena loo sikarini o larikok kutuaa le Galilaya, netum taa Erodias mpaach naasie inia nayieu.

²²Kore etikii sikukuu, nejing'u ntito e Erodias nkaji eranyakita Erode o lomon lenyena. Neiting'id ninche ꞉ranyata e inia tito. Nejoki ꞉Lkinkii inia tito, <<Toomonu pooki toki niyieu naa kaaicho.>>

²³Neitoki anya lmumai eigil nkatitin kumo ejoki ninye, <<Kore ntoki pooki nikiomon naa kaaicho, ana metabaki orati e nkitoria ai teneitirisi.>>

²⁴Neipung inia tito alo aiparichiere ng'otonye nejoki, <<Nyo dei aomonu?>> Newoliki ajoki, <<Nkue e Yoana Laipatisani.>>

²⁵Nesiooyo nabokata achukokino lkinkii neomon ajoki, <<Kayieu nikincho tana kata nkue e Yoana Laipatisani, ta ncharaa.>>

²⁶Neisinanio lkinkii oleng, kake kore tankaraki lmuma oatama duo o tankaraki ltung'ana ooboitiere te misa, naaku meyieu negil natiaka inia tito.

²⁷Nereu nabokata sikarii jila, neitanap ninye meyau nkue e Yoana. Nelo ilo sikarii nedung'u nkue e Yoana te inie,

²⁸neyau ta ncharaa neicho ntito, neicho ꞉inia tito ng'otonye.

²⁹Kore pee ening looiteng'eni le Yoana nataase, nepuonu aaya sesen lenye, neiteper to nkurarei.

³⁰Nerrinyunyie lkipaareta aaiturrurro te inie netii Yeso, nenyaki ninye mbaa pooki naataasa o naaiteng'enichete.

³¹Kore tankaraki naruko ltung'ana epuonu inie netii ninche nepuo, naaku metum abaki ninche mpaach nanyayie ndaa. Nejoki Yeso ninche, <<Wootu erukurukoreeki maapetin ng'oji neliyio aa iyioo aapeny, eyeng'iyeng'ata peneu.>>

³²Naaku taa, nepuo ninche aapeny te meli ng'oji neliyio.

³³Kake nedol ꞉ltung'ana ninche epuoito, neyielou lkumo, nekuet aapuo inie ng'oji tee nkejek eing'uaa lkerenketi pooki neng'as inie tekue ninche.

³⁴Kore pee edou Yeso te meli, nedol lturrur kitok, neing'erru ninche amu ketuwuana nkerra nemeata lchekut. Neng'asu aiteng'en ninche mbaa kumo.

³⁵Kore emuto, nepuonu looiteng'eni lenyena netii ninye nejoki, <<Kore ene ng'oji naa loliyio, nemuto sii.

³⁶Nchoo ltung'ana mechomo lchampai o nkang'ite naataana aanyiang'aki ate ntoki nanya.>>

³⁷Kake neng'amaa ajoki, <<Enchoo ntae ninche ntoki nanya.>> Neipar aajoki, <<Aa ikipuo aainyiang'u mukateni naawuana naanya ꞉laata e laisiaayiani ee mperot ip are pee ikincho metama?>>

³⁸Nejoki, <<Aja mukateni niatata? Enchom eng'urai!>> Kore pee eidip aateyielo, nejoki, <<Mukateni imiet o sinkirri oare.>>

³⁹Neitanap Yeso ninche metiaaki ltung'ana pooki metowuana too lturrurri aajo siap too nkujit naanyori.

⁴⁰Newueni ninche too lturrurri loo maa ip o loo maa onom.

⁴¹Nerrapu ninye nenia mukateni imiet o lolo sinkirri oare neing'or chumata, neicho Nkai nache. Kore nenia mukateni, neor, neicho looiteng'eni lenyena meichoo ltung'ana. Neitoki ꞉Yeso aoriki ltung'ana pooki lolo sinkirri oare.

⁴²Nenya pooki neimu,

⁴³nebosu looiteng'eni lenyena nkikapuni tomon o oare naabore ng'urrot ee mukateni o sinkirri.

⁴⁴Kore lewa oaatama inia daa naa nkalupuni imiet.[11]

⁴⁵Kore ake payie eidip inia ataasai, neitirrichaki ꞉Yeso looiteng'eni lenyena metijing'a meli aaituruk aalang'aki Betesaida natii ildo kokun, esacharita ninye lturrur.

⁴⁶Kore pee eidip aichoo ninche lesere, neing'uaa inie alo lowua aomon.

⁴⁷Kore pee eaku teipa netabaka meli nkiji e mpaso, netii ake Yeso nkop apeny,

⁴⁸nedol ꞉ninye looiteng'eni lenyena enyok aaikeeja aareu inia meli taa nkaik enche, tankaraki keochito ninche ꞉lkutati onang'are. Kore etinyikua nkakenya, nelo netii ninche epororita nkare, naa keyieu pee erepaa[12] ninche,

⁴⁹kake kore pee edol ꞉ninche ninye epororita nkare, nejo taa ltauja milika inia, nebuak aaichir,

⁵⁰amu kore ninche pooki naa ketodua ninye, neiputukuny. Neirorie taa ꞉Yeso ninche nabokata ajoki, <<Entogolo ltauja! Nanu dei, naaku emiurieicho!>>

⁵¹Nedir ninye inia meli natii ninche, neperoo lkutati. Neing'asia ninche katukul.

⁵²Amu kore ninche naa ewuon ake eitu eibung naipirita napa bae e nking'asia ee mukateni, amu keitogoloki ltauja lenche.

⁵³Kore pee elang ninche mpaso, nebaki inia kop e Genesaret, neitacheyie meli teinie.

⁵⁴Kore pee edou ninche te meli, neyielou Yeso ꞉ltung'ana nabokata.

⁵⁵Nekuet ltung'ana aaman inia kop pooki, neng'asu aayau ltamoyia too nchoonito ng'oji pooki nening aajo ketii ninye.

⁵⁶Naa kore pooki nelo ninye, paa nkang'ite, tanaa lkerenketi, tanaa sii lchampai, neiteper ꞉ninche lolo tamoyia too ng'ojitin neemirichereki. Nelej ꞉ninche ninye meiseyie ake sarkudai le nanka enye. Kore ꞉pooki ooiseyie ninye, neichiu.