Read Samburu Marko 7 Bible Online

Marko 7 - Samburu bible

Marko 7

¹Nepuonu Lparisayo o lbata laa laiteng'enak loo nkitanapat ooing'uaa Yerusalem aaiturrurrokino Yeso.

²Nedol lbata loo looiteng'eni lenyena enyeita ndaa taa nkaik torrok, aa taa nkaik nemeituko.

³Amu kore apa Lparisayo o Lyiaudi pooki naa menya ndaa eitu eng'as aaituk nkaik enche tankaraki naibung'uta lkerreti loo lmakui lenche.

⁴Naa kore ake ninche pee epuonu eing'uaa nemirichiereki, nemenya ndaa mara keitukote. Neatae sii lkulie kerreti kumo ootujung'oitie aaibung, atuwuana nkutukoto ee lkukompeni o noo motio e nkare o nee mpirikani e surutiai.

⁵Neipar ꞉lolo Parisayo o laiteng'enak loo nkitanapat Yeso aajoki, <<Aanyo pee meirukurukore looiteng'eni linono lkerreti loo lmakui, eji paa kenya ninche ndaa taa nkaik torrok.>>

⁶Nejoki ninche, <<Keibonua apa loiboni le Nkai Isaya aitibiraki naipirita ntae looitaakino, ana /naigeroki aajo: <Kaayanyit ꞉kulo tung'ana too nkutukie, kake kaalakuaniki ꞉ltauja lenche,

⁷naasai nanu pecheu. Amu kore nkiteng'ena enche naa noo nkitanapat naaing'uaa ltung'ana.>

⁸<<Amu itung'aitie ntae nkitanapat e Nkai, nimbung'utata lkerreti loo ltung'ana.>>

⁹Neitoki ajoki, <<Iatata ntae nkoitiei supat e loseg nipaachierierie nkitanapat e Nkai, payie itumtum airukurukore lkerreti linchi.

¹⁰Amu etiaka ntae Musa, <Iyanyita papa lino o ng'utunyi,> naa, <Kore pooki oiro ntoki torno te menye tanaa to ng'otonye naa meata ajo meri metua.>[13]

¹¹Kake ijoijo ntae, <Kore tenejoki ltung'ani menye anaa ng'otonye, <<Kore reteto nikiret nindim ning'amaa ta nanu, naa kaitaka Nkai.>>>

¹²Naaku merekure inchocho ninye metaasaki menye o ng'otonye toki. Kore Korban naa nkichoroto naitayiaki tankaraki Nkai.

¹³Inia paa kore tee lkerreti linchi lintarasaa, nintaa rerei le Nkai meitoki. Nintokiki aas mbaa kumo naatiu nejia.>>

¹⁴Neitoki ꞉Yeso aipotu ilo turrur nejoki, <<Kore ntae pooki, entining'ooki, nining'ung'u.

¹⁵Meatae ntoki natii oriong e ltung'ani naa kore tenejing atua ninye neidim aitarruoi, kake kore naitarruo ninye naa nenia naaing'uaa atua.>>

¹⁶Kore teneata ltung'ani nkiyiaa naning'ichere, nchoo ening![14]

¹⁷Kore pee ejing ꞉Yeso nkaji aing'uaa ilo turrur, neipar looiteng'eni lenyena naipirita inia kitanyanyukoto.

¹⁸Nejoki ninche, <<Amaa, imadada sii ntae? Mining'ung'u aajo kore ntoki pooki e oriong najing atua ltung'ani naa meidim aitarruoi ninye?

¹⁹Amu mejing inia toki atua ltau lenye, kake atua nkocheke ejing, neipung te sesen tenelo aulo.>> Kore pee ejo Yeso ana, naaku eimie ndaki pooki ajo keisupati.

²⁰Neitoki ajo, <<Kore naipung'u taatua ltung'ani, naa ninye taa naitarruo.

²¹Amu atua ltauja loo ltung'ana eing'uaa mparrunot torrok o loloito ee ltung'ana leitu eyema[15] o mpurrore o arichoi e lkiye

²²o loloito ee ltung'ana ooyema o luboi o ntorno o losegin le sapare o ꞉mparrunot nemeitaa loloito toki o lom o nkiroroto e ntorroni too lkulie o nkilacha o madai.

²³Kore kuna torrok pooki naa atua ltung'ani eing'uaa, neitarruoo ninye.>>

²⁴Neinyuototo Yeso te inie nelo mbata e lkerenket le Tiro.[16] Kore etii ninye inie, neleliakino ajing nkaji nabo, naa keyieu nemeatae hoo ltung'ani oyielou, kake neyielouni ake eyia.

²⁵Nchoo nkitok naata ntito naata ꞉lairirua, nening lomon lenyena, nelotu nabokata arriakino nkejek enyena.

²⁶Kore inia kitok naa noo Lgirriki, netiiwuaki to nkop e Penisia natii Siria. Nelej Yeso metaarai lairirua meeipung'o te inia tito enye.

²⁷Nejoki ꞉Yeso ninye, <<Nchoo nkera eng'as aanya ntoki pooki aaimu, amu mara supat tenerrapuni ndaa ee nkera neyai aanang'aki ldein.>>

²⁸Kake neng'amaa ꞉ninye Yeso ajoki, <<Lokitok, kore abaki ldein etii taabori misa naa kenya lekunot ee nkera.>>

²⁹Nejoki ꞉Yeso ninye, <<Kore tankaraki inia nitejo, chomo naa! Etung'ayie lairirua ntito ino.>>

³⁰Nelo ninye nkang enye, neiniapu nkerai enye eilura to rruat, netung'ayie ꞉lairiruai.

³¹Neing'uaa aitoki Yeso inia bata e Tiro, neimaa atua lkerenket le Sidon nelo mpaso e Galilaya ana metabaki nkop e Dekapolis.

³²Neyakini ninye ltung'ani ming'ani lemeyielo airoro aitibiraki, neomon ꞉ninche Yeso meiteleki nkaina.

³³Kore pee eya ninye ilo tung'ani aiwuang'ie te ilo turrur, nepik Yeso lkumojik lenyena atua nkiyiaa enyena. Nenataki nkamlak, neiseyie lng'ejep lenye.

³⁴Kore payie eimariri chumata, neitodoyio siwuo, nejoki, <<Epata![17]>> aa kejo, <<Toboloi!>>

³⁵Nebolo nkiyiaa enyena nabokata, nelaa sii enata e lng'ejep lenye, neng'asu airo aitibiraki.

³⁶Neitaarriyian ꞉Yeso ninche pee meliki hoo ltung'ani obo inia bae. Kake kore nkata pooki naitanap ꞉Yeso ninche payie melikoo inia bae nataase, nepuo kue eitadaraa inia nataase oleng.

³⁷Neing'asia ltung'ana katukul nejo, <<Kore pooki nataasa naa ketaasa aitibiraki, eichoo lming'anak metining'icho o lemeiro meiroro.>>